Luid Brigit iarum co Dunlaing do guide dilsigthe da h-athair in chlaideb do-bert dó dia m-bói in dorus i n-dúine. Tanic dino mog do mogadaib in rig do acallaim Brigte & is ed at-bert fria: ‘Da nam-særtha-su don fognum h-itú ropa dam cristaide. Ro fogenaind duit-siu fén.’ Ro ráid Brigit: ‘Co n-diug-sa sin forsin rig.’ Luid Brigit iarum isin dun & conataig da ascaid forsin rig, dilsiugud in claideb do Dubthach, a saire don mogaid. At-bert Brigit frisin rig: ‘Ma dail duit cland t-sainemail, rige dot macaib & nem duit fén tabair dam-sa na dá itghe connaigimm.’ At-bert in rig fri Brigit: ‘Flaith nime or se uair nach facimm & nách fetar cia ret ni chunchimm. Rige tra do mo macu ni chunchimm, uair ni beo fen for aird, & gniad cach a aimsir. Tabair dam fot sægail i r-rige cach buaid fri h-U Néill, uair is menicc coccad etraind, & tabair dam coscar isin cét-chath cor' bam creitmech isna cathaib aileib.’ & is ed on ro comailled h-i cath Lochair fria h-U Neill.