Corpus of Electronic Texts Edition
Saltair na Rann (Author: Unknown)
poem 105
105.
6265] Bóe Dauid ré mór foleith
fofuacru, foinnarthaib,
fodichruth, foclére greim,
indithrub slebe Carmeill.
6269] Icailltib Séb, srethaib sleg,
imrulaid Dauid tonngel,
isleib Síon immallé
isindithrubaib ainge.
6273] Secet caini gascid glain
diocaib friimmargail,
doDauid iarfír frifraiss,
bahé alin foralongais.
6277] Bantrocht coem, corcarda, cóir,
conatimthaigib dergóir,
drong n-ingen, drong ngilla cert,
friatindrem, friatimthirecht.
6281] Friseilg, frifiadrad fogrâd,
cenmeirg friciallrad comlán,
conafein húathmair cenlén,
fortúathaib mac n-Israhél.{folio 35 a 2}
6285] IMsliab Carmeill docachleith
cengarbgreim friachomaithcib,
bamenic nodechrad dáil
imchethraib n-aidblib Nabáil.
6289] Nabál iCarmill rochlos
gabál gremma icomaithcheos,
balcbethraid osbetha blá,
aittrebthaid indithrubá.
6293] Abigail, glan agreimm,
ben Nabáil slébi Carmeill,
set suthach, slicht nádchelar,
banscal cruthach coemtrebar.
6297] A almai aidbli cenmeirb
imCharmill docachoenleirg,
míli dogabraib frigleith,
teoramili docháireib.
6301] Dochúas oDauid coathech,
inbaid lommartha cairech,
coNabál frigabáil nglé,
diaglanáil imfeis n-aidche.
6305] Araburba friaig thaig
isarchumga amenmannraid,
Nabál sin slebi Carmil
rofemid immoenbargin.
6309] Coic muilt, dacét mbargen mbil,
dacét mías docharicib,
daphaitt fína, iarset sid,
ruc inben lee doDauíd.
6313] Cethrib cétaib gilla cain
iarsétaib friimmargail,
conarmrath tánic 'nadáil
Dauid domarbad Nabáil.
6317] Ferais inben fáilti fris,
friDauid cennach n-eisleis:
'cucut tucsam forset sain,
nifailmet darth'airmitein.'
6321] 'Manithorasta modáil,'
arDauid frimnái Nabáil,
'imbarach 'sinchamair chain
nobíad Nabál cenanmain.'
6325] Nabal nemnech, gemlech, crín,
attib tadail dorofín:
'sindechmaid lá, líth cenchol,
bamarb Nabál aoenor.
6329] IArsin tuc Dauid cendáil
Abigail mnai Nabail,
p.93
dosrimthos dó Dia donim,
con-innmos, con-innilib.
6333] Inrí robennach sechcách
Dauid frihellach n-ollgrád,
secht dé badichmaig cendíth
isdíthraib imbai Dauid.
Báe Dauid ré mór foleith.