Corpus of Electronic Texts Edition
Saltair na Rann (Author: Unknown)
poem 101
101.
6053] Bái Dauid 'sa druim frifraig
fecht fiadindríg 'sindrígthaig,
focháinbuide nandrong ndál,
in-oensuidi isIonathán.
6057] Luam laidi fochaini cruth,
gengaili ocairfitiud,
dondríg, dontslúag, centeidm tind,
icseinm athimpáin téidbind.
6061] Dauid indratha, réim saer,
bafotha flatha fírnoeb:
sephain seol salmda osbla,
baceol n-amra n-adamra.
6065] Basegunn séim ascechmud
archruth, archéil, archoibliud,
lasinsluag sóer, soismert sid,
bind leo coistecht friDauid.
6069] Ciarboairfitiud lacách
linib tairchitul ndermár,
iarsét slemun, sechinslóg,
dochoid Demun iSaól.
6073] Sreeis Saúl uad insleig
forDauid isindrígthig,
triachlár cruaid itoeb achinn
robidgc ingái gluair gerthind.
6077] Atraracht inslúag istaig,
batoracht núall integlaig:
indar lacach gae indríg
robáe triamedón Dauid.
6081] Atraracht Ionathan ard
coruc reim ruanaid rogarg,
cor'idnacht Dauid, toem nglé,
uad coóen nafidbaide.
6085] Rochathaig cogarg, combríg,
friaathair, frisinn-ardríg,
rangab guba, rochlói cruth,
ardula diasarugud.
6089] Ferais Míchol debaid tinn
friSaul, friAchinoim,
nochor'bo choimsech acath,
batoirsech, batromdebthach.
{folio 34 b 2}
6093] Ferais inslúag athber ngúr
forsindríg ruam, forSaúl,
adul censamsúgud sid,
diasárugud imDauid.
6097] Mac Sauil slaide glonn ngal
badúscud lonn leoaman,
rosoer cenchíabair cachta
achlíamain, achomalta.
6101] Ri rodnanacht forsinmaig,
cenámarc ondleoamain,
hé rosáer cenbuide indríg
isintsuide imboe Dauid.
Báe Dauid 'sadruim frifraig.