Corpus of Electronic Texts Edition
Saltair na Rann (Author: Unknown)

poem 33

33.


3533] Dorigset comarli cóir
maccrad amra Iacoib,
andul iarfithisi fecht
doridisi itír n-Egept.
3537] Dochuatar iarsétaib slain,
cenbétaib cethirn comlain,
cotren tluachtar darcachtír
coruactar cosinn-ardríg.
3541] Fuaratar colór cenhír
fáilti mor icondairrig,
feib bamellach laceill cóir
rosmbái cennach fochetoir.
3545] Gabais Ioseph escra n-úag
atnaig il-laim fir diasluág:
tabair triahaccail diambrath
isaccaib naCannanach.
3549] Nidimraig lotar diatír,
nibdardimdaig dondairrig,

p.52

feib roellacht doib cechtriall
bai ambennacht forIosiaph.
3553] Tan batar nalíni arinmaig,
amal bid míli onchathraig,
rodlong, nimebul diadail,
drong dremun dian-irgabail.
3557] Nibtar foichligthi fritóir
rocroichligthi fochetóir,
tuctha codúra donmaig
foracula donchathraig.
3561] Tuctha coneoch rostechtai,
'nacimmidib cumrechtai,
batrúag afatal cenbríg
combatar fiadinn-airrig.
3565] Frisrogart int-airrí dóib
roraidi friu fochetoir:
'truag dodail farcuire ngle
farngabail uili icmeirle.
3569] 'Uair libsi, ni lathar ndil,
inmeirli cenimressain,
infarcin clothach asbiur
forcrochad cosinn-oenfiur.'
3573] 'A airri Egept cenchess,
rosatglechert friarlanles,
niclothach dot'búaid, dot'blaid,
trúaig dochrochad cenchinaid.
3577] 'Niheol dún, ciacol fogin,
dur dron doBeniamein,
fonralaig mairb mesctha mir
dodalaib indescrasin.
3581] 'Fortgellam cech nduis, din cert,
it'gnúis, aairri Egept,
arn-idain, fiadtestaib Dé,
dochinaid indescraise.'
3585] 'Tucaid dochind forn-anma
uaib aitire n-eramra,
farn-ósarbráthair fodéin,
dianid comainm Beniaméin.
3589] 'Éirgid iarforsetib snéid,
isleicid Benieméin,
huair isleis, lith cesta ngle,
frith escra naEgipte.'
3593] 'Ossar naclainne, gnim ngle,
fir foxal fainne fíre,
issé isdiliu diarslog
liarn-athair, laIacób.
3597] 'Guidmit ní, menipgrain lat,
dii, aairrí nahEgept,
cia rondairane dot'réir,
coronsaera Beniemein.
3601] 'Mad marb duini fonim glass
dochumaid, isgnim n-amnas,
bid marb Iacob fodein
diachainiud Beniemein.'
3605] 'A maccrad Iacoib áin,
frigartrad dochlainn Abráim,
cenchlothchobair, cennach mblaid,
dorochrobair forcinaid.'
3609] Rorelsat ascel cenbríg,
roslechtsat fiadinn-airrig:
'fortgellam Dia, dana de,
darslana onchinaidse.'
3613] 'Tabraid forcobais centláis,
rad forais riandig tiugbais,
failsigid fornech nith mbras,
dorinnsid gnim n-imamnas.'
3617] 'Ciambadlonnbrass digal Dé,
fornn bacomadas friarcloenré:
coir ciaroncrinad colár
icinaid artargabal.
3621] 'Ronbaidsemmar, bagnim trog,
rocraidsemmar Iacób,

p.53

romertsam coem diarngnáthaib,
rorecsam arn-oenbrathair.
3625] 'Atmora arcinaid donbrath,
nidarn-idain diarsóerad:{folio 28 a 2}triallamm arn-aided, scel ngrinn,
tiagamm fochlaideb ngérthind.'
3629] 'Nirbochoir dam formbádud,
fota ataid in-imgábud,
targa fortacht De fortóir,
achiniud amra Iacoib!
3633]
'Bidbann buada forarndáil,
ahiarmhui uagdai Abraim!
gengnim ngessi, triadil ngair,
iss messe rorecsabair.'
3637] Rodosmachtaigset foalaim,
roattlaigset acomdáil,
sníset cocóir acainti,
rochisset armorfailti.
3641] 'Fuapraid cotenn, nibartroig,
eirgid arcenn Iacóib,
cenlen, islethan forcert,
tren fortrethan in-Egept.'
3645] Ri dafuc atúaid iartain
Iacob conamaccaib,
dialotar fodess forfecht
foainm Ioseph in-Egept.
3649] O sunn rancatar fodes
coIoseph hicomaithches,
ani badech docachthreib
dorat Ioseph díabrathreib.
3653] Robai Iacob, bagnim cert,
censním itírib Egept,
malle friachlainn conamblait,
dábliadain arsechtmogait.
3657] Mori coragrad ochéin
dofuca Abrám oChalldéib,
hé cotnarlaic iarcóir cheirt
doib anisin dorigset.
Dorigset comarli cóir.