Corpus of Electronic Texts Edition
Saltair na Rann (Author: Unknown)

poem 5

5.


869] Ri dorigni carcair cain
doLucifur, diademnaib,
tír ndorcha ndubach ndér ndrenn,
ger, dianidcomainm Iffern.
873] Cathir grainne, glérib cath,
censlane, serb, sirechtach,
aigthech, uamnach, ilar mbrath,
gaibthech, guamnach, golpartach.
877] Buidni biasta, buiriud pian,
ruibni riastrai frianriad,
bádud, plagud, brŽud, bruth,
tragud, largud, leod. loscud. {folio 21 a 2}
881] IMonmbeist mbuirr, blóraid benn,
ostuind truim, tolaib ilchend:
duilgib drichnes fricachsluag,
coruibnib riches roruad.
885] Coic cét cenn fridiartain tinn,
coic cét fiaccail cechoenchind,
cét lam, cét bass, indel nglaiss,
cét n-ingen forcachoenbaiss.
889] Ilar thor ndoel, duba druing,
ilar cruma cael clenchruind,
ilar cuan ngér, ciasta, cerb,
ilar mbiasta mbuan, mbelderg.
893] Ilar loscond lan dogail,
foralar icimsergain,
fricach imchuaird nacathrach,
ilar nathrach n-imathlam.
897] Ilar mbrothlach nambled mberg,
nambiasta n-ochrach n-airderg,
ilar ndelb ndomblas angal,
ilar lonnbras leoman.
901] Ilar lasrach lonn cechleth,
ilar casrach ngarbthened,
ilar ndlúm ndlomtha tuarcat,
ilar ndorcha ndubluachat.

p.14


905] Fail mór domuirib moamúr,
hIffirn cotuilib tromthúr,
friplagud nasluag siabar,
friambadud, friambithphianad.
909] Muir ndubtemen, temel truag,
muir ndaiged tened tromruad,
muir mbren, muir tren, dengge dath,
muir nél, muir neme natrach.
913] Inmuir serb suiges insluag,
mor ndelb drubas fothromnual,
incach naird fobrón fíantach,
gol mairg ocus mórhiachtad.
917] Híttu, huacht ocus tess
crintu, chúac, grandaib garbchess,
sluag luath landub foralar,
conglamrud, con-athchossan.
921] Gáir gér gbi, hír isferg,
fothair díni ndér nherderg,
friangrella cenchoibli ngle,
sroigli tenna, teinntide.
925] Acethair cethorchat cet
nisechmalat foroenshét,
failet fridamnad Diabuil,
in-Iffurn dohilphíanaib.
929] Cianobeth cet mili fer,
conatengthaib iarnaideib,
oenphian dib, cobrath mbrudin,
nichoemstais doderbthurim.
933] Madnofail d'hilphianaib ann,
in-Iffurn huathmar imgann,
lia natluibi formaigaib,
no duili for fidbadaib.
937] Fail ann rig nadrigda bes,
gribda, gann, cetaib ilglés,
duairc, doer, dressachtach adrech
cloen, cessachtach, cossaitech.
941] Crimnach, gruamnach, gnath icbrath,
hirach, uarach, airbirech,
ciar, cernalach, caras cath,
dian, drenngalach, diumussach.
945] Engach, huaichlech, ilar crech,
tedmnach, tuaimnech, disceinmnech,
gristaig, craestuib, granne agne,
discir, doescair, dergnaide.
949] Ri dorat tromdigail tind,
forsluag n-anhettail n-Iffirn,
truaga, tána frigortai,
buana, bana, bithbochtai.
953] An huili cestait intslúaig,
icráesluch Iffirn adruaid,
ciarombet cét tengad dein,
niaisneidfind frim'aimsir.
957] Adba n-Iffirn, ilar phian,
mairg bís fócrithfeidm comchian,
glenn golmar, gann, gne ali,
morí rogmar dorigni.
Ri dorigni carcair cain.