Corpus of Electronic Texts Edition
Saltair na Rann (Author: Unknown)

poem 2

2.


337] Ri dorigni riched reil
conachrichaib diacomréir,
treb thogach, duanach, dangen,
dosluag amra árchangel.
341] Riched conilhur adrong,
saer, sithech, nadimchumung,
cathir dronoll cocetrath,
met dondomonn adechmad.
345] Failet ann trimuir cenmeth,
duirimthimchellat riched,
mur doglain huaine, gnim cain,
mur dior, mur dichorcair.
349] Mur n-uaine cenchess im-mach,
mur n-óir fricness nacathrach,
im-medon frigelgloir cain
mur ndermor dichorcairglain.
353] Fail ann, cotrichim trethan,
cathir chrichid, chomlethan,
fail inti, frisíd solus,
set sir cethriprimdorus.
357] Met cachdoruis dib foleith
donacethriprimdoirsib,
toeb fritoeb, dini iartomus,
mili darcachn-oendorus.
361] Fail crois d'ór incachdorus
frisella slog sirsolus,
ri rosdelba centalgga,
hite remra roárdda.
365] En dodergor forcachcrois
oschind lerglor nach anfois,
incachcrois frihernól cuir
gemm dermor doleic logmuir.
369] Archangel cechlai, luad ndil,
conasluag oríg richid,
coclasschetal, coceol glé,
timchell cacha oenchrose.
373] Fail ann faithchi cechdoruis
cain fritaichmi derbthomuis,
samlaimse cech dib fofeib
fritalmain conamuireib.
377] Cuaird cachafaithchi foleith,
conagrenchaib airgdidib,
conabrugaib foblath bil,
conalubaib ligaidib.
381] Ced adbal lib, lathar ngle,
met nafaithchi fairsinge,
mur d'argut, cengnim n-aithbi,
rognid imcachoenfaith(chi).
385] Airfortoich namur im-maig
immondun docachoenleith,{folio 20 a 1}cosostaib slanaib sidib
diarmidi dohilmilib.
389] Ocht n-airfortaig ann frisreith
cocomraicet 'moncathraig:
nimtha samail nasét sruith
donmét fail cachairfortuig.
393] Cachairfortach lan lubaib,
conangrenchaib credhumaib,
mur dochriad chaim rochalcad
cotren imcach n-airfortach.
397] Damur deec, toraind nglé,
'nan-airfortach, 'nafaithchi,
cenmthat natrimúir im-maig
failet imon primchathraig.
401] Cethracha dorus hitreib
richid conarigsuideib,
atri cacha faithchi feith,
isatri cachairfortaich.
405] Cethridoruis airri im-mach

p.7


nan-irfortach n-immechtrach,
frisintetblai, tolaib smacht,
frisincetna athchomarcc.
409] Comla d'argut, cain ardreich,
cachdoruis dondfaithchisin,
comlada creda corath
fridoirsi nan-irfortach.
413] Nafrithmuir ondun im-mach
innan-huili n-airfortach,
samlaithir fribladbail mbla
otha thalmain cohésca.
417] Mur nafaitchi, feib dasli,
rosdelbtha dofindruini,
an-airde, adbul foneib,
otha thalmain coglangrein.
421] Natrimuir, met an-athfaig,
timchellait inprimcathraig,
tadbain an-airde cenmeirg
othalmain cofirmimeint.
425] Suidigud namur im-maig
immondun, immoncathraig,
rathrian cachmúir, monor ngle,
reil radiall secharaile.
429] Ri rosfossaig cotangeib
nassossaid 'monprimchathraig,
deimni ataichmi ondun im-mach
'nafaithchi, 'nan-irfortach.
433] Sluaig sil Adaim, aidble baind,
innandalaib frianderbraind,
gle iarndligud dib rosoich
sechinud cech oensossaid.
437] Bid cachsluag diib foleith
'nan-airfortach, 'nafaitchib,
lánaib doligaib fofeib
dosidaib, dosonmigeib.
441] Noeb isnúibhuaga corath
fobraenbuada, iarmbraenchath:
scérdair frisinslog im-maig,
bertair isinmorchathraig.
445] Cathir De conasoillsi,
cidat mora aprimdoirsi,
nitheit inti óthalmain treib
acht mad oentriar dodoeneib.
449] Duni conái dligid Dé,
duine óg iarfirinne,
congnim adma nadchlithe
duine amra athirge.
453] Congérdair cobáid im-maig
nanaeb isinprimchathraig,
febdae fo lib, lith rochlos,
cach dib daraprimdoros.
457] Nadoirsi chaindelbdai, glain,
lainderdai dondlíc logmair,
con-ollbladaib, segtait slóig,
conacomladaib dergoir.
461] Tri athchomairc cechdoruis,
cain glanthogairt toebtomuis,
fricachclothalt, erim ngúr,
athchomarc for cachoenmúr.
465] Aurdrochait nandorus n-og
cain set solus dodergór,
atat fonéim, nassad ngle,
airddiu cachceim araile.
469] O cheim docheim, erim ngur,
isreid dreimm isinprimdun,
cainsluag sidi, set rosaig,
mór mili cét dochétaib.
473] Hicuaird nam-mur, mor n-athbach,
im-medon naprimchathrach,
lebinn glainidi glórdai,
drochte dronai dergórdai.
477] Filet ann brugi bláthi

p.8

bithura cach bithráthi,
cotorthib cachthoraid dil,
conambolthaib milidib.
481] Fail ann centoirsi didnad,
fail soilsi censirdibad,
ceoil gluara, caini, grinni,
buana, baidi, blaithbinni.
485] Fail ann ni sásas cech slóg
hirichiud rigda romór,{folio 20 a 2}fogur nangrad, nacéol ngle,
bolud namblath mboltnaigthe.
489] Fail mór dosostaib, saer slán,
fail mór class cobsaid comnar,
fail ann mor slúag, seol snassi,
fail mor ceol cechoenclassi.
493] Failet ann linni lethna,
ailli aninni anoebtrethna,
gleorda immocanat classi,
suarca, segdai, somblassi.
497] Failet ann srotha sengga
docheniul cach coemlenna,
frisasad sloig, sir sotlaib,
fail ann mór dofindtopraib.
501] Failet ann lecga lordai,
failet foraid forordai,
forbrig naslog dosrogaib,
fail ann mór do rigsrothaib.
505] Fail ann mór mbíle mbroga,
mór tiri friimthoga,
mor sét sétach, slán saine,
mor cet cetach clármaige.
509] Mor ceol caimnaig cenbine
fail iroenmaig rindnime,
mor seol suilig, mor sreth séis,
nadróig tuirim noaisneis.
513] Fail ann iarset, srethaib smacht,
cet acethair cethrachat,
fiadgnuis indrig cotagaib
iar n-árem afochraicaib.
517] O thosuch domuin cobrad
clann Adaim, cidhe acomrad,
ni choemsaitis, digrais seis,
cech oen fochraic dib d'aisnes.
521] Cenmothat sain cotaigaib
fail innim dofochraicaib,
lir bannai fleochaid, fuám tricc,
no slamma snechta snigit.
525] Sossad slan morig rathmar
fil forlar naprimchathrach:
ismor cet mili 'mobeir
hitimchuaird afosscemeil.
529] Dior derg rogníd huile
dorig richid rigsuide :
ri corúnaib doforgaib
osnamúraib erordaib.
533] Sossaid Aingel cosoillsib
nessaim donaprimdoirsib,
Archangeil conan-airbrib
isnessam donaebainglib.
537] Uirtutes, nert oscachmaig,
isnessam doArchanglib,
Potestates, deoda tlus,
isnessam Uirtutibus.
541] Principatus, blaith aseis,
isnessam Potestatés,
Dominationes, drong demein,
fodiuplaib indfosscemeil.
545] Amra inslog roscing uili
forscemul indrigsuidi:
nóeb inrori roscongaib
Troni conamórdrongaib.
549] Sluaig Hiruphin rosfossaig
itimchuairt indrigsossaid,

p.9

tuas sech cechoen fondrig reil
sernait slog sáer Saraphin.
553] Noingrad nime, noebda ambal,
imrig nan-uili n-adbar,
cendimbúaid fribriga blat,
cen imhuail, cenimmformat.
557] Lainib lánaib forig recht,
isshé an-arim firchert,
dase sescat, sluag fofeib,
cechoengraid donagradaib.
561] Arim cechsluaig, lith cenmeth,
nifail nech rodasfessad,
acht marofitir inrí
dodosrosat donemphní.
565] Ri huasal uasdaib uili,
ri richid con-imdruine,
ri febda firian fossud,
rí rigfial11 'narigsossud.
569] Ri rohóc, ri sen icein,
ri rodelb nem imglangrein,
ri nan-huile noeb corath,
ri caim, ri cain, ri cruthach.
573] Ri dorigni nemthech necht
doainglib centarimthecht,
tir nanóeb, namac mbethad,
clar find, fota, forlethan.
577] Rosrethaig sosad, sid saer,
fossad forethaib rig roen,
cuaird cháin, glanna, crichid, gle
doaes amra athirge.
581] Morí immarthus osintslóg
sanctus Dominus Sabaoth,
diacain uasdind, forseol sercc,
ceol cethri sanct find fichet.
585] Ri roordaig inclais chert
na cethri sancht find fichet,{folio 20 b 1}cáin canait canthus dontslog
sanctus Deus Sabaoth.
589] Ri fossud fial, febda, find,
sid sossud, selbda, soenmind.
lasfail tret nan-úan, nuall ngle,
'món-Uan n-úag nemlochtaigthe.
593] Ri reil rohorddaig inn-Úan
iarsintsleib foraimluad,
cethrimili mac 'nandiaid,
cethorcha ocus cét glanriad.
597] Crichid class, congloraib cruth,
donahógaib ceneilniud,
canait ceol ngluair immalle
indiaid indUain etrochtai.
601] Comchoema, comluatha, gluair,
iarsintsleib indiaid indUain,
scribtha 'nangnuisib corath
an-ainm isainm indAthar.
605] In ri rohordaig inguth
donanemdaib fritinphiud,
lethan, londgur, lathar ngle,
amal tondgur n-iluisce.
609] No amal guth crot carait nuall,
canait cennachlocht lórmuad,
linib lerthol uascechraind,
no amal nuall dermór toraind.
613] Ri bili bethad foablath
slige frisrethad soergrád,
abarr, abroenrad cechleith
roleth darroemag richid.
617] Forsasaid indénlaith án,
congaib glerath cheol comlan,
cenaurchra, corogud rath,
dothorud no duilerad.
621] Alaind indenlaith cotngæib,

p.10

cechen glermaith cet n-etteib,12
canait cenbet, cogleor gle,
cet ceol cacha oenheitte.
625] Ri rogni mór n-adba n-an,
mór ngnim cadla, cóir, comlan,
lam'rig rogmár oscechmaig
fil cech ollgrad cenesbaid.
629] Fail leis secht nimi, nert n-uag,
cengeis, cenbine findluad,
imthalmain, tolaib tine,
con-anmaimm cechoennime.
633] Aear, ethiar oscachdrung,
Olimpus, firmamentum,
nem n-usce, nem n-angel n-uag,
nem hifail Fiadu findmuad.
637] Fil leis ilar n-amra ndrong,
fil mor n-adba cenimroll,
fail lais nói ngraid, cossar chaid,
fail lais sosad cechoengraid.
641] Fail indechmad, grad congaib,
censechnad slan sil Adaim,
dóini foadoi triamnai trel,
cotaoi Fiada findgel.
645] Fail ann sid, fail suba slán,
cenguba, cenathchosan,
frisrethu sluaig, segda thuir,
fail bethu buan bithsuthain.
649] A fail domaith lárnDia dil,
dianoebaib innanoemtreib,
nifail iarsetad naseis
nech conní acetmad d'aisneis.
653] Coimdiu conn cechgrada gluair,
targ
[...]
drong betha bithbuain,
romsaera iarndul acri cath,
inri dorone inriched.
Ri dorigni riched reil.