Corpus of Electronic Texts Edition
Saltair na Rann (Author: Unknown)
poem 70
70.
4929] Rádid Moisi menicc dóib,
huair basnimach, sruith, senóir,
'Iessu mac Nun, nassad ngle,
fortoisech darm'essese.'
4933] Mosi mac Amra, meic Caid,
meic Leue, meicc Iacaib,
meic Isaic, meic Abraim óig,
meic Thaire dil, meic Nachóir.
4937] Meic Reu rocháin, rúathar ndein,
meic Seruch saer, meic Ebeir,
meic Sale sláin, srethaib gal,
meic Fallech, meic Arfaxad.
4941] Meic Sem sochraid, srethaib iath,
meic nair Noe, meic Lamiach,
meic Mathussalem óscechrot,
ocus meic huasail Enóc.
4945] Meic Iareth, tomthaib triath,
meic maith molbthaig Malalíal,
meic Cainain, meic Enos ail,
meic Seth saindil, meic Adaim.
4949] Adam mac Dé, dingnaib dál,
dorimgair Fíadu findnar,
gle cocachn-eladain n-óig,
sé senathair armorslóig.
{folio 31 b 2}
4953] Dorumalt Moisi, mod mass,
in-oitid, in-oclachas,
iarn-urd riagla, rethaib recht,
dáfichet blíadna in-Egept.
4957] Dafichet aili comblait
iclemnus inprimsacairt,
os sléib Choreb, grata bainn,
forinnarba óForainn.
4961] Dafichet aili, deilm n-uag,
do 'sindithrub riasintslúag,
iartimnu ríg nimi nel,
ocimthus mac n-Israhél.
4965] Se fichit bliadan insain,
cenforcraid, cenimhesbaid,
saegul Moisi, mílib rann,
feib leir adfet inscríbenn.
4969] Inrí rongart lais immach
Moisi crichid glantoisech,
conruc leis ontslog forleth
onduáir thanic aamser.
4973] Oshunn roscarad friaslúag
Moisi con-ilur imluad,
nibae dib nech lasmadbecht
aadnacul no hetsecht.
4977] Mac Ammrai baardrí intsluaig,
p.73
combáig baldai, combithbúaid,
crich aaissi, derrit breth,
Moisi menicc noráded.
Rádid Moisi menic doib.