Corpus of Electronic Texts Edition
Saltair na Rann (Author: Unknown)

poem 9

9.


1293] O shunn duaid Eua foleith
leth indubuill aurchotig,
roclaemclai clí, lethansmacht,
dorochair di acoemthlacht.
1297] Eua fritindrad cenlocht,
baingnad abith imnocht,
rosgab crith gréic, cenchruth nglan,
coroleic guth for Adam.
1301] Fogairm Eua, feib rodlecht,
dodechaid cenfrithuidecht,
Adam fein cenae, cenlocht,
confacca amnai lomnocht.
1305] 'Noconalaind maratai,'
arsé, arAdam, friadagmnai,
'cid ardotralaid hicacht?
cia rotsáraig 'motnoebthlacht?
1309]
'Nochonepér rit insein,
amothigerna aAdaim,
coragba huaim, cenhuath ngle,
coluath leth indubuillse.'
1313] O rogab Adam cenclith
leth indubuill aurchotig,
rofacaib athlacht centhucht
corabe fesin lomnucht.
1317] Ci rotbrathaig, aben baith,

p.20

rotrathaig narbsat fírgaeth?
donrat frisnim saethraich séis,
rotbaithig, rombaethigeis.'
1321] 'Nathir iarfír, feib roclos,
gaid dím atichtu iPardos,
iartichtain dí sunn tuc de
ubull doncraunn aurgairthe.
1325] 'Atrubairt rim iarsein sunn:
'aben, geib uaim inn-ubull,
madail duit cofesser olcc,
arnabad essel t'intliocht.'
1329] 'A Eua, afiss madail duit,
dechair maith 22 ocus morhuilcc,
geib inn-ubullsa caem, nglan,
raind etrut ocus Adam.
1333] 'Rogabussa huad innsain
ubull cosinfrithorgain,
huair náfetar ciarét olcc
cofacca mobith lomnocht.
1337] 'IMthegind siar ocus sair,
forfemdinn athimargain,
niblaith, bahingnad rith rois,
rofaid fofidrad Pardois.
1341] 'Nathir rongáel, garb agraph,
donrat frisaeth triaaslach,
dochéin rochind agnim cain,
abreic ronmill, aAdaim.'
1345] 'A Euá, conhilur glonn,
nimanfacamar th'uboll,
isreil fornn feib atam nocht
condrancamar friamorolcc.
1349] 'Ata ni ismessu de tra:
scarthain cuirp ocus anma,
corp lobtha hitalmain tind,
isanmain dochum n-Iffirn.'
1353] Huair dorochair dib atlacht
roslín truaigi istocomrac,
duairc leo dochraid acuirp gil,
cenfial nglan dian-imditin.
1357] Réil dochach dib dath achuirp
oforfacaibthi glenuicht:
arscath aféile, fuam ngle,
tucsat duilli nafiche 23.
1361] Nifrith friligthorba ndul
acht indficomna ahoenur,
fid fann iPardus corath
nach crann forsm-beth duilirath.
1365] Cocuala Adam hitrial
angel coarad friGabrial:
'seinter lat cocoir cornn ngle,
coroa agloir fo secht nime.
1369] 'Heirgid huili congraid glain
hicomdail friarnDulemain,
combúaid frigním dangen ndil,
slúaig angel do secht nimib.{folio 22 b 1}
1373] 'Tinolaid forsluagad slan,
nibahuathad forcomdal,
condechsaid cogle rochlos
hicoemthecht Dé doPhardos.'
1377] IArsain doluid inrí rúad
doPhardus conamorsluag,
remi codangen cenchol
class aingel iccocétol.
1381] Dessid hiruphin iarfir
bahe rigsuide indardrig,
im-medón Pharduis corath,
inbale hífail crann bethad.
1385] Rosernad cech sluag iarsreith
cechgrad gluar conaairbreib,
ocus dessid morí reil
fodessin forhiruphein.

p.21


1389] Dellid indfidbad forlar
Parduis frifidrad fonnram,
rostairbir adduiri den
arairmitiu aDuleman.
1393] 'Incualabarsi coglan
ingním dorigni Adam,
adula, cenidna nglan,
darm'thimna, darm'forcetal?
1397]
Dodechaid cach dib forleth
iscáth inchrainn forteched,
con-erbairt guth Dé donim:
'nimaith romba, aAdaim!'
1401] Roraid Adam, erim n-úag,
friDia aaithesc n-erthrúag:
'marosárugus dosmacht
moben forom roaslacht.'
1405] Atbert Dia d'Adam coglan:
'dochin huair nachatamar,
dogénat doclanna iartain
dogres acin d'imresain.
1409] 'Diambad athirge dognéth
Adam con-immud achnéd,
dodilgfitis do coglé
achinta doridise.
1413] Forforcongart fein fofeib
inflaith feig foraaingleib:
'curid Adam cengnim nglan
aPhardus dochum talman.'
1417] Lotar indaingil iarsain
dodlomad Eua isAdaim,
dograig domma frigorta,
lobraig lonna lomnochta.
1421] Gaid Adam doib arforclu:
'anaid frim, anoebaingliu,
comblassind riandul im-mach
ni dothorud crainn bethad.'
1425] 'Anfamit frit, monuar bal,'
arsluag angel friAdam:
'istruag linni fiadcachthur
an-dorinni Luciphur.'
1429] 'Indamchluine, aDe dil,
arth'anglib, arth'archanglib?
indeonaigi dam triarath
ni dothorud craind bethad?'
1433] 'Ni blasfi torad inchraind
bethad fritolad mordruing,
hed beit 'mole fogris grinn
an-dis dochorp ist'anim.
1437] Rosbade atol triafroiss,
rosplage bal immarbois,
roslín ciabair granne cath
iarum oshunn doduad.
O shunn duaid Eua foleith.