Corpus of Electronic Texts Edition
Saltair na Rann (Author: Unknown)
poem 160
160.
8225] Il-láithiu nalánchangen
domnaig tadban diarndoidngib,
ticfait airbri archangel
dochum talman líarCoimdid.
8229] Congera int-archaingel
gairm gluair90 óscriaid cechduine,
forsil n-Adaim n-ardaingen
con-héirset hili huile.
8233] ISsinchetna eisseirge
riacách foguth indaingil,
apstail conaseiselbe
coCrist cenchrad diacaingin.
8237] 'Sindeisseirgi thanaisi
atressat fáthe inbetha:
foismedaig nisfailgaisi
dontress essérgi ingretha.
8241] 'Sinchethramaid essergi
atreisset martir thalman,
isincoiced eisseirgi
huilidettu noeb n-arbar.
8245] ISintsessed eisseirgi
heirgit othalmain taisced
aes óge, aes athirge,
nanoidin iarnambaisted.
8249] ISsintsectmaid eisseirgi
atraig cachoen coanmain,
atenid, atrommthuilib,
amuir, atir, atalmain.
8253] Tinolat drong tóebadbal
dochum dála triacrithfeidm,
muinter nimi noebarbar,
muinter thalman iss iffeirnn.
8257] IS fossud afledugud
linib anduis andile,
asossud, asrethugud,
fiadgnuis réil rig secht nime.
8261] Na secht nime noebnara
fillfitir fodlaib fuiled,
gebaid tene toebdana
otha thurcbail cofuined.
8265] Forhinnaib nalasrasin
seiss intsluáig innasrethaib,
osdindaib nacasrasin
combuaid fobrátha brethaib.
8269] Atre inrí robúadach
conidfoidreich doib huile,
conachroich deirg dodúalaig
friaaiss fiadgnúis cechduine.{folio 40 b 1}
8273] Seiss isuidiu amiadamla
Mac De Athar centimme,
innachuiriu grianamra,
adáapstal dec imme.
8277] Mac nahOge ebraide
dorósait slógu hisaithiu,
din artróge delgnaide
diarndítin isindlaithiu.
Il-láthiu nalánchaingen.