Corpus of Electronic Texts Edition
Saltair na Rann (Author: Unknown)
poem 74
74.
5077] Tinolsat tor tolach talc
corad comfossad comnart,
arcind túaithi Dé dochath
secht tuatha Cannán cathach.
5081] Clanna Cannan gniset cath
frituaith Dé, dúr rodelbad,
coroclaithe fobrig bróin
icrichaib broga Bethróin.
5085] Tan turcbad Essu adiláim
friCoimdid nime noebnáir,
nomaided incath granna
forsecht tuathaib Cannána.
5089] Tan bascith lais, lathar ngrinn,
adilaim icrosfigill,
dossleced hIessu friathoeb
foramuintir bafírroen.
5093] Dorónsat toisig intslúaig
comairle nglicc conglanbúaid,
rosuidigset folama
dicloich tréna dermára.
5097] Romebaid incath iarsein
ocus roscail indimguin,
nirb'hanad díb, derb inrad,
coralád huili andergár.
5101] Coromarbtha na secht ríg
conasluagaib, slocht 53 ndirim,
cechoenfer beo, torgbad dail,
dochiniud clainni Cannáin.
5105] Doaitne ingrian frisinslóg
dondleith aniar darGabón,
nisgluais rosmbai innatass
frirae dálathi lanmas.
5109] Tarrasair intsoillsi dil
iartimnu Dé donoebnim;
fir sluaig Cannain comtarmairb
nirosluaid asindoenairm.
p.75
5113] Andorigni Dia donim
dofertaib, doadamraib,
ardainib frihuair mbáge
atdirecrai, díárme.
5117] Na secht rig réil, reim ruanaid,
congail géir commórslúagaib
buadaib, bagaib, brigaib blat,
tuathaib, tírib tinolsat.
Tinolsat tor tolach talcc.