Corpus of Electronic Texts Edition
Saltair na Rann (Author: Unknown)

poem 125

125.


6997] Rogab Solam, srethaib slúag,
rígi n-Israhél n-adrúad,
rí samlaid nifrith sunn sel,
eter talmain isnóebnem.
7001] Con-écnu óg, cocruth glan,
targcai cechslóg séis Solman:
balór forggal oscachmaig
arorddan, arairmitein.

p.103


7005] Écna Solman, srethaib slóg,
osbith bladmar mardergór,
macsamla Solman, síth nglan,
nifrith dorigaib talman.
7009] Dáarrig dec, digrais gair,
héd robátar icSolmain,
cach forachuaird, demin scél,
fordáthuaith dec Israhél.
7013] Frithalim tigi indrig
sloig sir Solman meic Dauid,
fritinol bíd ocus chiis
cachdíb icind cachoenmíss.
7017] Fess cech n-aidchi, cenchess cain,
tairbi tigi Solamain,
cenlubai lergg, leri líi,
censelgc slebi nahuisci.
7021] Tricha miach cruithnecht osblái,
trifichit miach n-eornáe,
deichndaim fichet bó, nibréc,
ocus cet molt, ba morthrét.
7025] Arécnu, arordun oll,
frifrecru forgal fírdrong,
amru brígaib, brosnaib gal,
osrígaib rogab Solam.
Rogab Solam, srethaib slúag.