Corpus of Electronic Texts Edition
Saltair na Rann (Author: Unknown)
poem 118
118.
6765] Tinolsat deimni teclai
slúagai sergi Sirecdai,
cotolcaib nator talc, trén,
doorgain mac n-Israhel.
6769] Dodíbad tuath itraiti,
dochrínad uad Affraice,
cotindrud natriath, torm tenn,
dohindriud Hierusalem.
6773] Forrogellsat iarfír fecht
noragtais itír n-Egept,
cobrath natargtais díatig
cor'airgtis Alaxandir.
6777] Focart dóib Dauid derb drúad,
fosropart inserb slegrúad,
combátar lanaib lerggaib
donasrábaib srebdergaib.
6781] Ort dib Dauid, delbda drech,
deichmíli derbdai traigthech,
ocht cét córad carpat cruaid
cethorcha míli marcsluaig.
6785] Inrí doruásat cechríg,
rí cenguásacht, cendimbríg,
ríanDauid trén derbdai raind
dosrat hirén romadmaim.
6789] Slúag naSerda, sretha drong,
frifúam febda faebarglonn,
lethnaib, lúathaib, lúardaib lac,
trethnaib túathaib tinólsat.
Tinólsat deimni teclae.