Corpus of Electronic Texts Edition

Betha Meic Creiche (Author: Unknown)

chapter 18

60

Do mholatar cách a c-coitcinne gur maith gach ní da n-dubairt an t-eccnaidhe. Ocus atbert Blathmac gur mor na míorbuile & na ferta doronadh annsin. ‘As fír éiccin,’ ol Mac Creiche, ‘úair bidh Druim na f-Ferta ainm an droma sa óníu go bráth, & bidh é Loch m-Broicsidhe in loch sa thios go bráth.’ Ocus doronsat na cleirigh a c-codach & a n-áontaidh re 'roile; & doroine Mac Creiche ulaidh & adradh, & tuccadh a chána & a chumhala go {folio 97r} Mac Creiche; & do gabh acc ceilebradh don tír, & acc techt tar a chánaibh; & isedh asbert: ‘Maith an turus tangamar don tir-si da cabair; & bidh maith doibhsiumh é, dia c-coimhlit mo chana sa rim fein, & rém comharbaibh tar éis a chele go brath, & bidh olc muna coimhlit.’

61

Ocus atbert an laoidh ann:

Mac Creiche

1. Maith an turus tangamar
   Do dhéoin coimsigh cáimh,
   Do chobair shluaigh Fhermhacach
   As gach tír do thir.
2. Broicseach aga sluccadh san
   Uille na gach olc,
   Uil-peist uathmar anaithnidh
   Nír fétadh a coscc.
3. Maoldala is Mac Aiblen
   Is Blatmac as cáidh corp,
   Ocus náoimh in tíre so
   Nír fhétsat dibhsi a coscc.
4. Do raidhset na naoimh
   A n-aithesc go grod:
   'Fáccbaidh uile an tír;
   Ni thicc dhinn a coscc.'

---

p.46

5. Fiarfaighit flaithe Fermacach
   Do Bhlathmac blaith-bán:
   'Re furtacht in m-bia ar súil
   No an f-fuil duin a n-dán?'
6. 'Eirgidh co mac ochta Ailbhe,'
   Ar Blathmac co m-brigh,
   'As esin gan breicc
   Diongbhus an plaigh díbh.
7. As dó do deonaigh Día
   Do ched choimsigh cáimh,
   Gach teidhm is gach tres
   Do chor as bhar t-tír.'
8. Tiacchait flaithe Fermacach
   Dom iarraidh budhdhes,
   Da f-furtacht da f-foiridin;
   Turus dob é ar les.
9. Fuaratar me ar clar-mhaghaibh
   Ar brú Locha Léin;
   Damhsa, mar búdh lan-mhanaigh,
   Do shlechtsat go léir.
10. Adubhratar uile,
    An sluagh féta finn:
    'Do breth dheit, a naoimh-cléirigh,
    Tar is cabair sinn.'
11. Do ghellsat damh uile,
    Feraibh, macaibh, mnaibh,
    Sgreapall gacha duine,
    Is beith uile fam' cáin.
12. Teccar damh Día a rathachus,
    Orra as fír an fath,
    Imon m-breith neoch do fhaccbus sa
    Do comhall go brath.

---

p.47

13. Ticcim-si leo anall
    Tar Sionainn na sreabh,
    Teccait —óir as fír —
    'Sa tir leth ar leth.
14. Teccait uile an tír
    Cugainn inar n-dáil,
    Ocus slechtait damh,
    Feraibh, macaibh, mnaibh.
15. Ticc an peist 'na n-diaid
    'Sa choraidh gan cosg,
    Ticcit ar mo chul,
    Is geibhim mo clocc.
16. Aitcim Iosa oll
    Go ro coiscc an peist,
    Ticc caor asin clocc
    Go n-deachaid 'na cráos.
17. Lasaidh a brú bailc,
    Ar ba glan in rún,
    Gan bréicc, is na ceil,
    Téid a neimh ar cúl.
18. Tionntaidh tara h-ais
    Gusan loch budhdein
    Mar rainic a bruach,
    Beiridh 'na lar léim.
19. Téid fan loch budhdéin,
    Tic cathir 'na sproc,
    Donít an sluagh uile
    Altuccadh buidhe a coiscc.
20. Ticc 'sa loch arís
    'Na sesamh, fa grain,
    Eighit uile an sluagh;
    Uch, fa truagh an gháir.

---

p.48

21. An fad do bí an peist
    'Na sesamh mar sin,
    Fa furtacht domria
    Aitchim Dia do nimh.
22. Ticcim urcor dhi,
    Oir fa luinne lem,
    Do chumhdach mo chinn
    Cuiridh é fa a cend.
23. Gabhais fós 'ga h-iombathadh
    Mo bharrain —réim raith —
    Ba réil do chach uile
    'Na choire mhór maith.
24. Dingis ina cam-lubaibh
    Isin loch co léir,
    Gan eirghe fá cách
    Go t-ti bráth don peist.
25. Slechtait damh na slúaigh,
    Feraibh, macaibh, mnaibh;
    Teccait damh co léir
    Mo breath féin do cháin.
26. Teccar damh annsin
    On t-sluag féta fhinn
    Cáin gacha treas bliadhna
    Ar riaradh mo mhinn.
27. A each is a erredh
    Ro dam fia sa on flaith;
    Rot fia sa ón anos
    Asa los gach maith.
28. Mo screapall bec bith-beo
    Damh do dhéonaigh Día,
    Ni berar marbh anabaidh
    Asin tigh i m-bia.

---

p.49

29. Pinginn cíos mo cleirigh
    Nech tucus on Róimh,
    'Sa h-íc do réir riaghla
    Gacha bliadhna doibh.
30. Faccbhaim buaidh tigerna
    Foran tír búdhdéin,
    Buaidh rioghna, buaid rechtaire,
    Cén rabhat dom réir.
31. {folio 97v}Buaidh riogh, buaidh rechtaire,
    Búaidh c-cleirigh h-i c-cill;
    Búaidh maisi, búaidh marcaidhechta,
    Búaidh óla gach linn.
32. Faccbaim ith is bliocht
    Isin tír-si attáim;
    Faccbaim mes is mor-toradh
    Cén coimhlit mo cháin.
33. Faccbaim-si buaidh n-gaisccidh
    Da laochaibh gan fhell;
    Cen coimhlit mo cháin
    Ní berthar a n-geall.
34. Urnaighthe mo mháoir,
    Dínech mo cluicc cáidh,
    Síad dibh ar gach m-beirn
    Diongbus teidm is pláigh.
35. Trí fáidhe mo cluicc
    Romhaibh h-i c-cath cruaidh,
    Acht go c-coimhle a gheis,
    Bérthái leis gach búaidh.
36. Céd-laogh, ced-úan, céd-mennán,
    Céd-arc crána a cró,
    Dlighim do shlúagh Fermacach,
    Aderim ní gó.

---

p.50

37. Faccbaim-si da righ
    Eirghe roimh mo clocc;
    A meth fan treidhe
    Muna eirghe go grod.
38. Gach plaigh, is gach galar,
    'S gach teidhm uathmar án,
    Dingebat da c-cetraibh
    Gen coimhlit mo cháin.
39. Da f-feraibh, da mnaibh,
    Da n-iarsma budhdéin
    Dingebhat na plagha sa,
    Gén rabat dom réir.
40. Gach nech diobh dom riara sa
    Beid ar deis Dé bí,
    Rachait uile ar nemh,
    Eter fher is mhnáoi.
41. Da c-congbat cáin comhramaigh
    Gach aon díbh da n-dual,
    Cuingeobhat go h-oll-bladach
    Iad ar in m-bith m-buan.
42. Bidh me an uil-peist ledartach,
    Da n-dernait rim gó;
    Bed sa riu go freccartach,
    Da millit mo scéo.
43. Atlochar do Día;
    An péist, as garb rún,
    Oír as damh as ced
    Gan a techt ar c-cúl.
44. Atlochar do Dhia
    Mo bharráin co bráth,
    Mar do ládh fan pést,
    Conar léicc fo cách.

---

p.51

45. Ger bó h-édach lachtna
    Mo bharráin —réim raith —
    Ata 'mun peist gan brón
    'Na choire mór maith.
46. Gach aon don tír toccbus
    Mo clocc co reim raith
    Osa glún le gó
    Fáccbhaim-si dó meth.
47. Mo secht fichit bliadhan
    Co feil cainnel raith,
    Atlochar do Dhía
    Gach ar fiad sa maith.

Maith.