Corpus of Electronic Texts Edition
Saltair na Rann (Author: Unknown)
poem 34
34.
3661] O shunn atbath Ioseph án
nismboe saere nosaergrád:
fir Egept, comeit cloine,
dosratsat fothromdoere.
3665] Rodosdairsatar diaréir
iarn-ec indamrai Ioseiph,
daire amlaid, eraim nglé,
nitharlaid forbith buidé.
3669] Mor dochlainn, batrog inscél,
beirthi dislog Israhel,
cosuilib dessaib, deilm ndil,
conbendais assacennaib.
3673] Mor dacechulcc, nabucert,
fodaimtis fosluag n-Egept:
nibai dóere badteinné
comarbdais aprimgeinné.
3677] Ciarbothromm andoire dacht
robae anDia 'coafortacht:
inmet fordingtis intsluaig
forbartais incachoenhuair.
3681] IOseph mac Iacoib áin,
meicc Issaic, meic Abaraim,
dorumalt, fririagla recht,
deich fichit bliadna in-Egept.
3685] Dochuaid forcel, cluithi cin,
forslicht sen súithi soerdil
facbaid dámac, maith angraim,
Mánnases ocus Effraim.
3689] Dorumensat cach fosmacht,
fosrugensat fir Egept,
diambúaid, diammathius, diamiad,
cosinn-uair atbath Iosiaph.
O shunn atbath Ioseph án.
p.54