Fecht n-aill do Brigit ic techt do láim in epscuip co tárfas di cend buicc isin cailech affrind. Ro oipdestar Brigit in cailech affrind. ‘Cid’, or in fer gráid, ‘ara n-oipdi?’ ‘Ninse is aire opdím’, ol Brigit. ‘Cend buicc’ ol si ‘nom-tádbanar isin cailech affrind.’ Do-rogart in t-epscop in gilla tuc an imaltoir. ‘Tabair do choibsena a gilla’, or in t-epscop. ‘Isin matain indiu’, or in gilla ‘do-chuadus i teach na n-gabur co tallus bocc méath ass. Ocus con 'd-uadus a feoil.’ Ro phend in gilla & do-rigne athrige. Do-chuaid Brigit iar sin do láim & ni facca in fuath.