Corpus of Electronic Texts Edition
Saltair na Rann (Author: Unknown)

poem 103

103.


6165] Luid ass Dauid, tolaib rath,
cengáe, censciath, cenchlaideb,
iarcálaib garb rogáel gail,
fácaib aarm 'sindrigthaig.
6169] IArsin dochúaid fochucht cacht
coAchimilech sacart,
cotormalt leis, gleire guir,
bargena réile remfúir.
6173] Cianchacht imchangnib cuirp criad,
roiarfacht Abimeliach,
doDauid r'iarfacht cucht cain,
'indatglain lucht dotheglaig?'
6177] Dorat Dauid teist iarfír
ifrecnarcus indardríg,
cencomrac dó frimná imne
re trilá is teoran-aidche.
6181] Robái cenglorai, cengeis,
claideb Golai 'sindeclais,
fribrig mbladailc fiadcachslóg,
iarnathabairt doSaól.
6185] Roráid Dauid ciarbodalb,
'olcc dul icéin cendagarm,
fritala indrig, rúathar mbras,
domrala triatinninas.' {folio 35 a 1}
6189] DoAchimilech nirb'folith,

p.91

rofer fáilti friDuid,
ocus doridnacht do immach,
claideb Golai gér golach.
6193] IDumeus atchúaid inscél
doSaul ríg Israhél,
Dauid colucht rabolíach,
rochaith bíad Abimeliach.
6197] Nitrúag fúair fáilti fosmacht
Dauid icsluag nasacart,
ocus ruc cenloga leis
claideb Gola ceneisleis.
6201] Luid Saul cechthucht iarmbrath
corágaib lucht nacathrach,
ort slúag nasacart cenclith,
coiciur arcethrifichtib.
6205] Rosnort iarcétrud agleo
in-étgud, ephud lineo,
labruth mbrathlaig, bág amné,
'sinchathraig dian-ainm Noué.
6209] Acht itrulai oenfer díb
corice tegdais Dauid,
Abiathar conablait,
macc Abimeliach sacairt.
6213] Romiscnig Saul, gnim nglé,
Dauid mórmac Iessé,
coforcongrad lais, lethan scél,
nabeth forcrích n-Israhél.
6217] IArnafocra domac Ciss
Dauid nitharat eisleis,
cennachtechel dochuaid ass,
ruc atheged coAchess.
6221] Roimraid cách fiad indríg
intrath dodeochaid Dauid,
'innhé seo inclí glanna
Dauid ri natalmanna?
6225]
'In dosom labras inslúag
nan-ingen n-amnas n-adrúad:
'ort Dauíd derb deichmili,
ort Saúl serb óenmíli?'
6229] IArsin rongab galar gér,
frisním calad nirb'imthrén,
corochumscaiged achíall,
cotunscanad (sic) cachn-anríad.
6233] Cororaid Achis triasním,
niharaithis forDauíd;
'berid uain cenmíad immach
induini ndían ndásachtach.'
6237] Luid Dauid, linib aslog,
hitírib minib Maob,
con-aes lathair, con-aig thaig,
coamáthair is coathair.
6241] IArsin roaittreb coog
indess im-Maffa, im-Moób,
brig bladmar rogab Maffa
primadbar indfirflatha.
6245] O roathain fiad inslog
aathir forrig Moob,
foIsrahél, ilar crích,
iarsin ass doluid Dauíd.
Luid ass Dauid, tolaib rath.