Corpus of Electronic Texts Edition
Saltair na Rann (Author: Unknown)

poem 6

6.


961] Ri dorigni Pardus mblaith,
cuairt crichid, cobsaid, comsnáid,
caintír toirthech, digrais foss,
dodainib rian-immarbos.
965] Rí robennach bruig reid mblaith,
Pardus frisuirded sáergraid,
iarcinniud cachthuir thogaig,
con-immud cechiltoraid.
969] Col-láinib loraib lubaib,
comagib, comorbrugaib,

p.15

coscathaib scoth forcachmaig,
conamblathaib bolordaib.
973] Cocadius cainol roclos,
con-ainius, con-aebinneos,
conabruig barrglas, bladmar,
feidb tadbas babithsamrad.
977] Bethrach, broenach, brogach, bras,
tir tethrach, togach, tonnglas,{folio 21 b 1}saer saechtairthír, suthach srath,
caem, cain, cetharchair, cruthach.
981] Clar cóir, cobsaid, cumtaig dind,
fal frifóir forsaid forfind,
isdín caich, is mur mbroigthech,
bithblaith, bithur, bithtoirthech,
985] Sossad slan, suthach, sid sáer,
fal fossud, fulach, fírnoeb,
sreba sencha, selbcha sreith,
cenérchra, cenimhesbaid.
989] Mag maith, moinech, milib mind,
doinech, daith, dinib derb dind,
cosrethaib saidbrib seolaib,
airbrib aidblib, ilchéolaib.
993] Rí roordaig innadail,
topur indhordain forláin,
astecat glaini crotha,
cethrisreba sirsrotha.
997] Sruth d'fín, sruth d'ola, dal dil,
sruth loga lemnacht langil,
sruth maith mela, monar nglan,16
frisasad nanoebanman.
1001] Ainm foleith cechsrotha slain,
cenchleith friclotha coemdail,
Fisson, Geon, cain cenlen,
Tibris ocus Eufraten.
1005] Fisson sair sires areim,
Tibris siar siles slanéim,
Eufraten combuaid fodes,
Geon fothuaid dian dirges.
1009] Indola sáir, iarslicht slán,
infin siar srethaib sirdal,
inmil fodess, digrais buaid,
inlemnacht sílas sairthuaid.
1013] IMsoat, dosoat iarsain,
doréir indrig donoebnim,
cenmeth, cenditha, cenchais,
cechleth fochricha Pardais.
1017] Ríi foides enlaith n-en ndil,
cenlen darróendes richid,
cocanat ceola cenchais,
beoda fobiliu Pardais.
1021] Docain coglerdaith cengreis,
indenlaid caim cenaithmeis,
set sáire fririagla raith,
cliara caine cet ceolmaith.
1025] Cet dochetaib en iallaib,
cét n-itte, cét ceol cliaraib,
mor cet ceol calad cencleith,
gleor canar dorig richid.
1029] Rí rodelb Pardos foali,
ishe arn-armdos airgdidi,
dorat mur mor n-imme thenn,
diór immaimthimchell.
1033] Ri betha barrglais boirchich,
ri Pardais con-iltoirthib,
rodelb lanamain iartain,
donahuilib anmannaib.
1037] Ri doruasat Adam n-án,
fochruth cengúasacht coemnar,
congrad, cenamlós rochlos,
hiPardos rian-immarbos.
1041] Bai Adam tritrath centess,
imbadud fograd glanches,
fortalmain tinn centreorud,

p.16

cenanmain, ceninbeogud.
1045] Bai corp Adaim tribtrathaib,
cenanmain friderbfathaib,
fritindrad centrist, delm ngle,
icfigrad Crist d'esserge.
1049] ISsintresló iarnagein,
rodelbad anim Adaim,
iartoebthogud friadin ndocht,
cenoentogud friafirchorp.
1053] Coroainmniged iarsain
onacethri rétglannaib,
Archon, Dissis, rotdelb Dia,
Anatole, Missimbria 17.
1057] Noimís lána, lathar ndil,
orohet Adam anmain,
iarsliucht sruithi senchad slán,
corodelbad abanscal.
1061] Dianid comainm Eua án,
crichid, chorcorda, coemnar,
dil, delbda, toga18 rainni,
fotha febda fírclainne.
1065] Iarsain asraracht Adom
assasuan cenimgabud,
confacca inmnái, mín adath,
segda, suaichnid, sochrutach.
1069] Amal rodeccai aggnuis
dosroega sechcach nderbduis,
dorarngert dí, eraim ngle,
combad sainserc sochaide.
1073] 'IS orot rirfes cencleith
cach amathair 'saathair:
ondiu triabithu, buaid nein,
biaid cechoen uainn dit'ogréir.'
1077] Ardruiri indroith, rigda ail,
gargruide fricroich coemnair,{folio 21 b 2}rofigli 'nacrí roclos,
inrí dorigní Phardos.
Rí dorigni Pardos mblaith.