Corpus of Electronic Texts Edition
Saltair na Rann (Author: Unknown)
poem 123
123.
6893] Dorodiúsaig Día amac
'naagid frifrituttacht,
mór d'ulc triabrathaib rogní
diaathair combad athri.
6897] Dor'inól slúag sleoda sneid,
in-agaid ndeoda nDauid,
triabladblat feib rofirad
cotarmart aathrígad.
6901] Túargaib cosluagaib cosreith
combuadaib, combrithemnib72,
nir'fírda dó dul donchath
iartecht corígna aathar.
6905] Abisolón, srethaib slúag,
rothinól cath claidebruad,
d'innarba Dauid cotrén
nabeth forcrich n-Israhél.
6909] Glérdin rofersat incath
trenfir Dauid comorrath:
riacruadgail nacórad crón
rotheich slog Abisolón.
6913] Uarromebaid incath cerb
for Abisolón slegdergg,
among buidi, mín adath,
rogiul dogéscu darach.
6917] IOb trénfer derbtha treith
toisech míltnechta Dauid,
donchath chródonn rogab greimm
atacomong dooenbeim.
6921] O shunn romarbad amac
dor'arbrad fothochomracht,
cotarmairt éc, bascél tróg,
dochumaid Abisolón.
6925] Asbert Iob, bascél treith,
fiadintslóg mór, friDuid:
'ragab bás baide fobrón
dochaine Abisolón.'
6929] IArum rogab aríge
Dauid con-ilur míle,
uair dorochair leis icath
Abisolón slógbuadach.
6933] Dilliud for Duid dána
con-immud cechdrochdála,
Abisolón díandiumsaig
ríanarian dorodiúsaig.
Dorodiúsaig Día amac.
p.102