Corpus of Electronic Texts Edition
Saltair na Rann (Author: Unknown)
poem 146
146.
7601] Ri Robennach, mellach búaid,
na secht lestru usci úair,{folio 38 b 2}diamboe 'sinchoiblid gil glain,
dianderna infín inGalail.
7605] Rí imRulaid, rígda fecht,
combuidin móir 'nachoemtecht,
diar'hiicc inclam, comul nglé,
bae fortoeb naconairé.
7609] Rí ruthanic, tolaib drong,
incathraig Capharnaum,
diabrethir féin, feib rothúir,
roíccad mac inchetuir.
7613] Rí conattail il-luing lóir,
in-ainbthine dein dermóir,
diar'choisc inngaeth corbothláith,
corabi inrianfeth robláith.
7617] Ri rofaed drong ndotchaid, ndúb,
'sindorcraid cenimforddúl,
diar'hícc fer fothedmaib tra
dogrethaib dremnaib demna.
7621] Rí rosas nacoicmili,
cenmotha slóg cechdine,
dochoicbargenaib, mod n-án,
ocus dondáoenbratan.
7625] Rí robennach, ferr cechgein,
nadáiasc, nacoicbargein,
cotarfuaraid léo foleith
dáchliab déc diafuidlechaib.
7629] Ni dinsid tiar na tair,
rí in-hislib, ri in-arddaib,
adrell cechrig immosech,
ferr cechrig ri robennach.
Rí robennach, mellach búaid.