Corpus of Electronic Texts Edition
Saltair na Rann (Author: Unknown)
poem 26
26.
2817] Ri dorat d'Abram insin
frisilad, frisírtuistin35,
isairdirc, fobetha barc,
mac diarbochomainm Isac.
2821] Ri dorat d'Isaac, babuaid,
ocus doingin Bathuail,
uaidib genatar, lith lor,
Issau ocus Iacob.
2825] ISsau slechtach, slicht imracht,
roboserccach laIssác,
isIacob, con-idnaib ail,
ropoinmain líamathair.
2829] ISsac fridead n-aissi,
glead gnima glangaisse,
badluim degóir, dramm datta,
basenóir dall dinerta.
2833] Rogaid séire foramac
cenleire, linib legart,
forIssau cofargbad ail,
cotarddad abennachtain.
2837] Bai Rabecca iccloistecht fris,
ingen Bathúail ceneislis,
coruc ahoscor coglan
dochosnom nabennachtan.{folio 26 a 2}
2841] Inhed bái Issau ictriall immach
'sin sliab iarfír frifiadach,
doluid inben triahet n-og
cotrét nooisce Iacob.
2845] Goromarb menn moeth immaig,
rodmberb fofeth dolubaib,
gnim dían conglére imracht
corothriall sére d'Isaac.
2849] Rofuaig crocenn inmind móir
triabáig imlaim n-Iacóib,
fochosmailius lama Issau,
gnim dana ciarb'immargú.
2853] Rolathair coluath, lith n-og,
amathair doIacob,
asraracht centreithi tracht,
cotarat seire d'Issác.
2857] Tan rucad intsére dron
coIssaac diachubuchol,
richt Issú sluagach, slicht n-óg,
bahuamnach laIacób.
2861] 'Fail sunn sére sainglicc sláin
p.42
duit, ameic airdirc Abráim,
laIssau saergrinn, srethaib sluaig,
lat'mac n-oebind con-ilbúaid.'
2865] 'Nician bai hlssau icseilgc,
manidgau dó triachoemcheilg,
mochthánic astsleib isgle
mase thuc insérese.'
2869] 'ISme dorigni inseilgc séig
forsinchétnaleirg dontsléib,
fuair hifocus, gleiri gair,
adbar seire dom' athair.'
2873] 'Nabi icimrigi forbuáid,
ameic ingini Bathúail [excl ]
nithu Issau semnach naslóg,
acht istú int-engach Iacób.'
2877] 'Nacathaig frim, asruith ran,
aathair, ameic Abram,
frit' seircc ngraidgrinn ismé Issau,
fritt niráidim immargau.
2881] 'Tuc huait friimdel n-achtach
dam doláim dialámachtad,
cofessur cogle ingnim n-óg
inhe Issau no inne Iacob.'
2885] 'Gia dobér molaim it'laim,
nichel, atu hit' choemdáil,
atatgen, istú rommalt,
tren dogní mochumtabart.
2889] 'DomacIssau, irgna buaid,
ocus ingen binn Bathuail,
doig ambith foaengne gle,
coir doib ciabtis cosmaile.'
2893] 'Bess isshé Issau, slicht n-og,
bess noconhé Iacob,
bess isglé m'esbaid im'gaes,
bess ismé fil fortogaes.'
2897] Senfoccul sein ochéin móir,
lacachsruith, lacachsenóir,
nimedar mall immasech,
achtcorbdall bidamarsech.
2901] Duni truag, docharda, dall,
loburda, lubrach, lanmall,
olcc athairsin imgaes ngle,
iarscaichsin achétfaide.
2905] 'Tomail inséire soer, sláin,
anoeib, ameic ain Abraim [excl ]
hith dochuit frit' gnássad nglain,
duit ropsásad sainemail.'
2909] Dorumalt Isáac iarsain
inséire cosobarthain,
tuargaib adílaim atraig
isródail abennachtain.
2913] inib glangrad, cruth imracht,
eter Abram is Isaac,
inbennacht targbad dontslóg
cotarddad do Iacób.
2917] Dasechtmbliadna, cenbaes mbroin,
issed bái in-aes Iacoib,
cain adrann cachtucht rothecht
intan ruc inprimchinnecht.
2921] Huair dorat inséire sáim
diaathair domacAbraim,
arhuamun abráthar diabrath
nifitir cid dogenad.
2925] Asbert fris amathair maith:
'heirg forteched riat' brathair,
caemgnim caindelbda cengrain,
cotreib lainderda Labain.'
2929] Luidis Iacob conabuaid
dothig Labain meic Bathuail,
bacain condolbtha cenbrath
inbaid lommartha cairech.
2933] IArsain condasfuair immaig,
itoeb indliss lainnerda,
diingin congili andath,
p.43
cenbini ocnigi acairach.
2937] Até batar ann fofeib,
fiadchuirib clann ocáireib,
imgil, cenglora, cengrain,
díingin lola Labain.{folio 26 b 1 }
2941] Roraid friu ingilla combúaid:
'cia airm sunn fil mac Bathuail,
brathair momathar, mod n-án,
fer dianidcomainm Labán?'
2945] IArsin fersat failti fris,
risinngilla ceneislis,
luid indaranai, bareim ran,
diahinnisi doLaban.
2949] Atraig Laban, línib gal,
'mach arcenn meic ashethar:
ferais frais forfailti fris,
dambeir friaais diathegdais.
2953] Rothairgid Laban lán-log
aringaire doÍacob,
cach huan bec badubbrecc dath,
cach uan liath, cach uan alath.
2957] IAcob nosernad sreith
isnahoimrib uiscidib,
flesca beca, brecc andath,
arambelaib nacairach.
2961] Natreoit chairach immasech
icfegad naflesc finnglan,
datha naflesc cotagaib
hed nobid forsnahuanaib.
2965] Tuc adiingin iarsein
Labain, lór cenimressain
iarnathimgaire frihail,
d'ingaire caire Labain.
2969] An-anmann cengnim caire,
radait auctair ecnaide,
Lia ligda, linib gial,
ocus indrigda Rachíal.
2973] Bái inailt incechtarde
ocnasethraib sochraide,
an-anmann, cenmedra mael,
Bala ocus Selpha sochain.
2977] Robatar uli mále,
etir sethra is hinailte,
cengrain, iarcomdeddaid choir,
icomlepaid oen Iacoib.
2981] Bertait cethri meic fothri,
dó fribríg bailcc foglanli,
ochtur onasethraib sreith,
cethrur onahinailteib.
2985] Cuit cachamna dib foleith
diaclaind choir inacomsreith,
feib rosern rí run cachcruth,
isferr dún andeligud.
2989] Semeic la Lia, linib gial,
ocus damac roRachial,
rí bethra bailcc rodascar
cethra maicc nadacumal.
2993] Ruben, Semeon, Leui lor,
Isachar soer, Zabulon,
Iudas iarnDia centerce (?)
sé meic Lia liuchdeircce.
2997] Neptalim isDán dana,
dámac buadacha Bala,
Asser isGad, delbda dé,
da mac Selpha sochaine.
3001] IOseph an, aurdairc ochein
ocus inbán Beniaméin,
rogabsat cathairi gíal
damac rachaine Rachial.
3005] Dámac dec sin, cennach gráin
Iacoib hui Abaráim,
p.44
conandechraib incachthreib,
conacethraib máthrechaib.
3009] Sechtmoga bliadan bai túaid
ifail Labain meic Bathúail,
corothríall diathir, din cert,
conadibmaccaib déec.
3013] Tan tánic Rachial atúaid,
ingen Labain meic Bathúail,
dorigni thargleo triabrath,
tuc lea lamdeo áathar.
3017] Doluid Laban lonn 'nandiaid,
etermag ischaill issliab,
condastárraid, cenchess ngle,
tess immedon intslebe.
3021] Maratchonnairc Rachial rán
ingen lainnerda Labain,
luid as forleith, lathar ndu,
amal nobeth friidnú.
3025] Dorat Rachíal chorcra, chaem
lamdeo aathar sís fotaeb,
roclos agol, rochlai dath,
amal mnai beth iclamnad.
3029] Romert Laban, linib gial,
indaban forsrabi Rachial,
nirbobés leo, luth n-alta,
lamachtad mna lamanta.
3033] Ferais Iacob combúaid
failti móir frimac mBathuail,
conarlaic do, congrad gle,
siriud slán nasaccraide.
3037] Huair nafuair alamdeo ann
bai inbangleo nar'imgann,
tuargabad leo forsinmaig
carnn comluga iscomchotaig.{folio 26 b 2}
3041] Carnn inchotaig sin lacách
cennachndíl cocaid cobráth,
eterchlainn laind Labain lóir
ocus clanna Iacoib.
3045] Aingel De thimgair cachslog
bai icimguin friIacob,
rofersat cath, comul ngle,
cenbath arfut nahaidche.
3049] Rodbi int-aingel saer, nisneid,
Iacob sechbil asceith,
isósain, aidbligthe inscél,
roainmnigthe Israhél.
3053] Luid techt con-ascadaib húad
oIacob, cain int-imlúad,
coIssau soid, basliucht ngle,
dobith doib 'nambráthirse.
3057] IArsain rotharngert Issú
cain glanbert, nihimmargau,
ambith cenances, nadchres,
'na cardes, 'nacomathches.
3061] Cenolcc, cenfingail, gnim ngle,
iartimnaib nambrátharse,
cenmeingg, cenmebuil, cenbrath,
cendebuid, cendolbanrad.
3065] Meicc Iacoib ilar ambla,
hit meicc sethar doDina,
Sechim mac Ammoir, triabrath,
romarbsat lucht achatrach.
3069] Dásecht mbliadna bai ifus,
forecht riagla, fochádus,
corothimart, cota mert,
dó thochta itír n-Egept.
3073] Ri doraega, digrais gair,
Iacob húais sechabráthair,
conid diaclaind, crichid scel,
dáthreib dec mac n-Israhel.
3077] Mac-tharngertaid De donim
p.45
bagart glangeltaid coemdil:
isbreo osbri nan-abb n-án,
inrí dorat doAbrám.
Rí dorat d'Abram insin.