Corpus of Electronic Texts Edition
Saltair na Rann (Author: Unknown)

poem 4

4.


833] MoRí rigda oscachthur
roraide friLuciphur:
'biait fót, feib dochangen ngel,
airbri imdai archangel.
837] 'Tabair uait airmitiu iarsreith
doAdom, dom'chomdelbaid,
na nói ngrad coibli gleir glain
biait foimti fri'tairitein.'
841] 'Airmitiu d'Adam, nichél,
arimsiniu, nithibér,
ar badairniul fiadcachthur
dianamthairbiur fonsósur.'
845] Roraidi fris rí narind,
aFiadu firen firfind,
'nocotbia airmitiu glan,
úarnatabrai reir d'Adam.'
849] Roraidi Lucifur leir
aithesc ndiumosach ndrochceil:
'bamri reil oscach caingin,
fomgnifet indilaingil.
853] 'Betit indangeil fomtraig,
dogén féin mochomtocbáil,
biam tigerna oscechdrung,
nibia rí aile huasum.'
857] Lucifer colin agraid
rotrascair achomthocbail,
rotairinn adiummus tind,
dorimmart dochum n-Iffirn.
861] Mili bliadan, mod nglanna,
adfiadat nascribenna,
ochruthad angel, gnim cert,
conostarraid tarimthecht.
865] Ruiri narind réltai máil
targai dind domuin drechmair:
niseng abrig oscachbla:
ferr cachrig morí rígda.
Mori rigda oscachthur.