Corpus of Electronic Texts Edition
Betha Brigte (Author: Unknown)

section 46

Is andsin do-rala comdál fer n-Erenn i Tailltin in airmm a m-boi Pátraic & senad clerech n-Erenn imbi. Do-chuatar dino docum na dála .i. Brigit & epscop Mél. Tainic araile bannscál dócum na dála & lenabb ina láim. & is ed at-bert conid la h-epscop m-Brón in lenabb. Ro díult tra in t-epscop aní-sin. Ro iarfaig Brigit don bánnscail cia o ro choimprestar in gein, & ro raid fria co na h-ebred bréic. Ro frecair in ben: ‘Is o epscop Brón’, ol si. Ro lín tra att a tengaid fo chétoir co na coemnacair labra. Do-rat Brigit arrdhe na crochi dara bél na nóiden. & ro iarfaig: ‘Cia th' athair-siu?’ Ro recair in nóidiu & is ed at-bert: ‘Duine deroil fil an imul in airechta is e-sin m' athair’, ol se. Co ro særad epscop Brón amlaid-sin tria rath m-Brigte.