Is ed do-chuaid Brigit iar sin cona h-ógaib do Ardachad epscuip Mél. Bói ríg Tethba i comfocus dóib ic fleid. Bói lestar cúmdachta ó ilgemaib i l-láim in ríg. Gabais araile fer anfaitech as a láim co n-dorchair & co n-derna bloga de. Ro h-ergabad in fer-sin lasin rig. Do-chuaid epscop Mél dia chunchid & ni étas on rig, acht a bás. Do attaig immurro epscop Mel co tuctha dó in lestar briste on rig & techtais iar sin & ruc lais cusin tech a m-boi Brigit. Do-rígne Brigit ernaigthe frisin Coimdid co ro athnuged in lestar i cruth bud fearr. Rucad iar sin don rig & ro tuaslaiced in cimbid. Dixit epscop Mél:‘ Ni form-sa dos-gní Dia in firt-sa, acht is for Brigit’.