Ro ermitnig in draí & a setig in Coimdid triasin firt at-chonncatar conid annsin at-bert in drai fria Brigit: IN t-imm & na bú ro bligis ídpraim-sea duit iat. Nis-bia in daire dam-sa acht fogain don Choimdid. Ros-frecair Brigit dó & at-bert fris: Ber-siu na bú & tabair dam-sa sairse mo máthar. At-bert in drúi: Acht særfaither do máthair. Do-bérthar duit na bú & se cip ní at-béra do-génsa. Ro fodail Brigit na bú do bochtaib & doa idilcnechaib Dé. Ro baitsed in drai & ba h-iressach & bói i comitecht Brigte o sin immach.