Fecht ann dino bói bachlach do muntir Brigte oc béin chonnaid. Do-rala dó co ro marb petta sindaig la Rig Laigen ró h-ergabad in bachlach lasin rig. Ro for-congart Brigit for sinnach n-allaid taidecht as in caillid. Tanic dino co m-bói oc clesrad & oc espai dona slogaib & don rig la forcongra m-Brigte. O ra forba immurro in sindach a gnímrad do-lluid slán fon caillid & sloig Laigen etir chois & ech & choin inna degaid.