Corpus of Electronic Texts Edition
Saltair na Rann (Author: Unknown)
poem 12
12.
2021] Saegul Adaim, nirbogair,
cenbaegul cofessabair,
tricha dó, derb bai fó feib,
arnoicétaib dobliadnaib.
2025] IArsin tánic galar glan,
feib tic docach, forAdam,
robái frifeba cachthucht
aben Eua friaiduct.
2029] Rofitir Adam adáil,
roráid fríEua findnáir,
'roscarusa rut isrot'chlaind
isdongalursa atbailim.'
2033] 'Dirsan doDia, toirm nglan,'
arsi, arEua friAdam,
p.30
'nachbisiu fricete 29 ifus,
nachmissi téite arthuus.
2037] 'Monuar isdochloemchlod chain,'
arsí, arEua, 'aAdaim!
missi trúag cennert hifus,
tussu dothecht arthuus.'
2041] 'A Euá gleir crotha glain,
tabair coleir dot'menmain,
nocobia nacein isgle
sunn ipein darm'éssese.
2045] 'ISgarit ciabe cenbrath
re robáe eterarcruthad,
nibia fogriis, isgne ngle.
acht nóimís darm'hessese.'
2049] 'Abbair frim cenlocht, afir,
cid dogéin frit'chorp coemdil?
arisderb lat t'éc dishain,
amothigerna, aAdaim!'
2053] 'Nachamtaidled cos nalam,
natath duini domhétran,
cotistar oDia donim
d'ordugud mochuirp coemdil.
2057] 'Lecid mochorp, cain inmod,
innachacht cenchumscugud,
derb limm lessaigfid mochrí
insaerdenmaid domrigní.
2061] 'Érig, ahEua cogrinn,
ocus heirg itchrosfigill,
foid huait fordeis Dé, aben,
m'anim cogle fornaebnem.
2065] 'Indanim dorigni Día dam
hé rostimgair coinglan,
taet cuce cohuag diathreib
icoemthecht sluáig doangleib.
{folio 24 a 2}
2069] 'Aben nimdana iarfir
immadala modegríg,
indferg dorigni, réim ngle,
bann baide ocus trócaire.
2073] 'Attaig, Eua, inríg ráin,
coti iarfeba im'chomdáil,
menithí frim'dichial nden
cotí Michial archangel.'
2077] Atraig Eua, insoe forlar,
congul cogoe, codermar,
frire n-uare nodossaig
cotruaigi, conderfadaig.
2081] 'Arco-fuin damsa, amorí!'
arsi, arEua cocoemlí.
'incoir iarth'adrad hifus
dún labrad hit'frecnarcus?
2085]
'Meit mochuil, met mophectha,
manimbé set sirhettla,
menitabra dilgud dam
nochomtha labra langlan.'
2089] Fillid aglúni forlar
Eua truag durí chomrád,
'frit arí richid moder
conomthi inmilid Michel.
2093] 'Doglanad anma Adaim
diascarad friadualchaib,
dia imthus, iarndul forcel,
cori arbri archangel.'
2097] 'Erig, aEua, donlár,
glerib rochlos dochomrád:
rosiacht dind richid doscel,
dotriacht inmilid Michel.
2101] 'Dochuaid aanim ochurp
Adaim, haEua coemcucht!
coraig cen grain, cain in dúis,
coda dílaim, achoemgnuis !'
2105] Dodechaid Euá iartain
p.31
coluath indochum n-Adaim,
cofuair Ádam, met ngrada,
centinfissin n-anala.
2109] Uair nacuala cocruth chain
guth Adaim diaacallaim,
roscloi aciall cenchoimsi
fricoi cian, frisirthoirsi.
2113] 'A Eua, tocaib dorosc
ocus daim dun dothinchosc;
suidig th'imcaisin ngeir nglain
súas coleir donanemdaib.
2117] 'A ben, tocaib dognuis nglain
dodescin anma Adaim,
feib immurchurthir cogel
eterarbri archangel.'
2121] IMsoidi Eua iarsain
dodescain anman Adaim,
confacca inn-anmain cóem ciuin
Adaim icoemthecht Michiuil.
2125] Intan bai Eua iartain
icaithni anma Adaim,
confacca chuici íarsetaib
sluag n-angel coclasschetlaib.
2129] Confacca Eua riastsluag
saraphin, saer ahimluad,
cain intretel dofórgaib
cotrib hettib forórdaib.
2133] Confacca Euá iarsin,
iarsindaeor donoebnim,
friataitnemchi rosochta,
tri heoin gela etrochta.
2137] Intan bái icdeiscin nan-én
Eua féssin cenimlén,
amal ruithni dogrein glain
forfemid an-imcasain.
2141] Rochlos inchlas conem nél
nanoebangel imMichél,
rosernsat sreith cosúairc sein
'macuaird immaltoir n-Adaim.
2145] Congabsat claschetal coir
indángeil immonaltóir,
roloiscset luib fiadcachdrung
dianidainm ornamentum.
2149] Rosined indethach thren
codiriuch triasinn-ahér,
cor'oslaic, cenchoimsi ngle,
doirsi nafirmiminte.
2153] Conoebthanic Dia donim
dofrestul anma Adaim,
inrigruiri uascachdu,
condessid 'narigsuidiu.
2157] Luid fiadinrig ran reim ndein,
oenangel án doangleib,
sephain cogrinn coel nglain ngil,
bái athoirm dind fo secht nimib,
2161] Foguth inchuirn, cohog án,
doluid slog na nói noebgrad:
batar fírdruine acliar glan
fiadrigsuide inDuileman.
2165] Concanat, cainiu rétaib,
fochliaraib, fochlaschétlaib.
isbennachta incachthan
ardrí nan-uile n-adbar.
{folio 24 b 1}
2169] Roslechtatar huili iarlar
sluag n-uag nan-angel noebnár:
rogadatar coDia ndil
imdilgud cinad Adaim.
2173] 'Dochomdelbaid, amori,
tú doruassat donephni:
heralmit fort, comul ngle,
ardodeirc, ardothrocaire.'
2177] IArsain rofáid inri ruad
saraphin cohoponn uad,
p.32
iarleittreib rotoeb naslóg
cosnahettib dodergór
2181]
Coragaib anmain cenches
Ádaim coroda bades,
isruth nasirdrung nasnau
indatinum ciriasu.
2185] Cotuc lais anmain ngil nglain
Ádaim amlaid asruthsain,
orosuidig marthuis tan
fiadagnuis inDuleman.
2189] Fodoralaid fein forlár
anim Adaim cocoemgrád,
'naligu, fiadinrig ruad,
bái friré teora prímhuar.
2193] Cotarat inri iarsain
laim fochenn anma Adaim,
cennachcathim, cáin inscel,
corosathin doMichél.
2197] 'Nibadicheoil, toraind ngle,
aMichéoil, fríamórgaire,
anim Adaim sunn ifus
rodosamaig hiPardus.
2201] 'Beir inn-anmain ngil nglain
Adaim áin conaairbrib:
suidig fodiglaim cengreis
isintresrígrainn Parduis.
2205] 'In tertio caelo', arDia,
'dianidainm Ficconicia,
bid ann centaidbsin pene
coamsir nahesseirge.'
2209] Nahuili grada cachdú,
eterangliu isarchaingliu,
babind aclasschetal nglan
icmolad inDuleman.
2213] Ardilgud d'anmain Adaim
diaphecthaib, diadualchaib,
arabrith cengrisse ngress
arisse dochum Parduis.
2217] Ola thrócaire duib sunn
isindluib ornamentum,
tabartar imchorp n-Adaim
diaglanad diadualchaib.
2221] Tri hanairt slana, soer sain,
ecortar imchorp n-Adaim,
ocus atnagar coléir
fritaeb adnacuil Abeil.
2225] Corp arsenathar Adaim,
iarn-eladnaib ildánaib,
ochéin fogarbchacht báis brón,
coroadnacht in-Ebrón.
2229] Robai ann fothromthur thenn
cotoracht tonngur ndilenn,
corp Adaim fodalaib dron
congradaib 'naadnacol.
2233] Trethan dilenn oscachmaig
ismor n-írenn rocechlaid,
dothuc doAdaum achenn
coruc coHierusalem.
2237] IArsain tarrasair incenn
indorus Hierusalem:
centrist roclannad iartain
croch Crist icolaind Adaim
2241]
Ianus30 arthus trianarath
torogart ainm De Athar,
ocus Noe, nassad ndil,
cétnadarinnscan arim.
2245] Nocorogenair fonim,
dochiniud Eua isAdaim,
duine badchoimiu, corp criad,
inda Noe mac Lamiach.
2249] Cethrur gelda, gnimraid gúir,
febdai adfet inscriptuir,
sinium saegul oscachmaig
batar 'sindaimsir toisig.
p.33
2253] Mathussalem, érim ngrinn,
bahe ingradgemm riandilinn,
Noe, Sem slán, balaech liath,
isinmael Melchisediach.
2257] Ochtmbliadna sescat, niscail,
arnóicetaib dibliadnaib,
cenbaigul raith, rethaib renn,
saegul maith Mathussalem.
2261] Coic cét bliadan iarngaes gle
issed robae in-aes Noe,
intan breth do clann, cain miad,
Sem, Cham ocus Iafiath.
2265] Tan tanic diliu, delm n-uag,
darsinmbith, darsinmorsluag,
issed bai in-aes Noe cenchlith
secét caini doblíadnaib.{folio 24 b 2}
2269] Secht lá cethrachat ar cét
bái Noe 'naairc, ba derbret31,
iarndilinn triamna comblait,
bai tri cét bliadan archoicait.
2273] Noifichit secht mbliadan bind
bai Sem mac Noe riandilinn,
ado trifichit cotgaib
iarndilinn arcoiccétaib.
2277] Melchisidech, saigtis slúaig,
anaimthis incachglanbuaid,
iarset cenbaegul cotgaib
sáegul secét dobliadnaib.
2281] Ri rodrósat oscachrainn
dechnebur dóib donchetclaind,
innandalaib, tolaib grinn,
otha Adaum codilinn.
2285] Adam la Seth, srethaib iath,
Ianus, Cainan, Malaliach,
Iareth fial, fichtib rót,
ocus int-amra Enóc.
2289] Mathusalem, sercc nasluag,
ocus Lamech, linib luad,
ocus Noe, noithech trell,
rosnái uastonnaib dílenn.
2293] O Adam, herbág arclann,
cotarscur ndermar ndilenn
deichfichit bliadan, buaid mbil,
cethri deich ardibmílib.
2297] Otha dilind, troeta sluag,
coAbram n-amra n-adruad
ado sescat, sliucht cenchlith,
dobliadnaib arnóicétib.
2301] O Adam coAbram n-án,
congradaib glanmam comlán,
trimili miadbla imchloi nglicc
cethri bliadna isnoifichit.
2305] O Abram, cenbaisi becht,
cotanic Moisi ahEgept,
nisechnada forcheill cain,
cethracha archoiccétaib.
2309] O Adam, cenbassi bruig,
coluid Moisi Muir Romuir,
ocht bliadna fochet foli
secht cet isteoramili.
2313] Otha Moise, monor ngle,
coDauid macc n-Iesse,
cenbet, cenbaegul32 cotgaib,
saegul coic cet dobliadnaib.
2317] Otha Adam, comul ngle,
coDuid mac n-Iesse
cethri bliadna sescat slig
archet archethramilib.
2321] Otha Dauid, cenbaig mbróin,
condici brait Babiloin
sesca noimbliadna buana
p.34
ocus cóic cét cohuaga.
2325] Otha Adam cosinbrait
Babiloin bai foblathblait,
noimbliadna cethrachat gní
secht cet cetheoramíli.
2329] Otha inbrait, brechta rainn,
cotuttacht Crist icolaind
coic cét, ciaragla (sic) cachalt,
ocus sé bliadna sescat.
2333] Mad oAdam docachslóg,
congénair mac De dimór
cóic míli iscét, cialla cacht,
ocus sé bliadna nochat.
2337] O gein Crist, cétlach cét mbla,
cohár cetach nacethra
mili fonóibriaguil recht
acht dioenbliadain deec.
2341] O Adam nanglorgrad ngle
comórár nan-indile
se mili, mod ngialta nglicc,
cethribliadna nóifichit.
2345] Tan tanic indigail truag
forhinnilib nan-iltuath,
citnirig rechta, reim ndein,
robatar 'sindamsirsin?
2349]
In-amsir Cinaeda cain
meicc Maelcholaim for Albain,
forherainn cenlethrainn lainn
doChinaed mac Maelcholaim.
2353] Ocus Briain for Mumain maiss,
Donncad for Laigniu lanbrais,
isCathal for Cruachain chain,
ocus Eochaid forhUltaib.
2357] IS Fergal nan-airech n-ell
for Ailech rebrach Rigrenn,
mac Conaing, meic Neill congail,
flaithri sluagach sil Eogain,
2361] Ocus Dubdaletha lóir
forsretha sil hErimóin,
súi cosaidbri segtai rainn
osmur maigni meic Alprainn.
2365] Othalinus, línib slog,
bamac donOtha hermor,
baforngairthid uascachmaig
inresin doRómanchaib.{folio 25 a 1}
2369] Batar dárig, reil asliucht,
for nadathír immuir n-Iucht,
Hlothair
for Franccaib congail
ishEtgair for Saxanaib.
2373] IS Maelcoluim, cetaib ngal,
riambuidnib broga Bretan,
congelgart cechcomlainn cain,
degmac Domnaill meic Eogain.
2377] ISsindaimsirsin, cet glonn,
robái longas nacúllom,
hicsaigid forcachgním ngarg
Danair atírib Danmarg.
2381] Ohsain cobráth, brígach beirt,
nidamsnímach etercheirt,
nifail innim nach hicrí
tuccas sain acht monaebri.
2385] Ardri grene, gle roclos,
ishé dorigne Phardos,
isferr cachrig, rigda achruth,
nifail crich forasaegul.
Saegul Adaim nirbugair.