Corpus of Electronic Texts Edition
Saltair na Rann (Author: Unknown)
poem 102
102.
6105] Dorigni Dauid, deilm n-án,
comarle ocusIanothán,
imdul cencleith frigail gúir,
cenbeith itegluch Saúil.
6109] Roraidi Ionathán fris:
'Saul natabair d'eisleis,
an frit'gairm ifail sunn sel
naclochi dian-ainm Ephel.
6113] 'Cofesser friselba síd
inmaith frit menma indardríg.
indeil dúrchathach natres,
no'ndúthrachtach frit'amles.
6117] 'Dotrua comarda uaim,
bid sodamna frit'banbúaid.
p.90
imdul reut, recht ngúr ngle,
nothecht arcúl dorise.
6121] 'Fochuriub uaim saigit snéid,
féig friglaineilc frit'glanchéil,
airet rosso, réim corath,
cid icéin nofaicserad.
6125] 'Mad hicein chingges cenchess
ber cheim cinnes dot'lanles:
menipcían frisoirchi sain
toirchi codían dorígthaig.'
6129] Dochúaid Ianothán istech,
cosindríg, cosinteglach,
condessid censil ndogra
innasuidiu rigdomna.
6133] Roiarfacht Saúl frisním
d'Ianuthan scéla Duíd:
'ciabaile ifail, delm nda,
dofer comtha comdána?
6137]
'Ciabaili ifail immaig
drochmac Iesse angbaid?
nithoracht fiadnachdrung tra
sunn in-oen naláasa.'
6141] Atchuaid Ianuthán, án aig,
dondrig rán innarígthaig:
'dochúaid, cendechel, deilm tra,
diathreib, doBethil Iudá.'
6145] Roráid Saul frisnuad sess:
'cia istslúag nádigni m'amles,
tan istussu rogni inse,
adrochmeic namerdrige?'
6149] Dochúaid Ionothán immach
combái formúr nacathrach,
feib nognathaiged cendíth
dús inrathaigfed Dauid.
6153] Focheird cenlén onmúr 'maig
airchur trén forsinn-ailig,
segda, sodalbtha, slicht nglé,
icomartha cumnigthé.
6157] 'Máta nech iconcloich thall,'
arIonathan nírb'imgann,
'orthad colúath, táet cotricc,
isléced uad insaigit.'
6161] Rí roleth brat nimi náir
imthoebu talman tonnbáin,
ocus gréin ngúir conalí,
diaréir cachduil dorigní.
Dorigni Dauid, delm n-án.