Corpus of Electronic Texts Edition
Saltair na Rann (Author: Unknown)

poem 23

23.


2693] Rogenair fer maith combuaid
fonél cachnaith Nemruaid,
focan scel cachdrung dualaig,
robotrén foriltuathaib.
2697] Nemruad sein, mac Ceo, meic Caim,
tuargaib agleo comorgin,
gnim tuir othalmain cenmeth,
corissed lais inriched.
2701] Ropomilid, milib gal,
ropfoglainntid, ropfelsam,
ecnaid ermaith cachdana,
ropóhergnaid ilgrada.
2705] Lais cetnaairnecht insain
arthús dochlannaib Adaim,
athomus coglé conglain
indre eternem istalmain.
2709] Doroemaidir, bith combuaid,
anair, siar, fodes, fothuaid,
tirib, tuathaib, tolaib sreth,
mílib, stadib, linib leth.
2713] Senchaidi sil Adaim ain
targclamtha lais in-oendail,
scela dochein leo roclos,
feib réil rolathi aPardos.
2717] Feib rothimgair Can cíar
cetnafingail forAbíal,
feib rodiglad, scél doléir,
forsil Seth, forclaind Caen.
2721] Acht Noe aochtur fobrón,
'nahethur luchtmar lermór,
clann Can, sil Seth nasen,
dorigni indiliu andilgen.
2725] Frithalem rig nimi nél,
flaith cachafini firthrén,
nitharda fornn, delm triagail,

p.40

digail seirb seirgthig samlaid.
2729] 'Gabaid mochomairle nglain,'
arNebrúad friclainn Adaim,
'forbeir fornem, nassad ngrinn,
ocus nobsaerfa ardilinn.'
2733] Maithgein mairre mo cachmiad,
cathgeib congaire goríad,
ingrian gluair goires cachngair,
cenmair tuaith diarogenair.
Rogenair fer maith combuaid.