Corpus of Electronic Texts Edition
Saltair na Rann (Author: Unknown)
poem 19
19.
2565] Foidis Noe incolum nglan
uad forinlinnmuir n-allmár,
dus infagbad, hérimm ngrinn,
talmain trein tarbaig tírimm.
2569] Focheird incolum cuairt ngle,
iartimnu, iarforngaire,
cotoracht inn-aircc cenbrath
nifuair ait forstarrasad.
2573] Roreraig Noe uad alaim
arcenn incolaim coemnáir,
cotuc cucai amuig, mod ngle,
combai im-medon nahaircce.
2577] Combái Noe sechtmain iarsain
centaidbsin, cenimcasin,
dibith buan acht fairggi fraig
dithuaith nótir no talmain.
2581] ISsindochtmad lathi lainn
fóidid Noe uad incolaim,
dús infagbad diachuaird chain
taidbsiu dothir natalmain.
2585] IArtrath nona, noithi máil,
tic incolum 'nachomdáil,
dochum Noe, nassad ndil,
iscroeb dophailm 'nabelaib.
2589] Maritconnairc Noe fodeoid
inphailm ingulbaun indeoin,
roderb lais, lith cennachcol,
dochuaid diliu dondomon.
2593] Roattlaig buidi dondríg
p.38
robáid inmbith conabrig,
arasoerad, srethaib sell,
dothonngur dermor dilenn.
2597] Huair nachtoracht tren infiach
cofis scél domac Lamiach,
ishé fath incholuim gle
iarsain rofaidi Noe.
Foidis Noe incolum nglan.