Corpus of Electronic Texts Edition
Saltair na Rann (Author: Unknown)
poem 30
30.
3377] Ri tríarath doraiga ochéin
triaimcasin réid roréil,
combai Ioseph, lín asloig,
ósEgeipt uasail ardmóir.
3381] Secht mbliadna lana mole,
sommá, slána, sonaidé,
ógab Ioseph gloir garta
coaimsir namórgorta.
3385] Fotroirgell, bagnim cialla,
Ioseph cocenn secht mbliadan,
nagebad, cidmor insmacht,
etach, nahor, nahargat.
3389] Nigébed Ioseph nachfiach
onatuathaib acht madbiad,
caingnib cainib, ciniud cert,
diadliugud doríg Egept.
3393] Rothinolad lais insain
nafuair frisna secht mbliadnaib,
'naduinib trénaib daingnib,
innaindsib eradblib.
3397] Dosrocht gorta garbda, garg,
dosrort frifodla fodard,
rodascrin cenchoimsi cruth,
roslín toirsi isderchainiud.
3401] Doratsatar uili arbiad
tuatha Egept doIosiab,
cidmór rothechtsat fosmacht
eteror ocus argat.
3405] Doratsatar féin dondríg
andoire dochinn ambíd,
natiastais aidid ngorta
innalainib lomnochta.
3409] Rosbiath Ioseph sechcachclaind
sloig fer n-Egept imForaind
fogne riagla, ruathar n-án,
friré cóic mbliadan comlán.
3413] Rosbiathastar fiadcachsluag
cenrad friForainn findrúad,
sé cét dec mili, mod ndil,
arfichit cet domilib.
3417] Cenmothat dala dligid
aes dana ocus primfilid,
druid diana docachmaig,
cruitti clíara, clesamnaig.
3421] Cenmothat mogaid, mod cert,
sluag soraid fritimthirecht,
p.50
ismna bana, buidnib blá,
meicc ána ocus ingena.
3425] Cenmotha insluag roslin mairg,
natuath trúag ascechoenaird,
tictís iarn-elluch fosmacht
dochennuch itír n-Egept.
3429] Rí rombennach oscach maig,
cenon, cenolcc, cenerbaid,
gorbomál cach maige móir
Ioseph án mac Iacóib.
{folio 27 b 2}
3433] Ruiri richid, Rigda gáir,
crichid cachcuirid comláin,
arcli fricath oscách blái,
inri triarath doraegai.
Rí triarath doraega ochéin.