Corpus of Electronic Texts Edition
Saltair na Rann (Author: Unknown)
poem 75
75.
5121] Roraind Essu, airdirc scél,
dosluagaib mac n-Israhél,
indiraind déc, deilm dána,
secht primthuatha Cannána.
5125] IMraind atíri d'espaib
dorigset mor d'imresnaib,
conidcrannchor roscoraig
fornatuathaib dermoraib.
5129] Cetnacrann iarcuimnib cein
babúidnib Benieméin,
isnadálaibse iarséol
intánaise laSemeón.
5133] Suidid intres, bagnim cóir,
lasíl suilig Zabuloin,
incethramad, gnimraid graid,
laclaind n-irglain n-Isachair.
5137] Incuiced crannchor, gnim gér,
laglanthor cinid Assér,
insessed crannchor iarseing
dochlainn noithig Neptalim
5141]
Insechtmad crannchor laDán
iarcertrad glannchor comlan,
int-ochtmad glanbda, gnim ngrinn,
laciniud n-amra n-Effraim.
{folio 32 a 2}
5145] Innómad laGád cenchess,
conág frisruth anairdes,
indechmad crann d'Iudas diadeoin,
isroga rann laRubeoin.
5149] Treb Mannase, mílib gne,
rorannadside hicerde,
frisruth aness fofuair greim,
al-leth n-aill tuaid icEffraim.
5153] Treb Leue, colinib scél,
fothírib mac n-Israhél.
cennachngaile, congrad glé,
frisoere, frisacerdote.
5157] Indeclas nóeb conaairc
rodosuidigthi in-oenailt,
frisilad saincomnart slán,
fritaircomrac acomdál.
5161] Secht primthuatha Cannáin cain
fallain conafortuathaib,
eter sessu nasluag soimm,
dorigni hÉssu ingléraim.
Rorainn Essu, airdirc scel.