Corpus of Electronic Texts Edition
Saltair na Rann (Author: Unknown)
poem 40
40.
3841] Raidid Moisi fiadcachclainn
iarsain iarum friForainn:
'lessaig dosluaig fein foleith,
leic uait athuaith dinCh(o)imdeid.'
3845] Asbert Forainn, forom ngle,
natibred doib asaere,
cofessed cia bad mó nert
anDiasom no dia Egept.
3849] Dogniat druidi indríg,
triabrichtu ainble anfír,
nathracha colúath donflaith
dolbsait afuath díaflescaib.
3853] Dorigni Moisi, mod ndil,
in-anmaim indrig donim,
labrethir nDe fiadflathib,
diafleisc combaglenathir.
3857] Nathir Moisi fuabrad cath,
frinathracha nandrúad,
istig arbelaib indrig
dodasfuaid cosinn-oenmír.
3861] Gabais anathraig dolár
Moisi fiadintaig lomnán,
noscroith, nodosai ifleisc,
lasinslog, robomorcheist.
3865] Moisi minn osbetha barc,
hua Iacóib meicc Isaac,
aaithesc glan, gnimrad ngle,
isdoreir De roraide.
Roraid Moisi fiad cachclainn.