Corpus of Electronic Texts Edition
Saltair na Rann (Author: Unknown)

poem 24

24.


2737] Rochomarleicsetar iarsain
airig sil uaibrig Adaim:
'ropadferr dun, tola gle,
techt 'narcorp dochum nime.
2741] 'Turcbam tor ndermor olár,
denam friDia comthocbal,
gniad cach huan immasech,
beram conoibi nemthech. {folio 26 a 1}
2745] 'Acht rissam nemthech ndaingen
in-oentaid nanoebangel,
nirtora diliu, tren all,
isdemin nachhepelam.'
2749] Forcongair Nemrúad forcach,
conglonnaib gelgrúad coemrád,
athuidmi, frigaile ngair,
frimuinbi maigi Sennair.
2753] Sennar mac Sem, srothaib iath,
hua doNoe mac Lamiach,
sechtmad mac fichet Seim slain,
oroainmniged mag Sennair.
2757] Dorinolsatar intsluaig
dogním tuir noithig Nemruaid,
túargabad, batren indail,
coriacht súas osnanélaib.
2761] Inri nadrelic doib sain
rostairmesc tria hilberlaib,
conatucad nech cogle
cid notharged diaraile.
2765] Ri dorat oenberla doib
riacumtauch intuir Nemróid,
roemnastar doib triagart
comtar ado sechtmogat.
2769] Ri dorigni scail intsluaig,
hé rothairmesc tor Nemruáid,
dochuaid glaini ahergnai
dochoemthecht achomberlai.
2773] Ri rodechraig claind Adaim
archéill, archruth, argradaib,
nihairim claen, cain insmacht,
dachenel saer sechtmogat.
2777] IArcomarlib Nemruaid nair
cosonardib nasaerdáil,
cenlen istrén rodamert
inscel rochomarleicset.
Rochomarleicsetar iarsain.