Corpus of Electronic Texts Edition
Saltair na Rann (Author: Unknown)
poem 64
64.
4717] IArsin tarmairt moDia dil
frisintúaid n-engaig n-anbil
corossluiced talam tenn
acor foleittreib lethglenn.
4721] Raidid friu Moisi cenlén,
menbad Iessu ocus Caleph,
amal én 'mon-iadai sás,
noragdais huili oénbás.
4725] Sét cethrachat lathi lén
fail oshunn cotir Cannan,
rigfidir sét bas mo de
cocenn cethrachat mbliadne.
4729] Nocoría nech dib aréc
donadib trebaib deéc
cocrich Cannan, crichid scel,
acht mad Essu ocus Caleb.
4733] Tír Cannain cofairgi fraig
nista daréis an-ecnaig,
acht marannait, airdairc dul,
formeic iarforn-adnacul.
4737] Rádid friMoisi iarsein
moDia déoda baderbdein,
toimlid forre marcachsruith
dogress ingnais indíthruib.
4741] Menbad Essu, immaid raith,
ocus Caleph cóir, ciallmaith,
atabairt fo thalman tlacht
iarsin moDia dil tarmart.
IArsin tarmairt moDia dil.