Is and-sin techtfas in teni-sin lathi brátha bríg & nert cosmail don tenid in ro faite na tri maic oc Nabcodon. Ni ró loisc in tene-sin na maccu náema. Ro loisc immorro na timthirthidi ecráibdecha batar imman sornd tened. Is amlaid-sin loiscfes teni bruthmar brátha na h-uli pecthachu & na h-uli ecraibdechu. Ni erchotigfi immorro do chorpaib na firen, ar biáid in teni-sin amail bróen n-ailgen dona naemaib. Loscfid immorro na pecthachu.