Lotar iar sin dochumm a tíre .i. Dubthach & a íngen .i. Brigit h-i crích h-Ua Failge. Conid andsin dos-gní Brigit firt n-amra .i. a mummi bói a n-indlubra galair. & fóidis in mummi intíí noem Brigit & araile ingin immalle fria. Do thig araile fir, Boethcú a ainm-side, do chuinchid dige do chormaimm fair. Érais Brigit. Ro lín Brigit iar sin lestar as araile topur & ros-bennach co ra soud i m-blass chormma & dos-beir da mummi co m-ba h-ógslan de fo chétoir. IN tan tra do-coas dia h-ól na flede ni frith banna di.