Corpus of Electronic Texts Edition
Saltair na Rann (Author: Unknown)
poem 150
150.
7733] Ri secht nimi, rí talman,
ardruiri nan-iladbar,
p.114
imrulaid etronn, fo fecht,
friré tribliadan trichat.
7737] Ri dochoid fecht forfolocht
bahé inri tairchert torocht,
diarochind Iudas inmbrat(h)
diambui inglinn Iosofath.
7741] Ri risfer failti osblai
Iudas triaphoicc mbrathemdai,
rí cosrucad sluag 'nadail,
rí rucad in-aurgabail.
7745] Ri rúad rofucad hicacht
hitech coslúag nasacart,
diarodiult Petur cobras
nadrabe 'namuinteras.
7749] Rí rodamair cech ndigail
fophlagaib fiaderrigaib,
ri tarcbad fiadchuirib clann,
rí fors'tardad guforgall.
7753] Rí dochoid fricrann crucha
asathoil nir'athrucha:
ri noeb diatardad indneim,
rí goét 'nathoeb colagein.
7757] Ri dochoid iarsoeralt slecht
asadoenacht 'nadéacht:
rí rosáilset frian-úine,
rochainset nahilldúile.
7761] Tarblaing dorcha darcachmag:
mairb thalman asrachtatar;
bathómnaig dúili Dé dil
diar'fodluig fíal intempuil.
7765] Rochichlaig cech duil, deilm nglan,
rochrithnaig nem istalam,
muir darcricha rothriall techt,
cride cloch ciar roscáilset.
7769] Ri roches hicriaid chain
croich darcenn clainni Ádaim,
iarsin ruc creich, calma adrenn,
cotarat láim darhIffern.
7773] Ri rochuimrig Demun dub
dianidcomainm Lucifur:
atat fochrithfeidm osain
sloig hIffirnn conan-amsaib.
7777] Ri dofuc brait hIffirn uair
apein, acrithfeidm comtruaig,
rosuidig slánaib foadeis
forbruigib bánaib Parduis.
7781] Rí doeni, tolaib caingen,
ri aingel, ri archaingel,
dessid iarsin, soerda clu,
osrigaib 'narigsuidiu.
7785] Mori rígfial forlassad,
isflaith firian forbhassach,
doróssat cechmbrig, mod ngle,
ferr cechrig rí secht nime.
Rí secht nime, rí talman.83