Corpus of Electronic Texts Edition
Saltair na Rann (Author: Unknown)
poem 76
76.
5165] Treb Iuda, treb Semeoin séim,
ocus treb Beniamein,
siarthuaid ontsruth tana thren
cocricha mara Torrén.
5169] Lethtreb Mannase centáir,
treb Effraim, treb Issacháir,
atuaid cechndiriuch dontsruth
frisiniud, frisuidigud.
5173] Treb Neptalim, noithech scél,
ocus treb áibnech Assér,
cechcruth rognisset ambuaid
dontsruth rosinset sairthuaid.
5177] Treb Zabulon slaides feirg,
ocus treb Dán daigerdeirg,
acuir friglanaige ngluair
p.76
omuir Galaile sairthúaid.
5181] Treb Ruben, treb Gaid nadchress,
fograd frisruth anairdess,
nocomeirtnech amasse,
ocus leithtreb Mannásse.
5185] Dondleith anair dothreib Dáin
sernait sreith slébe Lebáin,
frislatbrig slaidi sluaig sréin
icaccrich uaig Israhéil.
5189] Annaneos, nuall nadchres,
Sidarios, ruad riges,
Echeos, glere cengráin,
trisluaig sin slebe Lebáin.
5193] Ebron, Gassear, Masheal már,
Gabaa, Gesseon, Galád,
sé cathracha attaig úaig
clainni Israhéil adruaid.
5197] Ri dosfuc triadíthrub trén
istrisindsruth n-Eordanen,
ri congart cóir cotagaib,
dorotacht doib cechoentreib.
Treb Iuda, treb Semeoin séim.