Corpus of Electronic Texts Edition
The Martyrology of Oengus the Culdee (Author: Óengus mac Óengobann)

DA REMFHOCUL.

I. LEBAR BRECC

{folio 75a}

Cethardai cond-agar da cech elathain .i. locc & aimser & persa & fáth airicc.

IS fissi cid armad locc conesta ar tús, & aimser isin lucc thanaisi, & persa isin tres lucc, & fath airicc in fíne.

IS aire is locc ar tus, ar is fri cathardu & eclaisi do-miditer luicc .i. prim-luic, & cádus doib-side.

Fri rigu & tuathu didu do-miditer aimsera. Locc tanaisse do suidib.

Persa immorro isin tress lucc, ar is a h-eclais no a tuaith aircthid cacha h-elathan.

Tucait post, ara fríth fath rem-techtais dona filedaib archena meretrix.

No didu sechim na fellsam fil and .i. locc ar tús, ar is corpdai locc. Aimsear isin locc tanaisse, ar is nem-chorpdai. Persa isin tress lucc, ar is ó churp & nem-churp do-airis. Fath airic didu sicut dixit.

No is ord airic chrutai na n-dúl fil and .i. locc ar tús, ar is dia máirt do-rignead talum. Aimser isin lucc thanaisi, ar is dia cétain do-rígned grian & éscai, & is friu-side do-miditer aimsera. Persa isin tress lucc, ar is dia h-aine do-rígned in duine. Tucait immorro fo dera, ar is dia sathairn ros-bendach Dia na dúile & ro faillsig fáth a n-airicc.

IS h-i immorro aimser i n-dernai Oengus Aengus immorro M Ængoband, M Oiblein, M Fidrui, M Diarmuta, M Ainmirech, M Cellair, M Oengusa, M Natsluaig, M Coelbuid, M Cruind Ba Drai, M Echach Cobai. in Félire .i. aimser Aeda Ordnige maic Neill Fhrassaig, ar is e ro gab rige n-Erenn

p.4

i n-diaid Dondchuda maic Domnaill,uair ticc Oengus isin broluch thoisiuch in Fheliri le bás Dondchada.

Do Fothud na Canoine immorro ro taispén Oengus ar tus in Félire dia n-dechaid Aed for sluaiged Duin Chuair h-i co-crich Mide & Laigen, & dia n-dechutar clerig Erenn lais im Chonnmach comorba Patraicc. Ocus is for in sluagad-sin ro saertha clerig Erenn ar fecht & sluagad, ar is e Fothad na Canoine ruc in m-breith dia ro saertha eculsa Erenn, amail at-bert:

    1. Eclas Dé bíí,
      léic díi anas n-ái,
      bíd a cert for leth,
      feib as dech ro bái,
    2. Cech fír-manach fil
      for a chubus glon,
      dond eclais dian dír
      gníd amal cech mog.
    3. Cech dílmain iar sin
      fil cen recht, cen réir,
      cet cia théis fri báig
      Aeda náir maic Néill.
    4. Is h-í ind ríaguil chert
      sech ní mór ní becc,
      fognad cách Dé mog
      cen on is cen ecc.

      Eclas Dé bíi.

Ro shaer tra Aed Ordnige eculsa Erenn & a clerchiu for sluaiged o sin immach. Ro thaispen didu Fothud cetul na canoine & cetul na cosaite do Oengus, & da-ronsat a n-óentaíd annsin, & ros-bennach cách dib elathain aroile & for-fácsat ratha imda for intíi nos-gebad cu menic in Félire. h-It e em inso ratha in Fhelire, amal ata isin bróluch degh-dinach don Félire fessin.

IS fissid didu cia aiste triasin n-dernad in Félire. Ni anse: Rindard. Caide ém aichne rinnairde? Ni anse: sé sillæba in cach cethrumthain & .xii. isin lethrand .xx.iiii. immorro isin rand chomlan, et si sit plus minusue error est (is pudar). Recomarc immorro .i. de-shillabach ina rennaib, is fuire-side da-roine Óengus in Félire, & for tri gneib didu .i. for réid rindaird (.i. for rinnaird dá n-ard),& for rinnaird tri n-ard & for rinnaird .iiii. n-ard.

p.6

Rinnard da n-ard cétamus inso, ut Beccan mac Cula dixit, no is e Erurach Indse Moire:

    1. Diarmait maith mac Cerbaill,
      can aige cen laice,
      ni ro chluine meirlech
      a eirlech, a traite.

Ocus amail at-bert Oengus beos:

    1. For kalaind mis Marta
      nid mordai fria n-guide,
      Senan, Moinend, Myse,
      Dabid Chille Muine.

Rinnard immorro tri n-ard inso:

    1. Fland Tendalach Temrach,
      tend-rig Fotla feraind,
      otha anall do menaimm
      isí a chland do-gegaind.

Ocus amail at-bert Oengus beos:

    1. Re síl dalach doine
      toided in ri remain,
      luid fo recht, ard erail,
      Críst i kalaind enair.

Rindard .iiii. n-ard inso, ut Fothuth na Canoine dixit:

    1. Aed Ordnige Obaig
      for flaith Banba bledig,
      coich is ferr im falaig
      ina Ectoir Ailig.

Ocus amail at-bert Oengus:

    1. Lassar greíne áine,
      apstol Erenn uaige,
      Patraic cu meit mile,
      rop dítiu diar truaige.

Loccus huius artis Cúil Bendchuir a Muig Reicheat, h-i Crich h-Ua Fhailge arái thindscetail, h-i Cluain Éidnech immorro a ermor, h-i Tamlachtu Librén a fhorbu uile, ut alíi.

Persa dó Óengus mac Oengoband maic Oeiblen, do muintir Cluana Éidnech.

I N-amsir Chobthaig Choeilbreag.

IS h-é in fochund: fecht do-lluid Oengus do Chúil Bennchuir a Muig Rechet, co nus-facca lige and, & ba lán do ainglib iter neam & lar uasin lige. Co ro iarfaig-sium de sacurt na cille, cia ro adnocht isin lige ucut? Senoir truag ro bui isin baile, ol in sacurt. Cia maith do-gníd, ol Oengus. Nis-faicinn-se a maith sunnraid, ol in sacurt.

p.8

Cia rét iter do-gníd, ol Oengus. Noeim in domain do thuirem, ol in sacart, do neoch ba cumain lais dib, fo lige & fo érgi, amail ba bés do ath-loechaib in domain. A mo Dé nime, ol Oengus, cip e do-gneth tria filidecht trílig moltai dona noemaib ropu mor a lóg dó in tan is for in ath-laech tanic rath na méti ucut.

Ro thinscain tra Oengus a fhélire indsin. Da-roine didu a medon-raind i Cluain Éidnech. h-I Tamlachtu .i. isin aith immorro ro forbad .i. i n-aimsir Moel Ruain do-ronta h-e.

.xx.iiii. sillaba in cach rand, et si sit plus minusue sicut praedictus error est, etc.

II. LAUD 610.

{folio 60a, 1}

Ceathardai conn-agar do cech eladhain .i. loc & persa & aimsir & cuís scribind. At cuintesta dano dond eladain-sea.

Loc ém chitius di Cuil Bendchair i m-Maig Rechet i Crich Ua Failge, & ind áith i Támlachtain i n-dernad dano ní de. Í Cluain Éidnech a thindscetal immorro, í Cúil Bendchair, & a forba issind áith í Tamlachta.

Oengus immorro mac Oengobann mic Oebléin mic Fhidhrui mic Diarmata mic Ainmire mic Cellair mic Oengusa mic Nat Sluaig mic Caelbaid mic CruindBa Drai, mic Eochach Coba, mic Luigdech, mic Rossa, mic Imchatho, mic Feidlimthe, mic Cais, mic Fhiachrach Araide, a quo Dail n-Araide, nomenatur in persu.

IS h-í immorro aimsir i n-dernad .i. aimsir Aeda Oirdnide, ar issé ro gab rigi n-Eirend a n-diaid Donnchada, ár tic Oengus issin broluch tóisech ind fhelire tar bás Donnchada.

IS í immorro in chúis. Fecht n-óen do-rala ó Disiurt Oengusa i m-Mumain co Cúil Bennchoir oc techt do gabail Mail Ruain i Tamlachtain d' anmcharait. Co n-acca adhnacul issin chill & ba lán do ainglib uassa co nem. Co ro iarfaig Oengus do shacart na cilli, cia ro adhnacht and.

p.10

Araile ath-laech truag bói issin baile, ar in sacart.

Cia maith do-rigne-side, ar Óengus.

Ni fhaicmis émh, ar in sacart, nach maith do denam dó, acht nóeim in domain do thuirim fo lighi & fó eírgi, amal is bés ath-laech.

A Dé nime, ar Aengus, cip é do-gneth trírig molta do nóebaib ro pad mór a lóg dó.

Co ro thinnscain iarum in Félire annsin fo chétoir. Í Tamlachtain immorro ro forbad.

Ceithri sillæba fichet í cech rand, dia m-bé plus no minus is mell.

Do Fothud na Canone immorro ro thaispen Oengus ar tus in Feileire dia n-dechaid ar slóiged Dúin Chuair, & cleirig h-Eirenn immaille fris im Chonnmach comarba Patraic, & is don t-shluaiged-sin ro sóertha cleirig ar sluaiged, ár issé Fothad ruc in m-breith dia ro sóerad ecailsi Eirenn, amal is-bert feisin:{folio 60a, 2}

    1. Eclas Dé bí
      leic dí anas n-ái
      bith a cert for leth
      feib is dech ro bói.
    2. Cach fír-manach fil
      for a chubus glan
      dond eclais diantír
      gníd amal cach mod.
    3. Cach dilmain iar sein
      fil cen recht cen reir,
      cet cia thes fria baig
      Aeda náir maic Néill.
    4. Is h-í in riagol chert
      sech ní mór ni bec,
      foghnad cach Dé mogh
      cen on is cen ecc.

      Ecclas.

Ro thaispen dano Cetal na Canoine & Cetal na Cosaite do Aengus, & do-ronsat a n-aentaig annsin, & ro bendach cach dib eladhain araile, & for-fácsat ratha imdai forintí non-toscebad co minic. Ata imda ém ratha ind Fheilire chitus, amal tuirmither issin broluch déidenach.

IN t-Aengus-sin tra ro bo mogh umal inissel do Dia h-é, & issé no chanad a th-shalmu amlaid-seo céin bói ic Disiurt Oengusa .i. l. isind abhaind & gat imma bragait i cengul don bile .l. dano fón m-bile feissin, & .l. ina reicles.

p.12

Ro indsaig dano iartain co Mael Ruain co r-ragbad h-e d' anmcharait.

IS é immorro in Mael Ruain-sin ro chind na gebad ferand i Tamlachtain nóco n-gabad Michel frisa raibe a charadrad conid triasin cairde-sin atat minda cossecartha do Michel i Tamlachtain. Eccmaing tra fecht n-óen iar sin cindiud-sin eipisdil & fót imalle fria do chur de nim co Mael Ruain, co r-ragbad ferann, conid annsin iarum ro gabad Tamlachta.

Do-ruacht iar sin Aengus i r-richt moghad chuice, & ro erb Mael Ruain fris frestal na h-atha. Ro gab-sum sin do laim, & issed indister ann co ro fhas in fochand triana folt ar mét ind fhognuma.

Do-rála didu fecht ann mac becc oc léigiunn a t-shalm la Mael Ruain, co n-dechaid in cleirech fecht n-óen don eclais, co ro erb don mac mebrugud a aiccepta comad erlam fria thaispenad ara chind. Élaid immorro in mac, ór nar' t-sháil anní-sin, & issed do-rala h-é don áith co h-Aengus. Iarfaigis iarum de cid ro m-bói. Indissid in mac dó. Tair ille, ar Aengus, & tabair do chenn for mo glún & cotail. Do-rigned amlaid. Eirgis in mac iar sin. Is ann at-bert Aengus: geib t' aiccept, a mic. Geibid iarum in mac ní ba h-uilliu innás in t-aiccept. Ca raét sin, a mic? ar Aengus. In léighind uili ocum, ar in mac. Imthig, ar Aengus, & na h-ataim cia rus-taraill. Téit iarum in mac & taispenaid in t-aiccept do Mael Ruain, & rathaigis Mael Ruain co raibe aice ní bud mó, & iarfaigis de, cia do táraill, a mic. Ní fhetar, ar in mac. Bréc ém sin, ar an cleirech, abbair co luath. Ní fhetar, ar in mac, acht dom-rala don aith & do chotlus & mo chend for glún fhir na h-atha. Is fír sin, ar se. Is é Aengus in tairngertaig sin, & tic amach co h-opunn iar sin, & ní thuc acht leth-assa imme, & ro soich in n-aith. Maith, a Aengais, ar se, nir' bo chóir duit ar m-brécad, uair ba córa sinde ic foghnam duit-siu inna thussa duind-ne.

Ruc Mael Ruain leis h-é iar sin co n-onoir moir, & slechtais Aengus dó, & do-gniat a n-aentaig in n-aentaig in nim & i talmain. Conid amlaid-sin iarum ro foillsiged Oengus do Mael Ruain.

p.14

IS fisid {folio 60b, 1}didu cia h-ernail aisti triasa n-dernad in Feilire. Ni ansa. Rindaird. Is fisid didu caide aithne rindairde feissin. Ni ansa. Sé sillæba ina cethramnaib, & a dó déc ina lethrannaib & a cethair .xx. ina rannaib chomlana, et si sit plus minusue is pudur.

Recomarc immorro ina reannaib, re chomraic .i. dé-sillabach. Forsin ernail airigthi didu don aisti-seo dianad ainm réid-rindard .i. rinnard da n-ard, do-roine Aengus in Feilire, & tri gnee fuirri-side .i. réid-rindard da n-ard, ut est Becan dixit, nó inde in t-Eruirech Indsi Móire dixit:

    1. Diarmait maith mac Cerbaill
      can aige gan laice,
      ní ro cluine meirlech
      a eirrlech a traite.

Ocus amal as-bert Aengus:

    1. For calaind mis Marta
      nid morda fria n-guidhi,
      Senan, Moinend, Moysi,
      Dabíd Cilli Muine.

Ocus reid-rindard tri n-ard, ut Mael Mura Fothna cecinit:

    1. Fland Tendalach Temrach
      tend-rí Fodla feraind
      ótha anall do m-muinim
      isi a chland do-geogaind. .i. do togfaind.

Ocus amal as-bert Aengus:

    1. Re sil dalach daine & rl.

Rindard ceithri n-ard immorro, amal as-bert Fothuth na Canoine:

    1. Aed oirdnige Obhaig
      for flaith Banba blaidig
      cuich is ferr im fhalaid
      ina Echtair Ailig.

{R2§}Amal as-bert Aengus:

    1. Lasar gréne áine
      apstal Erenn óige
      Pátric go méit míle
      rop dítiu diar tróige.

Ata fidrad cubaid etir tosaichib na rann & deridib na rann eli.

    1. Taided remainn sligid saethrach
      co saeraib sil Gaidil gairg
      cosin n-daig-thech n-oibind n-ethrach
      ro gab fine Echdach aird.      §

p.17

FÉLIRE ÓENGUSSO CÉLI DÉ.

IN PROLACH.

  1. 1] SÉN a Chríst mo labrai,
    2] a Choimmdiu secht nime!
    3] dom-berthar búaid lére,
    4] a rí gréne gile!
  2. 5] A gel-grían for-osnai
    6] riched co méit nóibe,
    7] a rí con-ic aingliu,
    8] a Choimmdiu na n-dóine!
  3. 9] A Choimmdiu na n-dóine,
    10] a rí fírén fír-maith,
    11] condom-roib cach solad
    12] ar molad dot rígraid.
  4. 13] Do rígrad no molur,
    14] ol is tú mo ruiri,
    15] do-ralus ar m' airi
    16] gréschi occa n-guidi.
  5. 17] Guidiu itge doaib,
    18] romm-ain a n-do-rogbus,
    19] caín popul co l-lígdath,
    20] In rígraid im-rordus.

    6. p.18

  6. 21] IM-rordus in rígraid
    22] imon ríg ós nélaib,
    23] aill úas laithib lígdaib,
    24] aill fo díanaib déraib.
  7. 25] Dom-rorbae domm théti,
    26] ol am tríamain tróg-sa,
    27] íar timnaib ind ríg-sa
    28] rith ro ráith in slóg-sa.
  8. 29] Ro selgatar rótu
    30] nád soréid la báethu,
    31] réna techt don rígu
    32] ro dámatar sáethu.
  9. 33] Ro sonnta fíad slógaib,
    34] oté cona m-brígaib,
    35] ro brúithea i n-dálaib,
    36] ro orta fíad rígaib.
  10. 37] Ro ringthea co r-rindib
    38] ro tenntea i r-randaib,
    39] ro loiscthea úas tentib
    40] for lúach-thétib lannaib.
  11. 41] Ro láithea for bíasta
    42] la berga cen enech,
    43] sroiglithea, seol calad
    44] trésna surnu tened.

    12. p.19

  12. 45] Do-uctha a carcraib
    46] i crochaib a sennad,
    47] in t-shlóig occa sinnad
    48] iarna fóebraib fennad.
  13. 49] Fáilti fri cech n-aidid
    50] asa fortrén fíäm,
    51] fo-damtis án cróän
    52] már do ríagaib ríám.
  14. 53] Ro dámatar uili
    54] núall-sa, mór n-gním n-gaile,
    55] ar fhír-thuillem m-buide
    56] fri Íssu macc Maire.
  15. 57] Mairg cách roda-ort-som
    58] ro lámair a n-guin-som!
    59] iarna sáethur gair-som
    60] ot é céin nos mairseom.
  16. 61] Mór-ríg inna n-gente
    62] bith-golait i l-loscud,
    63] slóig Íssu cen escur
    64] it fáilti iar coscur.

    17. p.20

  17. 65] In chóraid las rorta,
    66] co n-imbud a n-dúire,
    67] ar-rochiúir a n-áine,
    68] it fássa a n-dúine.
  18. 69] It é iarna sáethaib
    70] ro-síachtatar ríge,
    71] a r-rúama cen táde,
    72] it bordgala míle.
  19. 73] Mílid roda-crochsat
    74] céptar bailci bressa,
    75] a píana it brassa,
    76] a l-lige ní fessa.
  20. 77] Nímthat mílid Íssu,
    78] ráncatar treib tóidlig,
    79] dia n-éiss a cuirp chráibdig
    80] i m-memraib óir óiblig.
  21. 81] It aidbli fíad scoraib
    82] rígrad Chríst iar fuilib,
    83] ríg domain iar tolaib
    84] ro fírscáich ar suidib.
  22. 85] Hirúath ocus Pilait
    86] fua ro chés ar Fíada,
    87] for-orcennta a m-bríga,
    88] bith-marait a píana.

    23. p.21

  23. 89] Íssu cé ro crochad,
    90] ar Coimmdiu, ar n-gérat,
    91] for cech. n-dúil do-rósat
    92] is óg-rí as-réracht.
  24. 93] Cérbo rí in domuin
    94] Nabcodon rúad ro-glach,
    95] ó bebais lia theglach
    96] a ordan do-rodbad.
  25. 97] Nímthá Sen Phól manach,
    98] asa díthrub dubach,
    99] fría noéb-ainm co r-ro-rath
    100] séntae cech slóg subach.
  26. 101] Cé rod selaig claideb
    102] Iohen bauptaist m-brígach,
    103] for bith ché ro mórad,
    104] i flaith Dé ro rígad.
  27. 105] Hirúath cona rígain,
    106] las rort co lín ilach,
    107] nír at-gab, réim calad,
    108] talam na nem ninach.
  28. 109] Nóeb-ainm Petair apstail
    110] at-sluindi cech senad,
    111] nicon fhiu la credal
    112] do-rogra ainm Neran.

    29. p.22

  29. 113] Neir ní fess a lige,
    114] deithbir ní bo chretair ,
    115] in bith co l-lín phopuil
    116] móraith lechtán Petair.
  30. 117] Prím-shuide do Nerain.
    118] i n-airenuch phéne,
    119] Pól apstol, ard áge,
    120] ad-reth richid réde.
  31. 121] Ro scáich ordan Neran,
    122] is erchían ó shuidiu,
    123] ainm Póil, búan a togu,
    124] attá són for tuiliu.
  32. 125] Cíarbu tholgdae rígain
    126] Phelait a múr chlúime,
    127] ar-rochiúir a h-áine
    128] ó luid i l-loc n-úire.
  33. 129] Nímthá Maire Ingen,
    130] inmain a dún daíngen,
    131] síl n-Adaim, ard n-imbel,
    132] mórthus la slóg n-aingel.
  34. 133] Cíaptar áilli ili
    134] maicc Deic dric nad charam,
    135] nicon fhess na romar
    136] ainm naich h-é for talam.

    35. p.23

  35. 137] Nímthá Ciric maccán,
    138] a mór-scél ro sretha,
    139] ba cain géim a chatha,
    140] ro lín burgu betha.
  36. 141] Bíd ar menmae uile
    142] ar thúaith Dé, nad celam,
    143] is torbe dian promam,
    144] in prolach do-beram.
  37. 145] Is bréc bríg in domain
    146] do chách dia m-bí baile,
    147] is sí in bríg uile
    148] serc mór do Macc Maire.
  38. 149] Cit móir ríg in domain
    150] a n-dúíne ad-chíssiu,
    151] fo chét cét it uaisliu
    152] amsáin ísil Íssu.
  39. 153] Cíat ísliu fíad dáinib.
    154] co n-delmaim a n-grethae,
    155] bit áird úas dind fhlatha
    156] tria bithu na m-bethae.
  40. 157] In bith trúag h-i táam
    158] is duthain a ríge,
    159] in rí con-ic aingliu,
    160] is Coimmdiu cech thíre.

    41. p.24

  41. 161] cid a tír i táam
    162] ata saidbri saigthi,
    163] di neurt Dé, deilm sochlae,
    164] fil and dún ro phraidchi.
  42. 165] At-bath borg tromm Temro
    166] la tairthim a flathe,
    167] co l-lín corad sruithe
    168] maraid Ard mór Mache.
  43. 169] Ro múchad, mór tairbaid,
    170] míad Lóiguiri ro-glaig,
    171] ainm Pátraic án aurdairc
    172] atá són for forbairt.
  44. 173] For-forbairt in chretem,
    174] méraid co dé m-brátha,
    175] genti bibdaid bertair,
    176] ní trebtar a r-rátha.
  45. 177] Ráth Chrúachan ro scáichi,
    178] la h-Ailíll gein m-búada,
    179] cáin ordan úas fhlathib
    180] fil i cathir Chlúana.

    46. p.25

  46. 181] Classa búana bindi
    182] im Chíarán ci at-coïs,
    183] la séssilbe m-búada
    184] Chlúana móir Maicc Noïs.
  47. 185] Níptá ní bas dílsiu
    186] seirc Dé ma da-rónaid,
    187] adrad in ríg nélaig,
    188] is de ní bet brónaig.
  48. 189] Borg Aillinne úallach
    190] at-bath lia shlóg m-bágach,
    191] is mór Brigit búadach,
    192] ís cáin a r-rúam dálach.
  49. 193] Borg Emna ro tetha,
    194] acht mairde a clocha:
    195] is rúam iarthair betha
    196] Glenn dálach Dá Locha.
  50. 197] Lóichet laindrech lígach
    198] Fernae for-trén éobail,
    199] ní mair in drong úabair
    200] ráith Bécce maicc Éogain.
  51. 201] Cid ná:d n-déccaid uili
    202] bretha in ríg cétnai?
    203] ní mair Bécc macc Éogain,
    204] maraid Aed macc Sétnai.

    52. p.26

  52. 205] Sen-chathraig na n-gente
    206] imma rérad rudrad,
    207] it fássa cen adrad,
    208] amail Lathrach Lugdach.
  53. 209] Ind locáin ro gabtha
    210] déssib ocus trírib,
    211] it rúama co n-dálaib,
    212] co cétaib, co mílib.
  54. 213] Ro milled in gentlecht
    214] cíarbo lígdae lethan,
    215] ro lín flaith Dé Athar
    216] nem, talam la trethan.
  55. 217] Táthunn ní as nessa
    218] ar ar súil salm sobail,
    219] de neurt Dé, dian medair,
    220] in-díu deüd domain.
  56. 221] Donnchad dric rúad rogdae,
    222] nó Bran búadach Berbae,
    223] ní beir dím sním lobrae
    224] athigid a m-memrae.
  57. 225] Mael Rúain iarna gairi,
    226] grían már des Maig Midi,
    227] occa lecht co n-glaini
    228] ícthair cnet cech cridi.

    58. p.27

  58. 229] Is com-iúir in Coimmdiu
    230] cé thúirtir a thréta,
    231] bith-trágaith a náimtea,
    232] bith-máraid a gréta.
  59. 233] In gorm-ríg ro múchtha,
    234] in Domnaill ro plágtha,
    235] ín Chíaráin ro rígtha,
    236] in Chronáin ro mártha.
  60. 237] Na mór-shlébe andaig
    238] ro tesctha co rinnib,
    239] do-rónta co l-léce
    240] slébte donaib glinnib.
  61. 241] Cía ron-beth do chingthecht,
    242] cath fri Demon détlae,
    243] diar combair, ard áge,
    244] maraid in Críst cétnae.
  62. 245] Cit úallaig ríg talman
    246] i tlachtaib at glainiu,
    247] at-bélat iar tuiliu,
    248] téit cách ría n-arailiu.
  63. 249] In rí cain co n-goiri,
    250] Íssu úas tuinn tuili,
    251] mad-génair ó Mairi,
    252] maraid dia n-éis uili.

    64. p.28

  64. 253] Ro lénad nert Demuin
    254] cona dub-shlúag dígnai,
    255] bith-maraid i n-úagai
    256] nert rúanaid ar rígnai.
  65. 257] Cia resme fo a mind-som
    258] do-rega a rann-som,
    259] ol ní tiamdae tim-som
    260] ní émsither ann-som.
  66. 261] Bad sonairt ar n-airle,
    262] ascnam anas dílsiu,
    263] ar issed as úaisliu
    264] caram uili Íssu.
  67. 265] A Íssu not-guidiu
    266] ar écnairc na slóg-sa,
    267] do thol in maith mór-sa,
    268] a rím-som do-rón-sa.
  68. 269] Do-rón-sa do réir-siu,
    270] a Rí Sión slúagaig,
    271] ro bith-béo lat rígraid
    272] ísin bith-fhlaith búadaig!
  69. 273] Ro béo-sa fort láim-siu
    274] isind fhlaith i m-bí-siu!
    275] bendacht cecha bordgal
    276] for t' ordan, a Íssu!
  70. 277] A Íssu con-ruidiur
    278] do rígrad do rélad,
    279] iarsind urd do-chúatar
    280] cucut for nem nélach!

    71. p.29

  71. 281] Ní fil isin blíadain,
    282] a Chríst, cé ro-clunter,
    283] laithe isind alltar
    284] nach at-rised munter.
  72. 285] Is menann, a Ruiri,
    286] a Rí rímter flaithi,
    287] sluindfem-ni cen loithi
    288] sóer-chaindlea cech laithi.
  73. 289] Ar lebráin nos-túirfem
    290] fri nech for a n-íarair,
    291] regmi cen nach díchiul
    292] cech n-díriuch don blíadain.
  74. 293] Bid h-é corp ar n-aicde
    294] admat na ba tíamdae
    295] com-lín caiptel cóemdae
    296] fo lín laithe m-blíadnae.
  75. 297] Ar ná bé for crinniur
    298] do intliucht co saichi,
    299] cech caiptel cen loithi
    300] sloindfith féil cech laithi.
  76. 301] Laithe na mís már-sa
    302] fris-reith in grian búan-sa,
    303] ar in sluaiged n-án-sa
    304] ní brúifem an núall-sa.

    77. p.30

  77. 305] Nóna ocus ída.
    306] réim calne co fíri,
    307] fort margan co m-báni
    308] bieit inna líni.
  78. 309] Lile-siu do laithib
    310] it lebránaib lérib,
    311] lile-siu iar línib
    312] co l-léir donaib félib.
  79. 313] Mani tuicce samlid
    314] ord fil for ar lóidib,
    315] nod-dlomaim fíad dálaib
    316] it dall-chéilliu dóinib.
  80. 317] Dénam tormach n-eólais
    318] do intliucht co saichi:
    319] cech caiptel cen loithi
    320] sluindfid féil cech laithi.
  81. 321] Laithe na mís n-gréine
    322] ním-fhóir-sa a salland,
    323] diar lóid arnáp inmall,
    324] acht dá sé cáin calland.
  82. 325] Ón challaind co alaili
    326] ním-fhóir-sa íar sétaib,
    327] acht cóic caiptil uasail
    328] sescat ar trib cétaib.

    83. p.31

  83. 329] Oc cuindgid na féle
    330] assa for-trén taitnem
    331] túir la fége frithgnam
    332] co l-léir ord na caiptel.
  84. 333] In t-ord inna caiptel
    334] cona lóidib lérib,
    335] is é ord iar línib
    336] file forsna félib.
  85. 337] Flaithem nóeb na n-dúile,
    338] Críst macc Maire nóibe,
    339] Íssu inmain áge,
    340] tóided ré síl dóine.

p.33

FÉLIRE OENGUSSO CÉLI DÉ.

MÍ ENAIR.

  1. A. Kalendis Januarii.
    1] Re síl dálach dóine
    2] tóided in rí remáin
    3] luid fo recht, ard eráil,
    4] Críst i callaind enáir.
  2. B. iu. Nonas.
    5] Esodir in t-epscop,
    6] abb ecailse ardae,
    7] Manchéne án Airce,
    8] Scothíne mind Margae.
  3. C. iii. Nonas.
    9] Már-martrae Rodonis
    10] cona chléir, cain ésce,
    11] Fintan co feib úasle,
    12] Findlug derb Dúin Blésce.
  4. D. Pridie Nonas.
    13] Bás caid Aquilini
    14] co m-buidin ba balcu,
    15] h-i fuil Chríst trea curpu
    16] do-cóemnachtar tlachtu.

    5. p.34

  5. E. Nonis.
    17] Togairm Semeoin srotha
    18] co Críst, cruth ron-gléä,
    19] ba cain-grían, greit núa,
    20] Ciar ingen Duib Réä.
  6. F. uiii. ante Idus.
    21] Ráith co ríg, rán togae,
    22] Iulián all n-glaine,
    23] ní dlig sár, slán subae,
    24] bathes már Maicc Maire.
  7. G. uii. ante Idus.
    25] Martrae Luciáni
    26] co slóg már ba díxu,
    27] im-rordus as h-úaisliu
    28] tossach corgais Íssu.
  8. A. ui. ante Idus.
    29] Estecht Egemoni,
    30] epscop etlae ardae,
    31] Ercnat uág án orbae,
    32] Nechtán nár de Albae.
  9. B. u. ante Idus.
    33] Aildi géill co n-glaini
    34] ar gnúis ríg ro rádis,
    35] Fáelán deodae dígrais,
    36] Felix Find, Uitális.

    10. p.35

  10. C. iu. ante Idus.
    37] Almi-ni a n-itge
    38] náchan tecma droch-rann,
    39] Mílit cáid cain cathbarr,
    40] Diarmait Inse Clothrann.
  11. D. iii. ante Idus.
    41] Croch in martir Phetair,
    42] cona shlúag lán gaile.
    43] a h-Egipt, án subae,
    44] tánic Macc már Maire.
  12. E. Pridie Idus.
    45] Martrae már Muscenti
    46] cona chléir cháin chlandaig,
    47] Críst as rúna rindaid
    48] Laidcenn macc Baíth Bannaig.
  13. F. Idibus.
    49] A m-bendacht ron-bía
    50] balc itge cen algis,
    51] Sulpic sochlae suabais,
    52] Helair abb Pictauis.
  14. G. xix. cal. Febr.
    53] Pais Gluceri deochain,
    54] diar fiadait ba sercach,
    55] sruith Nolae nóeb sochlach
    56] Felix, Fland find fechtnach

    15. p.36

  15. A. xuiii. cal. Febr.
    57] Fo-ráith már n-gur n-galar,
    58] carais már tromm tredan,
    59] in grían bán ban Muman
    60] Íte Chluana Credal.
  16. B. xuii. cal. Febr.
    61] Cráibdig i féil Fursai
    62] fris-rocabsat ríge,
    63] nói míli, méit búadae,
    64] for fichit már míle.
  17. C. xui. cal. Febr.
    65] Nos-molammar menicc
    66] fobíth nídat calaid,
    67] lucht céssais cen chinaid
    68] i féil Antóin manaig.
  18. D. xu. cal. Febr.
    69] Mórad Petair apstail
    70] i r-Róim, rád as díxu,
    71] lassin líth as úaisliu
    72] bás mór máthar Íssu.
  19. E. xiu. cal. Febr.
    73] Estecht Mairi, Marthae,
    74] coniugum nond-áli,
    75] lassin féil co sóiri
    76] Sen-Phóil cain co n-áni.

    20. p.37

  20. F. xiii. cal. Febr.
    77] Án cethrur con-úagu
    78] for óen-líth as nóebu,
    79] Mo Laca, Mo Écu,
    80] Sabaist ocus Óenu.
  21. G. xii. cal. Febr.
    81] Ropat óin dom shnádud
    82] com ríg—réim as díxu—
    83] Fuinche, feidm as uaisliu,
    84] Agna ingen Íssu.
  22. A. xi cal. Febr.
    85] Estecht ingen Comgaill,
    86] Colmán maccu Béognai,
    87] Ualerius cen dígnae,
    88] Felix fuair cuairt ceóldai.
  23. B. x. cal. Febr.
    89] Césad Sevriani,
    90] Clementi con-sádu,
    91] ron-snádat dond rígu
    92] cona n-dúnud dánu.
  24. C. ix. cal. Febr.
    93] Domm anmain, domm chorpán
    94] rop múr ar cech merblén
    95] Babill, bruth óir fhorlan,
    96] cona thriur dedblén.

    25. p.38

  25. D. uiii. cal. Febr.
    97] Ní dedbul a l-lathe,
    98] líth fris-cuirter grethae,
    99] co Críst cechaing sathe,
    100] Pól i m-bathis brethae.
  26. E. uii. cal. Febr.
    101] Is brígach a l-lóchet
    102] la ríg do-don-farci,
    103] slúag ortae iar n-gortai
    104] la pais Policarpi.
  27. F. ui. cal. Febr.
    105] Carais moéda, Muirgein
    106] mírbail gein co m-búadaib:
    107] birt glan-búaid fiad rígaib
    108] Agnetis deich n-úagaib.
  28. G. u. cal. Febr.
    109] La h-Accobrán úanni
    110] pais ocht n-úag co n-áni:
    111] gabsat búaid co n-dírgi
    112] slúag már Messoriáni.
  29. A. iu. cal. Febr.
    113] Áin epscoip ro rádius,
    114] ron-snádat diar n-dílius,
    115] Hipolitus, Paulus,
    116] Gillas, Constantínus.

    30. p.39

  30. B. iii. cal. Febr.
    117] Cóecae ar cét martír
    118] martrae mórsus dorus,
    119] ainsium ar lín ammus
    120] Enán Roiss rind solus!
  31. C. Pridie cal. Febr.
    121] Sluind Aed fortrén Ferna,
    122] Mael Anfaid ainm remain,
    123] benait co m-Bríg ro-móir
    124] barr find for slúag enair.

p.58

MÍ FEBRAI.

  1. D. Calendis Februarii.
    125] Mórait calaind Febrai
    126] fross martir már n-glédenn,
    127] Brigit bán balc núalann,
    128] cenn cáid caillech n-Érenn.
  2. E. iv. nonas Febr.
    129] Airitiu Maicc Maire
    130] h-i Tempul derb dímais,
    131] slúag már martir súabais,
    132] la Findig n-Duirn n-dígrais.
  3. F. iii. nonas Febr.
    133] Don-remat co l-láni
    134] do grés ar cech trógi
    135] slógad find co féli
    136] Felicis, Simfróni.
  4. G. Pridie nonas Febr.
    137] Fronius ocus Mágnus,
    138] Gelaise ro fésser.
    139] Germán martir úasal,
    140] Cúannae credal crésen.
  5. A. Nonis Febr.
    141] Crochthae corp Agatha
    142] in gérat co n-glaini,
    143] la h-Íssu co n-gili
    144] táthus már maith airi.

    6. p.59

  6. B. viii. idus Febr.
    145] Andreas ard a ordan,
    146] epscop Mel mind rígí,
    147] Lucia co n-áni
    148] nád-cumscaigset míli.
  7. C. vii. idus Febr.
    149] Mellán Inse h-úasle
    150] Maccu Cuinn nan-ále,
    151] Lommán lócharn bríge
    152] Locha Uair ard áge.
  8. D. vi. idus Febr.
    153] h-Aue án ind écis,
    154] ba imm Chríst a labrae,
    155] Fiachrae ba fer ferdae
    156] abb Irarda amrae.
  9. E. v. idus Febr.
    157] Mo Chúaróc ind ecnai,
    158] nóeb ná dámair dígnae,
    159] Cáirech Dergan deodae
    160] epscop Rónán rígdae.
  10. F. iv. idus Febr.
    161] Rétglu chain, gein m-búadae,
    162] bruth óir étrocht áge,
    163] Cronán cáid cen dígnae,
    164] grían gel Glasse Máre.

    11. p.60

  11. G. iii. idus Febr.
    165] Mo Gopnat co n-glanbail,
    166] im sheirc Dé ba h-ilmain:
    167] maith leis gréss dia garmaim
    168] epscop Étchén inmain.
  12. A. Pridie idus Febr.
    169] Immon epscop Simplex
    170] slechtae prím-shlóg promthae,
    171] Damán mil mind martrae
    172] co maccraid cháin crochthae.
  13. B. Idibus Febr.
    173] h-I curchán Mo Domnóc,
    174] anair tar muir n-glédenn,
    175] do-bert, brígach núalann,
    176] síl m-búadach m-bech n-Erenn.
  14. C. xvi. cal. Martii.
    177] h-I r-rói Ualentini
    178] Marcellus ro ringed,
    179] i flaith Chríst ro clandad
    180] ochtmoga cáin cinged.
  15. D. xv. cal. Mart.
    181] Cain celebrad domnaig
    182] i féil Beraig bágaig,
    183] la céssad sluaig brígaig,
    184] búaid Maicc Dé dia námait.

    16. p.61

  16. E. xiv. cal. Mart.
    185] Dond óig Iulianae,
    186] án n-ainm nél co h-imbel,
    187] la sceith scél a annaig
    188] Demon damair indel.
  17. F. xiii. cal. Mart.
    189] Dlomthus cách co h-oll-muir
    190] féil Chormaicc co n-glanbail,
    191] la féil Fintain figlig
    192] Chlúana Ednig adbail.
  18. G. xii. cal. Mart.
    193] Bebais in cáid Colmán
    194] Mo Liba no rádi,
    195] h-i féil chain co nóibi
    196] Rutuli, Siluáni.
  19. A. xi. cal. Mart.
    197] Sluind lett la pais Publi
    198] pais Maircill mind m-búadach,
    199] Baethíne mór máinech,
    200] macc caindeldae Cúanach.
  20. B. x. cal. Mart.
    201] Gaius in t-epscop
    202] a chéssad ní celar,
    203] imma slecht, scél n-dogar,
    204] trichae trén-fher trebar.

    21. p.62

  21. C. ix. cal. Mart.
    205] Togairm Fintain choraig,
    206] post contemptum mundi,
    207] h-i féil cain co l-laindi
    208] Uiruli, Iucundi.
  22. D. viii. cal. Mart.
    209] I n-Antóig a ordan
    210] Petair, at-fét ecnae:
    211] gein Laurint, lán frecrae
    212] la féil tóidlig Teclae.
  23. E. vii. cal. Mart.
    213] Mathias in t-apstal,
    214] ar Chríst céssais ríaga,
    215] dond richiud ron-snáda,
    216] co n-neuch adidn-gíalla.
  24. F. vi. cal. Mart.
    217] La pais Luciani
    218] cruimthir crochtha demnae,
    219] abb h-Íae án ergnae,
    220] Cummíne Find febdae.
  25. G. v. cal. Mart.
    221] Fo-frith cenn Póil apstail,
    222] ind án-chinged credlaig,
    223] h-i féil ind fhir chumrig
    224] Teolis triúin trednaig.

    26. p.63

  26. A. iv. cal. Mart.
    225] Togairm Alaxandri
    226] i sossad sanctorum,
    227] for óen-líth, lán-tene,
    228] gene Tarcellorum.
  27. B. iii. cal. Mart.
    229] La céssad Abundi,
    230] ma ro lóidib lammis,
    231] féil Chomgain cen dinnis,
    232] airec cinn Iohannis.
  28. C. Pridie cal. Mart.
    233] h-I féil Silláin Bennchoir
    234] deich nóeb-óga delbdai,
    235] la céssad slóig fherdai
    236] for-cennat cléir Febrai.

p.80

MÍ MARTA.

  1. D. Calendis Martii.
    237] For calaind mís Marta
    238] nít mórdai fria n-gudi,
    239] Senán, Moinenn, Moysi,
    240] Dauid Cille Muni.
  2. E. vi. nonas Martii.
    241] Ma memraigther féli
    242] h-i pais Lucilíae,
    243] gein Sen-Phóil, slán dóë,
    244] féil find Fergnai Íae.
  3. F. v. nonas Martii.
    245] h-Í pais Floriáni
    246] feil dí rétglainn remáin,
    247] Céle Críst, cain eráil,
    248] Mo Macru macc Senáin.
  4. G. iv. nonas Martii.
    249] Sluind céssad ind epscoip
    250] h-i r-Róim, rígdae, caindlech,
    251] co slúag adbul ainglech,
    252] Lucius lés laindrech.
  5. A. iii. nonas Martii.
    253] Roleblaing, ní balbdae,
    254] a clú tar sál sairde,
    255] Carthach rígdae rúamach,
    256] Ciarán slúagach Saigre.

    6. p.81

  6. B. Pridie nonas Martii.
    257] Ron-snádat íar léri
    258] do fhlaith Dé for dírgi
    259] slóg ortae co n-áni
    260] h-i féil Uictoríni.
  7. C. Nonis Martii.
    261] Inmain decheng deodae
    262] na dlig diar n-dúain dígnae,
    263] Felicitas nóebdae,
    264] Perpetua prímdae.
  8. D. viii. idus Martii.
    265] Senán Inse Cathaig
    266] crochais écrait Nárach,
    267] Conandil clii búadach,
    268] epscop Beóáed bágach.
  9. E. vii. idus Martii.
    269] Bás cethorchat míled
    270] co mór-shlóg ba shorcho,
    271] dia túargaib fri h-ilchu
    272] grían i l-luc dub dorchu.
  10. F. vi. idus Martii.
    273] Do-rograd co h-angliu
    274] Constantín cain coindlech,
    275] lassa fríth éo ainglech,
    276] crann croiche in Choimmded.
  11. G. v. idus Martii.
    277] It coimti ar Fíadat
    278] isind fhlaith uas fhlathib,
    279] Librén, Senán suthain,
    280] Constantín rí Rathin.

    12. p.82

  12. A. iv. idus Martii.
    281] Re ríchtain a fherainn
    282] ar Chríst crochais colainn
    283] in t-organ céit búadae,
    284] Grigoir Rúamae ro-lainn.
  13. B. iii. idus Martii.
    285] Ron-snáda Mo Chóemóc
    286] don bith-choemnu bías,
    287] Cuangus cáid co soas,
    288] ó Liath Mór, maith días.
  14. C. Pridie idus Martii.
    289] Dionis in t-epscop
    290] ata cléri cóema:
    291] com-ainm Círst ron-snáda,
    292] Saluator ron-sóera!
  15. D. Idibus Martii.
    293] Sernn Iacóib ordan,
    294] Lucas lir úas trilis:
    295] fri Críst carsait sanais
    296] maicc Nessáin ónd Inis.
  16. E. xvii. cal. Aprilis.
    297] Inmain acht la Demon
    298] Eugenia for domun,
    299] Abbán doss óir ainglech,
    300] Fínán laindrech Lobur.
  17. F. xvi. cal. Apr.
    301] Lassar gréne áne,
    302] apstal h-Érenn h-óge,
    303] Pátraic co méit míle,
    304] rop dítiu ar tróge!

    18. p.83

  18. G. xu. cal. Apr.
    305] Co m-már-buidin martrae
    306] naptar ili lochtae,
    307] la Tiamdae ro rímed
    308] fiche míled mochtae.
  19. A. xiv. cal. Apr.
    309] Mo Lachtóc la Grigoir,
    310] in grád-greit as díxu,
    311] Ioseph, ainm as úasliu,
    312] aite álaind Íssu.
  20. B. xiii. cal. Apr.
    313] Estecht Policroni
    314] nóib-epscoip as chádu,
    315] cechaing céim as dírgu,
    316] co mór-slúag ba dánu.
  21. C. xii. cal. Apr.
    317] Don bith ba mór m-búadae
    318] Benedicht balc áge,
    319] for óen-líth, ler slúagdae,
    320] Éndae airdirc Arne.
  22. D. xi. cal. Apr.
    321] Ard-chéssad Secundi
    322] cain i m-briathraib bíae:
    323] balc lés lir dar dóë,
    324] Failbe ánle Íae.
  23. E. x. cal. Apr.
    325] Ingen co slúag dermar
    326] Feradaig as ardam,
    327] ó Chríst ad-fét ordan
    328] mo M' Aedóc mind n-Alban.

    24. p.84

  24. F. ix. cal. Apr.
    329] Án lanomain lígach
    330] fris-snaig etla áinbech,
    331] Scíre cain car tredan,
    332] Mochtae credal cráibdech.
  25. G. viii. cal. Apr.
    333] Crochad ocus chombert
    334] Íssu Críst it córi,
    335] for óen-líth co l-léri
    336] la pais Iacóbi.
  26. A. vii. cal. Apr.
    337] I l-Letha do-rochair
    338] Mo Chellóc iar lathib,
    339] féil in t-Shinchill shuthain
    340] Cille aidble Achid.
  27. B. vi. cal. Apr.
    341] h-I sex calaind Apréil,
    342] iar túaslucud anman,
    343] as-réracht, scél n-dermar,
    344] Íssu a brú thalman.
  28. C. v. cal. Apr.
    345] Don-rogra, ron-sóera
    346] sech phíana, ron-séna,
    347] Maria ron-móra,
    348] in mór-Magdaléna!
  29. D. iv. cal. Apr.
    349] La líth ingen m-Baíti
    350] pais slúaig máir co féli,
    351] i féil fir co nh-úagi
    352] Grigoir Nazanzéni.

    30. p.85

  30. E. iii. cal. Apr.
    353] Sluind Mo Chuae Ballae,
    354] bolg co n-ordun anbich,
    355] Colmán ó Lind lígaich,
    356] la féil Tolai chrabdig.
  31. F. Pridie cal. Apr.
    357] Croch nínach Anissi
    358] co cléir báin ba daithiu,
    359] do-beir barr tre bithu
    360] Marta for slúaig saithiu.

p.104

MÍ APRÉIL.

  1. G. Calendis Aprilis.
    361] Sóerait calne Apréil
    362] Ambrois co méit glaine,
    363] con-gaib as mó shubae,
    364] féil de fhélib Maire.
  2. A. iv. nonas Aprilis.
    365] Mór-shlúag Amphiáni
    366] dia m-bu Demon dubach,
    367] drebraing iar cath chalad
    368] issa síd sóer subach.
  3. B. iii. nonas Aprilis.
    369] Slúag Euagair úasail
    370] as-rola sáeth sétaib,
    371] cethorchae de rígaib
    372] ar díb cáinib cétaib.
  4. C. Pridie nonas Aprilis.
    373] Cain Tigernach credal
    374] ar Chríst cech m-báis breuis,
    375] asa m-brucht srúaim soïs
    376] Clúana álne h-Euis.
  5. D. Nonas Aprilis.
    377] I féil máir maicc Cúla
    378] Béccáin co m-búaid lére,
    379] baithes Pátraic prímdae
    380] ad-rannad i nh-Ére.

    6. p.105

  6. E. viii. idus Aprilis.
    381] Herenius in t-epscop,
    382] ata móra míli,
    383] ba cain doss co n-úaigi
    384] h-i Fíadat find fíni.
  7. F. vii. idus Aprilis.
    385] Fínan Camm Cinn Etig.
    386] m-bi már n-delmae:
    387] ba gérat Críst Cainde
    388] ó Shléib bledech Bledmae.
  8. G. vi. idus Aprilis.
    389] Bás Enair in martír,
    390] ba mór tuir a thempuil
    391] nír' áerad lia muintir
    392] Cenn Faelad abb Bennchuir.
  9. A. v. idus Aprilis.
    393] Búaid secht nóeb-úag n-ennac,
    394] h-i cech threib is ráti,
    395] asa fuil nad díbdai,
    396] i féil chain Chadráti.
  10. B. vi. idus Aprilis.
    397] Croch Apolloin cruimthir
    398] ar Chríst cóem tar folaid:
    399] ó Russ Eo, ainm subach,
    400] Cuannae rígdae ro-maith.

    11. p.106

  11. C. iii. idus Aprilis.
    401] Ronn-ain M' Aedóc máinech
    402] ol is bráthir bágach,
    403] h-aue acht ro nóebad
    404] do Dunlang derb dálach.
  12. D. Pridie idus Aprilis.
    405] Dálais—ansae opair
    406] Críst fri Cruiche cretair.
    407] Iuil epscop, abb popuil,
    408] sab sóer suidi Phetair.
  13. E. Idibus Aprilis.
    409] Cona phrím-shlúag sonae
    410] ar gabeóil cech genae,
    411] gérat Críst cain deochoid
    412] Pól Deochoin don-remae.
  14. F. xviii. cal. Maii.
    413] In ríg-epscop Tassach
    414] do-bert ó don-ánic
    415] corp Críst ind ríg fír-bailc,
    416] la commainn do Phátric.
  15. G. xvii. cal. Maii.
    417] Prímdae bréo nád athbi
    418] ar-fich tola tothlai,
    419] ba caín lie lógmar
    420] Ródán lócharn Lothrai.

    16. p.107

  16. A. xvi. cal. Maii.
    421] La Carissim rígdai
    422] asa rúamdae relic,
    423] do-reith duit for sidit
    424] féil in deochoin Felic.
  17. B. xv. cal. Maii.
    425] La féil Petair deochain
    426] drebraing martrai m-búadae:
    427] cona chléir, caín dine,
    428] Donnán Eca h-úarae.
  18. C. xiv. cal. Maii.
    429] Ar-fét i féil Septim
    430] sóer-deochoin do dídnad
    431] Laisrén lassar búadach,
    432] abb Lethglinne lígach.
  19. D. xiii. cal. Maii.
    433] Luid Ermogin airdirc,
    434] iar forbu a glíad,
    435] co h-Íssu, án sóad,
    436] as uacht chorpáin chríad.
  20. E. xii. cal. Maii.
    437] La céssad Herodi
    438] cruimthir crochtha tuile,
    439] féil i r-Rúaim, rán baile,
    440] nóeb n-Eorapa uile.
  21. F. xi. cal. Maii.
    441] I n-Albain co n-glaini
    442] iar lécud cech shubai,
    443] luid úainn cona máthair
    444] ar m-bráthair Mael Rubai.

    22. p.108

  22. G. x. cal. Maii.
    445] Ronn-ain Pilip apstal
    446] as aidbliu cech threthan,
    447] diand ainm a rúin Athar,
    448] gin lócharne lethan.
  23. A. ix. cal. Maii.
    449] Lóchet epscoip Ibair
    450] as-ort cenn cech erais,
    451] án-breo úas tuind trilis,
    452] i nh-Érinn Bicc bebais.
  24. B. viii. cal. Maii.
    453] Búaid na trí macc n-ennac
    454] h-i surn, sochla díne,
    455] pais Giurgi, grían búadae,
    456] co trichait mór míle.
  25. C. vii. cal. Maii.
    457] Marc úasal i n-Egipt
    458] ná dlig focul faille,
    459] flesc óir, adbul tinne,
    460] epscop mór Macc Caille.
  26. D. vi. cal. Maii.
    461] Cirillus caín cimbid
    462] céssais roë rindi:
    463] do Chríst cachain ailli
    464] co slúag adbul imbi.
  27. E. v. cal. Maii.
    465] Imma-curtis angil
    466] a carcraib cía thésed,
    467] Alaxander úasal
    468] abb Rómae in crésen.

    28. p.109

  28. F. iv. cal. Maii.
    469] Cristofer la Crónán
    470] Roiss Chree co talcai,
    471] inna féil cen sotlai
    472] luid mór míled martrai.
  29. G. iii. cal. Maii.
    473] Martrae Germain chruimthir,
    474] Críst, ba mór a thíachrae!
    475] Coningen cain uaitne,
    476] for óen-líth la Fiachnae.
  30. A. Pridie cal. Maii.
    477] For-cennat cléir n-Apréil,
    478] ol is léir do-rrími,
    479] Rónán Líathroiss Uanni,
    480] i r-Róim croch Ciríni.

p.122

MÍ MÁI.

  1. B. Kalendis Maii.
    481] Calaind Mái Neth Chóeme:
    482] gein Pilipp as díxu:
    483] and tinscann as úasliu
    484] praicept álaind Íssu.
  2. C. vi. nonas Maii.
    485] Escomlud Saturnín
    486] co Críst imme-ránic,
    487] la h-estecht íar sír-chneit
    488] Nechtin daltai Pátric.
  3. D. v. nonas Maii.
    489] Prím-airec crainn chroiche
    490] Críst co n-ilur búade,
    491] bás Conláid caín áge,
    492] féil már Maire h-úage.
  4. E. iv. nonas Maii.
    493] h-I paiss Anatheri
    494] Mo Chuae cain dechaid,
    495] macc Cummíni chlothaig,
    496] i féil Siluain dechain.
  5. F. iii. nonas Maii.
    497] In dechain Eutimus
    498] la Helair sech phíana,
    499] lotar laithe lítha
    500] fris-rócaib ar Fíada.

    6. p.123

  6. G. Pridie nonas Maii.
    501] Fer ro scríb cen tercai
    502] cáin-scéla Críst chrochthai,
    503] ar-muinter la flaithi
    504] gein mór Mathai mochthai.
  7. A. nonis Maii.
    505] Mo Chúaróc la Breccán,
    506] dí gérait at glainiu,
    507] carsait Críst as díliu
    508] i n-Echdromma Dairiu.
  8. B. viii. idus Maii.
    509] Victor ocus Maxim
    510] im Chríst cota-ruicset
    511] ar sheirc ríg ro charsat
    512] inna fuil fo-truicset.
  9. C. vii. idus Maii.
    513] Foillsigud mór Michéil
    514] don bith, ba scél promthae,
    515] paiss Cirill caín carthae,
    516] epscop Sanctáin sochlae.
  10. D. vi. idus Maii.
    517] h-I síd-fhlaith ind altair
    518] i m-bí toirm cech thempuil,
    519] ron-snáda in slúagach
    520] Comgall búadach Bennchuir.
  11. E. v. idus Maii.
    521] Búaid n-Ióib cen dermat,
    522] do ríg nél ba fordarc,
    523] Mo Chrítóc cáin muinter,
    524] ocus cruimther Cormacc.

    12. p.124

  12. F. iv. idus Maii.
    525] Cyriacus crochthae
    526] trib cétaib don-ascnai,
    527] Ailithir ainm cóemdae,
    528] la h-Erc nóebdae Nascai.
  13. G. iii. idus Maii.
    529] Nóeb-muinter Taraci
    530] Probique iar sétaib,
    531] iar serb-chrochaib síraib
    532] seser ar sé cétaib.
  14. A. Pridie idus Maii.
    533] Corona ocus Victor
    534] cona cléir cen mathim,
    535] for óen-líth, ler suthain,
    536] féil cháin Charthaig Rathin.
  15. B. Idibus Maii.
    537] Rath in Spirto sechtai
    538] senaig for cléir n-gelbain,
    539] Tiamdae, Sárán saidbir
    540] féil Duiblitir dermair.
  16. C. xvii. cal. Iunii.
    541] Togairm Brénainn Chlúana
    542] isin m-bith-fhlaith m-búadaig,
    543] bás cáid Carnig chráibdig,
    544] féil án h-aui Shúanaig.
  17. D. xvi. cal. Iunii.
    545] Slóiged Adrionis,
    546] Uictoris, Basille:
    547] scorsit cen chuit fainne
    548] for dind flatha finde.

    18. p.125

  18. E. xv. cal. Iunii.
    549] Féil Mairc maith ro rígad,
    550] Mo M' Áedóc mór máinech,
    551] Mo Domnóc mind m-búadach
    552] féil Brain bicc ó Chláined.
  19. F. xiv. cal. Iunii.
    553] Clíara Urbáin glana:
    554] nis-gegnetar tola,
    555] a n-anmann it gela
    556] tré bróenán a fola.
  20. G. xiii. cal. Iunii.
    557] Fuil mór Marcellosi
    558] luid fo thalmain tassi,
    559] for óen-líth it gessi
    560] Gerbassi, Protassi.
  21. A. xii. col. Iunii.
    561] Tiamdae martir mírbuil,
    562] mór-drém Dé de thuirinn,
    563] Colmán lobor ro-lainn,
    564] Barr-fhind Drommo Cuilinn.
  22. B. xi. cal. Iunii.
    565] Cechaing animm Rónáin
    566] Find for riched rindach,
    567] lasin fer caín clandach,
    568] Báithéne macc Findach.
  23. C. x. cal. Iunii.
    569] Find-shlúag Epectiti
    570] as dánu, as daingniu,
    571] iar céssad la h-ingru
    572] fris-indled la h-aingliu.

    24. p.126

  24. D. ix. cal. Iunii.
    573] Augustín in t-epscop,
    574] Hermes abb mór míle,
    575] Colmán inmain áge,
    576] Aidbe tuathach Tíre.
  25. E. viii. cal. Iunii.
    577] Tot-ic féil Iohannis
    578] inmain áge h-úage,
    579] Dionis derb dáne,
    580] Dúnchad h-Íae h-úare.
  26. F. vii. cal. Iunii.
    581] Airitiu chóir Cholmáin
    582] Stelláin sluind cen ladnae:
    583] Béccán carais figle:
    584] h-i Clúain Aird a adbae.
  27. G. vi. cal. Iunii.
    585] Aculius cruimther
    586] cona chléir as nóebu,
    587] a fhuil fíad cech díniu
    588] do-rortad for róenu.
  28. A. v. cal. Iunii.
    589] Ron-snáda co h-aingliu,
    590] inmain soinmech sathe,
    591] German, grían ar sruthe,
    592] aite Pátric Mache.
  29. B. iv. cal. Iunii.
    593] Mór-shlúag Pollionis
    594] ron-snádat dond rind-nim!
    595] la Cummain co n-glanbail
    596] ingen Allén inmain.

    30. p.127

  30. C. iii. cal. Iunii.
    597] Nóeb-apstal ar Fiadat
    598] h-i fudomnaib ecnai,
    599] gein Tomáis cen opni,
    600] paiss Eutaic cen eclai.
  31. D. Pridie cal. Iunii.
    601] Céssad Crisogini
    602] la paiss Petronéllae,
    603] mí Mái, co méit míle,
    604] dí prím-fhéil for-tn-édae.

p.138

MÍ IÚIN.

  1. E. Calendis Iunii.
    605] Oid menmain féil Teclae
    606] ar-dlig dínn a cétol,
    607] co slóg adbul úasal
    608] i calne Iúin éton.
  2. F. iv. nonas Iunii.
    609] Erasmus in t-epscop,
    610] án-breó co m-bruth bríge,
    611] birt co Críst cléir m-búade.
    612] trí chét molbthach míle.
  3. G. iii. nonas Iunii.
    613] Míl Críst i crích n-Érenn,
    614] ard n-ainm tar tuind trethan,
    615] Cóemgen cáid cáin cathar,
    616] i n-Glinn dá lind lethan.
  4. A. Pridie nonas Iunii.
    617] Luid Apollináris
    618] do fhlaith Dé for dírgi,
    619] cona chléir co n-úagi,
    620] la tarmbreith Martíni.
  5. B. Nonis Iunii.
    621] Martrae Marciáni
    622] mórsus h-ilar m-búade,
    623] aill fir máir, maith díne,
    624] aill ingene h-úage.

    6. p.139

  6. C. viii. Idus Iunii.
    625] Úg-céssad Amanti,
    626] mór-gním mad fod-lugai,
    627] Mael Aithgin co n-glanbail
    628] luid fo thalmain tubai.
  7. D. vii. idus Iunii.
    629] Togairm Póil in martír
    630] iar mór-gním co talcai
    631] féil Choluimb cen shotlai
    632] in máir maccu Artai.
  8. E. vi. idus Iunii.
    633] Airitiu ind nóib Ióib
    634] iar m-búaid ocus bán-chath,
    635] féil Medráin mór n-dídnad,
    636] féil Murchon co már-rath.
  9. F. v. idus Iunii.
    637] Ron-snádat don bith-fhlaith
    638] i m-bith-bí léss laindrech,
    639] Báethíne ard ainglech,
    640] Colomb Cille caindlech.
  10. G. iv. Idus Iunii.
    641] Con-recat for óen-chái
    642] cen mair do-da-farnaic,
    643] prím-fhéil Mairc, mind n-airdirc,
    644] la féil m-búadaig Barnaip.

    11. p.140

  11. A. iii. Idus Iunii.
    645] Basilla in búadach
    646] brethae úainn h-i fálti,
    647] féil Maicc Tháil ind nóebdai
    648] la pais Fortunáti.
  12. B. Pridie Idus Iunii.
    649] Féil in chredail Chóemain,
    650] diand Sanct-Lethan slondad;
    651] Torannán buan bannach
    652] tar ler lethan longach.
  13. C. Idibus Iunii.
    653] La Bartholom m-bresta
    654] at meirb manid-cúala,
    655] cechaing uainn co r-ríga
    656] Macc Nisse cáid Clúana.
  14. D. xviii. cal. Iulii.
    657] Con-recat diblínib,
    658] for óen-líth ler slúagach,
    659] Nem maccu Birn brígach,
    660] la Benedicht m-búadach.
  15. E. xvii. cal. Iulii.
    661] Bendacht forsin n-gérait
    662] carais Críst co fírbail:
    663] las' luid slóg co m-mór-gail
    664] Uitus maccán mírbail.
  16. F. xvi. cal. Iulii.
    665] Mo gérat in Giric
    666] imma-slecht slúag sobail,
    667] ní fríth sét ná samail
    668] dó do maccaib domain.

    17. p.141

  17. G. xv. cal. Iulii.
    669] In doss óir ós chríchaib,
    670] in grían án úas túathaib,
    671] congreit ríg, balc bráthair,
    672] caín míl, Mo Ling Lúachair.
  18. A. xiv. cal. Iulii.
    673] La Báithín find fechtnach
    674] Furudrán co fégi,
    675] maicc Móináin co n-ógi
    676] ó Laind lígaig Léri.
  19. B. xiii. cal. Iulii.
    677] Luid a fuil for róenu
    678] fiad shlúagaib co m-brassi:
    679] dond ríg bátir uissi
    680] Geruassi, Protassi.
  20. C. xii. cal. Iulii.
    681] Paiss Póil, Ciriaci,
    682] cosin dúnud már-sin,
    683] Fáelán cosin búaid-sin
    684] int amlabar án-sin.
  21. D. xi. cal. Iulii.
    685] Ainle sochla slúagach,
    686] fris m-bruchta muir mílach,
    687] Cormacc ba caín clérech,
    688] h-aue Liatháin lígach.
  22. E. x. cal. Iulii.
    689] La h-Iacób n-Alphaei
    690] dá n-ocht cét, clíar geldae,
    691] féil fir nád char corplén,
    692] Cronán fortrén Fernae.

    23. p.142

  23. F. ix. cal. Iulii.
    693] Foraithmet Mo Choe
    694] ní fil ardon-sela,
    695] in sab sochla sona
    696] ó Óendruimm don-rema!
  24. G. viii. cal. Iulii.
    697] Ríg-gein Iohain baptaist
    698] masu léir ron-fethis,
    699] la tathchor cen aithis
    700] Iohain maicc do Effis.
  25. A. vii. cal. Iulii.
    701] Féil Sinchill, féil Telli,
    702] bátir Érenn ardae,
    703] la M' Luóc glan n-geldae
    704] grían Liss Móir de Albae.
  26. B. vi. cal. Iulii.
    705] Is adbul a céssad,
    706] a paiss ol ros-taurus,
    707] caín grían Gallicanus,
    708] Iohannes is Paulus.
  27. C. v. cal. Iulii.
    709] Ro promtha tré martrai
    710] ata mór-thruimm threthain,
    711] secht n-derb-bráthir cathir
    712] i r-Róim Lethai lethain.

    28. p.143

  28. D. iv. cal. Iulii.
    713] I l-Leccain móir Midi
    714] Crummíne co n-áni,
    715] for óen-líth co l-léri
    716] paiss find Fabiáni.
  29. E. iii. cal. Iulii.
    717] Féil Phóil ocus Phetair
    718] co n-aidbli a n-gretha,
    719] nís-tarcai deilm catha
    720] feil for bruinnib betha.
  30. F. Pridie cal. Iulii.
    721] Búaid Sauli is Tiamdai,
    722] taimthiu Ióib ilmain,
    723] benait glass find fothmin
    724] for slúaiged Iúin inmain.

p.160

MÍ IÚIL.

  1. G. Kalendis Iulii.
    725] Iuil i calaind mírbuil
    726] Maire máras Mathae,
    727] bás n-Áróin, sab sruithe,
    728] Simón ocus Tathae.
  2. A. vi. nonas Iulii.
    729] Taimthiu Eutaic epscoip,
    730] Damasi co n-áni,
    731] paiss Processi rígdai,
    732] riag már Martiáni.
  3. B. v. nonas Iulii.
    733] Martrae Cirionis,
    734] Críst! ní h-attach m-bille,
    735] tarmbreth Tomáis aille,
    736] féil dígraiss Dartinne.
  4. C. iv. nonas Iulii.
    737] Dag-ordan már Martain
    738] ma ro sellaib soimle,
    739] la cét martir n-amrae,
    740] Findbarr Inse Doimle.
  5. D. iii. nonas Iulii.
    741] Don martir Agatho
    742] cona chléir caín comul,
    743] ro ír Críst, síd slemun,
    744] a mór-sheirc la omun.

    6. p.161

  6. E. Pridie nonas Iulii.
    745] Mo Ninne int Slébe
    746] Cuilinn ba cáin áge,
    747] gabais búaid, gell glaine,
    748] siur Maire máre.
  7. F. Nonis Iulii.
    749] La már -shlúagad lígmar
    750] Parméni, tromm tóiden,
    751] Máel Rúain ad-reth ríched,
    752] grían án inse Góidel.
  8. G. viii. idus Iulii.
    753] Gabais Broccán scríbnid
    754] sóer-búaid cen nach tuissel,
    755] la Díarmait derb lassar
    756] grían gel Glinne h-Uissen.
  9. A. vii. idus Iulii.
    757] Asslondud án Onchon,
    758] mos-tic cách nond-áli,
    759] fri Críst carais léri
    760] Garbán caín Cinn Sháli.
  10. B. vi. idus Iulii.
    761] Sluind céssad secht m-bráthre
    762] dia m-bo chroch Críst carcar,
    763] Cúán, Marc, már sestan,
    764] dá sé míle martar

    11. p.162

  11. C. v. idus Iulii.
    765] La martrai na rígnae
    766] Eufemiae slógdae,
    767] Benedicht, balc áge,
    768] macc cráibdech Con Lógae.
  12. D. iv. idus Iulii.
    769] Con-rúalai co aingliu
    770] Nazair scél cech senaid,
    771] Félix ba mad tu-luid
    772] cona shlúag mór melaid.
  13. E. iii. idus Iulii.
    773] Milis ainm co n-áni
    774] Euangeli nóebdai,
    775] la M' Shílóc dond rígraid
    776] luid h-i síd-fhlaith sóerdai.
  14. F. Pridie idus Iulii.
    777] Ron-snáda in t-epscop.
    778] Iacob as nóibem,
    779] atnecham, non-áilem,
    780] co n-dechenbur nóiden.
  15. G. Idibus Iulii.
    781] In dá apstal déac
    782] do-farcat cech n-árim,
    783] fos-dáil re slúag dírim
    784] Íssu fo shíl n-Ádim

    16. p.163

  16. A. xvii. cal. Augusti.
    785] Dot-icfa cech día
    786] do Chríst acht con-étis,
    787] itge co slúag súabais
    788] in maccáin Mammétis.
  17. B. xvi. cal. Augusti.
    789] Ron-mórat a n-itge
    790] horum atque harum,
    791] cech martir ad-rímem.
    792] las slóg Scillitarum.
  18. C. xv. cal. Augusti.
    793] Slóiged inna rígnae
    794] snáidsiunn h-i síd sóerdae,
    795] co m-mór-fhessiur bráthre,
    796] in Christína nóebdae.
  19. D. xiv. cal. Augusti.
    797] Nóeb-itge Sisenni
    798] at meirb manid frescai,
    799] taric éim frit toscai
    800] co m-mór-buidin brestai.
  20. E. xiii. cal. Augusti.
    801] It brestai in ban-maicc,
    802] Sabína sóer áinbech,
    803] ind Romula rúamach,
    804] la Curufin cráibdech.

    21. p.164

  21. F. xii. cal. Augusti.
    805] Croch ard Heli martír
    806] mórais relicc lechtaig,
    807] co n-ingenraid thuchtaig
    808] paiss Fraxidis fechtnaig.
  22. G. xi. cal. Augusti.
    809] Find-gein Magdaléna
    810] Maire, mind cech dúnaid,
    811] paiss Apollnair úasail,
    812] Mo Bíu Inse Cúscraid.
  23. A. x. cal. Augusti.
    813] La céssad Uincenti
    814] co Críst cechaing sathe:
    815] i r-Róim, ba réim sruithe,
    816] dá nói míled mathe.
  24. B. ix. cal. Augusti.
    817] Mad toich duit a h-Ére,
    818] dot chobair cing báge,
    819] tathut cenn céit míle,
    820] Déclán Arde Máre.
  25. C. viii. cal. Augusti.
    821] Mo Cholmóc, Mo Shilóc,
    822] la Nessán dia lammis:
    823] Iacob cen dinnis,
    824] bás bráthar Iohannis.

    26. p.165

  26. D. vii. cal. Augusti.
    825] h-I paiss Iouiáni
    826] cona chleir caín glan-oir,
    827] tarmchruthud iar n-dedóil
    828] Íssu i Sléib Thabóir.
  27. E. vi. cal. Augusti.
    829] Taimthiu Semeoin manaig,
    830] ba mór grían don talmain,
    831] la céssad slúaig inmain
    832] i n-Antúaig aird adbail.
  28. F. v. cal. Augusti.
    833] Is adbul a cobair
    834] cona slógud chaindlech,
    835] Teophil tor óir ainglech,
    836] Pantaleo laindrech.
  29. G. iv. cal. Augusti.
    837] Lupus ocus Simplicc,
    838] epscoip cen chuit n-dígnai,
    839] Prosper co cléir h-úagdai,
    840] inna rétglainn rígdai.
  30. A. iii. cal. Augusti.
    841] Recht Críst sech no chantais
    842] co rúnaib at-glenntis,
    843] lia slúag ní fríth anfót
    844] Abdón ocus Sennis.
  31. B. Pridie cal. Augusti.
    845] Slúag Iúil, co méit míle,
    846] for-tn-íada ard áge,
    847] epscop án a h-Ére,
    848] Colmán macc Dar Áne.

p.174

MÍ AUGUIST.

  1. C. Calendis Augusti.
    849] Do chalaind ind Auguist
    850] do-raraic mór m-bríge,
    851] la féil macc Mochábae,
    852] ochtmogae mór míle.
  2. D. iv. nonas Augusti.
    853] Lasin máthir máir-sin
    854] Teothota in bóid-sin,
    855] lotar lasa m-búaid-sin
    856] na trí maccáin móith-sin.
  3. E. iii. nonas Augusti.
    857] Metropoil ind Eoin,
    858] inmain féil co n-áni,
    859] i n-airecht co n-nóebi
    860] corpán soér Stefáni.
  4. F. Pridie nonas Augusti.
    861] Bid fáilid iar ríchtu,
    862] frimm is mór a dóche,
    863] in nóeb-gérat rígdae
    864] Mo Lua macc' Óche.
  5. G. Nonis Augusti.
    865] Céssad án Herenti
    866] ar-dlig comarc cóemdae,
    867] la h-Osualt nóeb n-áilme,
    868] ard-rí Saxan sóerdae.

    6. p.175

  6. A .viii. idus Augusti.
    869] Sistán epscop Rúamach
    870] ruc súas saithe snámach,
    871] la M' Chua, clí búadach,
    872] ó Chlúain Dolcain dálach.
  7. B. vii. idus Augusti.
    873] Dlom cóic ar thrib cóectaib
    874] blíadnae, bríg ron-fethis,
    875] mór-fessiur cen aithis
    876] con-atuil i n-Effis.
  8. C. vi. idus Augusti.
    877] Féil Beóáin maicc Nessáin
    878] Noll, ni h-attach m-bille,
    879] Colmán epscop aille,
    880] ó Inis Bó Finde.
  9. D. v. idus Augusti.
    881] Feith let paiss Antóni,
    882] Firmí fortrén muinter.
    883] i n-Achud Cháin clantair
    884] Nath Í credal cruimther.
  10. E. iv. idus Augusti.
    885] Croch lán Laurint deochain
    886] dia chorpán ba calad:
    887] la slúag slán sóer so-dath
    888] Bláán cáin Cinn Garad.
  11. F. iii. idus Augusti.
    889] Guid Airerán n-ecnai
    890] assa clú nád chelar,
    891] la Ualerán n-idan
    892] Tiburtius trén trebar.

    12. p.176

  12. G. Pridie idus Augusti.
    893] Togairm Lassréin Inse
    894] Muredaig móir mochthai,
    895] co cléir nóib nád athbi,
    896] féil Segéni sochlai.
  13. A. Idibus Augusti.
    897] Hipolitus martir
    898] ba mírbuil a thóiden;
    899] co slúag adbul úasal
    900] Mo M' Áedóc mind n-Góidel.
  14. B. xix. cal. Septembris.
    901] La gairm Fortunáti
    902] tar fairgi lir longaig,
    903] macc int sháir, caín cimbid,
    904] féil Fachtnai maicc Mongaig.
  15. C. xviii. cal. Septembris.
    905] I mór-féil a h-aithmit
    906] fír-máthir ar n-athar,
    907] co slóg ríg, rán clochar,
    908] Fer Dá Chrích, cáin cathar.
  16. D. xvii. cal. Septembris.
    909] La croich Adrionis,
    910] co cléir nád char díchmairc,
    911] gein Maire, mind n-úag-bailc,
    912] nóeb-máthir mo ríg-maicc.

    17. p.177

  17. E.. xvi. cal. Septembris.
    913] Ro céss Mammes martír
    914] mór-phéin i croich calaid,
    915] la cléir cáin cen chinaid,
    916] taimthiu Temnéin manaig.
  18. F. xv. cal. Septembris.
    917] Macc Cresséni M' Ernóc
    918] mórais Fiadat fairinn:
    919] ba fer raith diar turinn
    920] Daig mór maith macc Cairill.
  19. G. xiv. cal. Septembris.
    921] Croch in martir Mágni
    922] co cléir co m-búaid bláthe,
    923] Mochtae mór, maith síthbe,
    924] Énán Dromma Ráthe.
  20. A. xiii. cal. Septembris.
    925] Ro céss Dioscorus,
    926] ar Chríst, cing as fherdu,
    927] Pampil, breó as amru,
    928] co mór-shlúagud geldu.
  21. B. xii. cal. Septembris.
    929] Guid i féil Uincentí
    930] do chongnam frit anmain
    931] epscop Senach sulbair
    932] Clúana h-Iraird adbail.
  22. C. xi. cal. Septembris.
    933] At-taig itge Tiamdai
    934] daltai Póil co n-áni,
    935] guid maccraid co nóibi
    936] ind nóib Emiliáni.

    23. p.178

  23. D. x. cal. Septembris.
    937] La paiss Fortunáti,
    938] imma-lluid lín catha,
    939] for óen-líth, lúad m-betha,
    940] féil Eogain Aird Shratha.
  24. E. ix. cal. Septembris.
    941] La sreith slóig Zenobi,
    942] ata scél ro-clotha,
    943] Sen-Phátric cing catha,
    944] cóemaite ar srotha.
  25. F. viii. cal. Septembris.
    945] Ro sreth scél a chésta
    946] cech leth co sál srúamach,
    947] iar mór-chroich ro rígad
    948] in Bartholom búadach.
  26. G. vii. cal. Septembris.
    949] Búaid Abundi martír
    950] dia chelebrad coméir!
    951] for nem co slóg soléir
    952] ro drebraing iar n-drobéil.
  27. A. vi. cal. Septembris.
    953] Drong in martir glandai
    954] Rufin caín co m-bindi,
    955] co r-ríg nél nóeb n-doë
    956] luid tre roë rindi.

    28. p.179

  28. B. v. cal. Septembris.
    957] Ronn-ain Ciriacus
    958] cona chléir cháin chathlaic.
    959] Hermes céssais ro-chneit,
    960] int airdirc a h-Afraic.
  29. C. iv. cal. Septembris.
    961] Aisndéid céssad Iohain
    962] Baptist, bith co léri,
    963] la nói cét co n-óigi
    964] for fresgabail h-Éli.
  30. D. iii. cal. Septembris.
    965] Álaind h-úag Agappa
    966] as grían do for nóebaib,
    967] ad-reth búaid úas búadaib
    968] cona sethraib sóeraib.
  31. E. Pridie cal. Septembris.
    969] Sernait ethre n-Auguist
    970] Aedán in grían geldae,
    971] Inse Medcoit molmae,
    972] la Paulín na fedbae.

p.192

MI SEPTIMBIR.

  1. F. Calendis Septembris.
    973] For Septimbir calaind
    974] Cicilia co n-dírgi,
    975] cethir chét co n-úagi
    976] fiche teoir míli.
  2. G. iv. nonas Septembris.
    977] Molthae Theodótam
    978] la Senán, it sóir-seom
    979] la Críst cáin a m-búaid-seom
    980] cona cléir it cóim-seom.
  3. A. iii. nonas Septembris.
    981] Colmán Dromma Ferta,
    982] Longarad grían álaib,
    983] Macc Nisse co m-mílib,
    984] ó Chonderib Máraib.
  4. B. Pridie nonas Septembris.
    985] I már-fhlaith cen attáil
    986] indat bláithe beccáin,
    987] agait mór a maccáin
    988] imm Ultan Aird Breccáin.
  5. C. Nonis Septembris.
    989] La Brecc-búaid do-ríme
    990] do-rograd a h-Ére,
    991] Eolang cáid, cáin áge,
    992] Achid Bó, búaid lére.

    6. p.193

  6. D. viii. idus Septembris.
    993] Luscai la Macc Cuilinn
    994] caín decheng ad-rannai,
    995] féil Scéthe sund linni,
    996] Coluimb Roiss gil Glandai.
  7. E. vii. idus Septembris.
    997] Glan-chéssad Senóti
    998] ata soilsi slechtae,
    999] slúag Anathais ortae
    1000] co n-ilur a fertae.
  8. F. vi. idus Septembris:
    1001] For-aithmentar Mair,
    1002] nít marbdae for tercphít,
    1003] la Tiamdae iar sétaib
    1004] co trib cétaib martír.
  9. G. v. idus Septembris.
    1005] Mór líth línass crícha,
    1006] crothass longa lúatha,
    1007] Maicc int Sháir tar ríga,
    1008] féil cháin Chíaráin Chlúana.
  10. A. iv. idus Septembris.
    1009] Clí derg-óir co n-glaini,
    1010] co r-recht tar sál sidi,
    1011] súi diand Ériu inmall,
    1012] Findbarr Maige Bili.
  11. B. iii. idus Septembris.
    1013] Paiss Prothi Iacinthi,
    1014] ba co n-imbud galair,
    1015] Sillán salm cech lobair
    1016] i n-Imbliuch caín canair.

    12. p.194

  12. C. Pridie idus Septembris.
    1017] Celebair féil n-Ailbi
    1018] la Fleid sorchai snámaig,
    1019] h-i féil Laissréin lígaig
    1020] ó Daminis dálaig.
  13. D. Idibus Septembris.
    1021] Dlom díis ar fichit
    1022] martir co méit nóibe,
    1023] lasin cingid m-báge,
    1024] Dagán Indbir Dóile.
  14. E. xviii. cal. Octobris.
    1025] Do-ling duit féil Chóemáin
    1026] Bricc la diis m-bolmair,
    1027] paiss cáid Cipriáin dermair
    1028] la céssad caín Cornail.
  15. F. xvii. cal. Octobris.
    1029] La cosecrad m-baslicc
    1030] Maire, múr co talcai,
    1031] Cirinus cen shotlai
    1032] luid co slúag mór martrai.
  16. G. xvi. cal. Octobris.
    1033] Mór-threcheng nád donae,
    1034] Mo Ninn, núall cech gena,
    1035] in h-Í Laissrén sona,
    1036] la Laissrén mór Mena.
  17. A. xv. cal. Octobris.
    1037] Eufemia cen dígnae,
    1038] ráid a paiss cinn blíadnae;
    1039] Broccán Roiss Tuirc tuirme,
    1040] la féil ro-maith Ríaglae.

    18. p.195

  18. B. xiv. cal. Octobris.
    1041] Ráthatar i r-riched
    1042] secht cét míled m-bláthe,
    1043] la gein cáin cen dígnae,
    1044] Énán Dromma Ráthe.
  19. C. xiii. cal. Octobris.
    1045] Ráith co n-ilur sochlach
    1046] co Críst, cóemdae taithlech,
    1047] cona shlóg ríg remain
    1048] Enair, inmain aithmet.
  20. D. xii. cal. Octobris.
    1049] At-techam na h-óga
    1050] do-airset ar n-dála,
    1051] ind rígain Dar Óma
    1052] cona slóg ron-snáda!
  21. E. xi. cal. Octobris.
    1053] Snáidsiunn in sab slúagach
    1054] i sossad n-ard n-óiblech,
    1055] in grían gel co l-lígdath,
    1056] Mathae múr trén tódlech.
  22. F. x. cal. Octobris.
    1057] Pantaleo, Muric,
    1058] a m-mór-shlúaig cat éat?
    1059] sé cét caín-shlúag óac
    1060] ar díb mílib déac.

    p.196

  23. G. ix. cal. Octobris.
    1061] Do Adamnán Íae
    1062] assa tóidlech tóiden,
    1063] ro ír Ísu uasal
    1064] sóerad m-búan m-ban n-Góidel.
  24. A. viii. cal. Octobris.
    1065] Compert Iohain uasail
    1066] Babtaist, as mó scélaib:
    1067] acht Íssu de dóinib
    1068] as amram ro génair.
  25. B. vii. cal. Octobris.
    1069] La cléir Eusébi
    1070] sóerais cech fleid forcraid,
    1071] la líth ind fhir shercaig,
    1072] féil Barri ó Chorcaig.
  26. C. vi. cal. Octobris.
    1073] Colmán ó Laind Elo
    1074] la h-ógi alt légend,
    1075] conid h-é, án núallan,
    1076] Iohain már macc n-Érenn.
  27. D. v. cal. Octobris.
    1077] Ar n-dí gérait chridi,
    1078] a croch ní pu árlius,
    1079] ron-snádat diar n-dílius
    1080] Cosmas, Damiánus.

    28. p.197

  28. E. iv. cal. Octobris.
    1081] Dá Fhindio geldai
    1082] it gessi im cech cobair,
    1083] clíar már Marcill umail,
    1084] Iunaill la líth lobair.
  29. F. iii. cal. Octobris.
    1085] La gleó fri draic n-dálach
    1086] do Michél balc búadach,
    1087] ar-sil Ancrist n-írach
    1088] in míl slis-gel slúagach.
  30. G. Pridie cal. Octobris.
    1089] Septimbir iar saithib
    1090] at-saigtis ar sethir,
    1091] súi slán sothnge suthain
    1092] Cirine bán Bethil.

p.214

MÍ OCHTIMBIR.

  1. A. Calendis Octobris.
    1093] Búaid Prisci, paiss Lúcáis,
    1094] líth Germain, grían cétul,
    1095] féil nóeb-reilce n-úasal
    1096] i n-Ochtimbir étun.
  2. B. vi. nonas Octobris.
    1097] Eleuther in martír
    1098] ar-muinter a fhéli,
    1099] onme for óen-líni
    1100] la paiss Eusébi.
  3. C. v. nonas Octobris.
    1101] Sóer-gein Mairc i n-Egept
    1102] asslondud cech gen.
    1103] Candida grían shona
    1104] gein caín Colmáin Elo.
  4. D. iv. nonas Octobris.
    1105] Áil Marcellum n-epscop
    1106] co n-aidbli a bríge,
    1107] la céssad na h-óige
    1108] in ball-gel Baluíne
  5. E. iii. nonas Octobris.
    1109] Blog dond liic lógmair
    1110] la slóg martir n-amrae,
    1111] Sínech ingen Fhergnae
    1112] Crúachan Maige Abnae.

    6. p.215

  6. F. Pridie nonas Octobris.
    1113] Abb Clúana in Lucell
    1114] la Báithíne m-brígach,
    1115] Fer Dá Chrích, clíi búadach:
    1116] epscop Lugdach lígach.
  7. G. Nonis Octobris.
    1117] La Mathae Marc n-epscop
    1118] as-ort slúag co n-gainni,
    1119] la cléir caín co m-bindi
    1120] féil Cellaich co l-lainni.
  8. A. viii. idus Octobris.
    1121] Lécsit lúth co n-áni
    1122] ar bith-aittrib rígi
    1123] trét ingen co n-ógi
    1124] la paiss find Faustíni.
  9. B. vii. idus Octobris.
    1125] h-I féil Eusébi
    1126] cechaing súas íar sétaib
    1127] slóg dermar de rígaib,
    1128] cóicae ar trib cétaib.
  10. C. vi. idus Octobris.
    1129] Trí chét ar thrib dechib
    1130] la fer caín cen táde,
    1131] Fintan find, frém fíne,
    1132] Dromma Ingaird áge.
  11. D. v. idus Octobris.
    1133] It ána a n-dírmann
    1134] in tríir im-rádam
    1135] Fortchern, Lommán lainnech,
    1136] Cainnech maccu Dálan.

    12. p.216

  12. E. iv. idus Octobris.
    1137] Dlom Fíacc ocus Fiachraig
    1138] onme, mor in máin-sin,
    1139] Mo Bíi, balc a m-búaid-sin,
    1140] in clár-ainech cáin-sin.
  13. F. iii. idus Octobris.
    1141] Comgan ocus Marcill
    1142] co l-lethet a l-linde,
    1143] ind óc-rígain glandae
    1144] féil Findsiche finde.
  14. G. Pridi idus Octobris.
    1145] Féil Calisti epscoip,
    1146] aisndéid for óen-líni,
    1147] la céssad co n-ógi
    1148] ind epscoip Paulíni.
  15. A. Idibus Octobris.
    1149] Prím-chéssad Maurorum
    1150] ro closs fon m-bith m-buidnech,
    1151] damdatar mór tadlech
    1152] iar serb-charcraib cuimrech.
  16. B. xvii. cal. Novembris.
    1153] Cíar tríb cétaib cáinib
    1154] cethir deich don búaid-sin,
    1155] Ríaguil ráith a r-réim-sin
    1156] Colmán ón Chill Rúaid-sin.

    17. p.217

  17. C. xvi. cal. Novembris.
    1157] Ro céss mór in martír
    1158] Necodímus nemdae,
    1159] cona chléir, caín tuidme,
    1160] sab indarbai demnae.
  18. D. xv. cal. Novembris.
    1161] Demin la pais Pilipp
    1162] prím-martir don-formaig,
    1163] Trifoniae don trednaig
    1164] do-bert Críst caín cobraid.
  19. E. xiv. cal. Novembris.
    1165] Rop cobair dún Auster
    1166] as-chomart tré ríaga,
    1167] ron-snáda, ron-sóera
    1168] slúag Susi sech phíana!
  20. F. xiii. cal. Novembris.
    1169] Paiss Eutaicc la Fintan
    1170] Mael Dub, mór a n-gáir-sin,
    1171] cáin-grían ocont shléib-sin,
    1172] dend Éoganacht áin-sin.
  21. G. xii. cal. Novembris.
    1173] Án-breo co m-bruth athre
    1174] Fintan fír-ór promthae,
    1175] macc Telcháin trén trednach,
    1176] cath-míl credlach crochthae.

    22. p.218

  22. A. xi. cal. Novembris.
    1177] Croch Pilipp ind epscoip
    1178] las n-ort slúag co l-léri,
    1179] Mathae mind cech rígi,
    1180] la paiss Eusébi.
  23. B. x. cal. Novembris.
    1181] Escomlud Longíni
    1182] dond ríg-fhlaith as díxu:
    1183] geguin, gním as úaisliu,
    1184] tóebán álaind Íssu.
  24. C. ix. cal. Novembris.
    1185] Asslondud sóer Séuir
    1186] is ferr duit dian fésser,
    1187] fris-rócaib nem n-uasal
    1188] co cethorchait chréssen.
  25. D. viii. cal. Novembris.
    1189] Cethir deich dá chóicait
    1190] la Maxim don-ascnai,
    1191] Críst la féil fir thuicsi
    1192] Laissrén mór macc Nascai.
  26. E. vii. cal. Novembris.
    1193] Nassad, Beóán, Mellán,
    1194] nach mod ata-sníäim.
    1195] inmain cethrur cóäir,
    1196] féil ingen Maicc Íäir.

    27. p.219

  27. F. vi. cal. Novembris.
    1197] Erc Domnaig Móir máinich,
    1198] Abbán abb caín clíarach,
    1199] Odrán sab sóer snámach,
    1200] Colmán h-aue Fiachrach.
  28. G. v. cal. Novembris.
    1201] Is fairsing a n-dál-som
    1202] Babilón a r-rúam-som,
    1203] Tathae ocus Símón,
    1204] is dímór a slúag-som.
  29. A. iv. cal. Novembris.
    1205] Slúag Quinti co m-mór-bruth
    1206] ronn-ain ar cech n-gábud:
    1207] gabsait buaid iar n-dílgud
    1208] la Táimthene tálgud.
  30. B. iii. cal. Novembris.
    1209] Dá chét sescat sláne
    1210] for óen-líth, ler m-búadae,
    1211] Ernach óg, ard áge,
    1212] Colmán maccu Gúalae.
  31. C. Pridie cal. Novembris
    1213] Quintínus caín crochthae,
    1214] Faelán co méit methle,
    1215] sernait co slóg aithre
    1216] Ochtimbir ard ethre.

p.232

MÍ NOUIMBIR.

  1. D. Calendis Novembris.
    1217] Lonán, Colmán, Crónán,
    1218] cona cléir gil gríanaig:
    1219] slúaig Helair deirb dálaig
    1220] sóerait samain síanaig,
  2. E. iv. nonas Novembris.
    1221] Sruith apstal ar tíre,
    1222] Pátric prímdae áge,
    1223] do-bert bendacht m-búade
    1224] for epscop Erc Sláne.
  3. F. iii. nonas Novembris.
    1225] Sluind Elair tars ro-muir,
    1226] Murdebar mind senaid,
    1227] líth cáin Corcu Nutain
    1228] la féil Cóemáin Enaig.
  4. G. Pridie nonas Novembris.
    1229] Inmain grían cen opni,
    1230] co m-mór-chléir cen ecli,
    1231] Perpetua cen dígnae
    1232] coniunx prímdae Petri.
  5. A. Nonis Novembris.
    1233] Paiss Domnini airdirc
    1234] imma slechta fermaicc:
    1235] do rath Dé ba for-lán
    1236] Colmán Glinne Delmaicc.

    6. p.233

  6. B. viii. idus Novembris.
    1237] Cé do-légsat dóini
    1238] tré martrai co n-áni,
    1239] ad-reth riched rúnach
    1240] dúnad Adriáni.
  7. C. vii. idus Novembris.
    1241] Drong adbul Eusébi,
    1242] cérbo gúr a slige,
    1243] fo-fuair, fortrén togae,
    1244] tír mór i m-maig nime.
  8. D. vi. idus Novembris.
    1245] For nem núall Claudíni:
    1246] luid cléir cáin cen áera,
    1247] la líth línas túatha
    1248] Barr-find mór-maicc Áeda.
  9. E. v. idus Novembris.
    1249] Dónait ocus Damián
    1250] níptar ecnaig anbli:
    1251] for óen-líth co suilgi
    1252] féil Sínche co sadbri.
  10. F. iv. idus Novembris.
    1253] Aed macc Bricc dend rígraid,
    1254] becc ná bu mó écaib,
    1255] is ard isin mór-fhlaith
    1256] in sab Síl Chuinn Chétaig.

    11. p.234

  11. G. iii. idus Novembris.
    1257] Carbre Cúlae Rathin,
    1258] rath rígdae tar ro-muir,
    1259] sanct Martain, sóer samuil,
    1260] slíab óir íarthair domuin.
  12. A. Pridie idus Novembris.
    1261] Do-rindnacht la suithi
    1262] soas co m-méit tiachrai
    1263] dom Chummain caín mílti
    1264] macc find Fotae Fiachnai.
  13. B. Idibus Novembris.
    1265] For íd estecht Eutaicc
    1266] martir ma im-rordaiss
    1267] ré notlaicc aird aurgaiss
    1268] do-gné init chorgaiss.
  14. C. xviii. cal. Decembris.
    1269] Clemeint ocus Colmán
    1270] celebair a féli,
    1271] fri gein Críst co n-óigi
    1272] tindscan lechsa léri.
  15. D. xvii. cal. Decembris.
    1273] La céssad Secundi
    1274] co slógud cech datha,
    1275] corgus ma fot-botha
    1276] tindscan greim do chatha.

    16. p.235

  16. E. xiv. cal. Decembris.
    1277] Clíar Augustín epscoip
    1278] dech no chartais tredan,
    1279] tróethsus mór n-gúr n-galar
    1280] cethorchae cáin credal.
  17. F. xv. cal. Decembris.
    1281] Celebair féil Teclae,
    1282] is íar m-búaid do-rochair,
    1283] Búaid-beó, búan balc cathair,
    1284] la Duilech cáin Clochair.
  18. G. xiv. cal. Decembris.
    1285] Cain coisecrad n-eclas
    1286] Petair is Phóil phrímdai,
    1287] maicc Beraig co n-ógi,
    1288] féil réil Rónáin rígdai.
  19. A. xiii. cal. Decembris.
    1289] Ráid cosecrad m-baslic
    1290] Eoin maicc cen mélacht,
    1291] luid cethorchae díllacht
    1292] la Maxim mór n-gérat.
  20. B. xii. cal. Decembris.
    1293] Guid Escon la Fróechán
    1294] ar Bledma bailc bélaib
    1295] la céssad co r-rúnaib
    1296] slúag Bassi ís nélaib.

    21. p.236

  21. C. xi. cal. Decembris.
    1297] Nóeb-decheng con-rúalae
    1298] co Críst la gein Clémint,
    1299] macc Commain a h-Árainn,
    1300] macc Congraid a h-Érinn.
  22. D. x. cal. Decembris.
    1301] Íar céssad h-i m-martrai,
    1302] Maire! loichet laindrech,
    1303] ráith co ríg-macc n-ainglech
    1304] Cicilia cháin chaindlech.
  23. E. ix. cal. Decembris.
    1305] Céssad cáin Clémentis
    1306] eter tonna trethain,
    1307] adorthar a chathair
    1308] fo thonnaib lir lethain.
  24. F. viii. cal. Decembris.
    1309] La Cíanán Doim Líäcc
    1310] caín dias diar tuirinn,
    1311] macc Lénéni ro-laind
    1312] la Colmán Duib Chuilinn.
  25. G. vii. cal. Decembris.
    1313] Lasin n-Eoin Cassian
    1314] assa érchaín corann,
    1315] luid a Croich, caín ferann,
    1316] Findchú ó Bríg Gobann.

    26. p.237

  26. A. vi. cal. Decembris.
    1317] Guid décheng n-derb n-dálach
    1318] co popul bán búadach,
    1319] Banbán, bruth óir óiblech,
    1320] epscop Siric srúamach.
  27. B. v. cal. Decembris.
    1321] Srúaim n-ecnai co n-áni,
    1322] Sechnall mind ar flathae,
    1323] ro gab ceol, sóer solad,
    1324] molad Pátric Machae.
  28. C. iv. cal. Decembris.
    1325] Prím-threcheng nach duthain
    1326] Trophimi cen mathim,
    1327] maicc Bochrae, búaid suthain!
    1328] ó Achud réid Rathin.
  29. D. iii. cal. Decembris.
    1329] Ríg-féil Brénainn Biroir,
    1330] fris m-bruchta leir lébenn.
    1331] ba cáin mind már n-ualann,
    1332] cenn find fáithe n-Erenn.
  30. E. Pridie cal. Decembris.
    1333] Andreas as dánu
    1334] fri croich, céim as úagu,
    1335] do-beir barr, no bágu,
    1336] Nouimbir for slúagu.

p.249

MÍ DECIMBIR.

  1. F. Calendis Decembris.
    1337] Sluind Decimbir calaind,
    1338] Candida caín curach,
    1339] paiss Panchrati calad,
    1340] féil nóib Nessáin Ulad.
  2. G. iv. nonas Decembris.
    1341] Oll-chéssad Parmeni
    1342] iar serb-gáibthib gortae,
    1343] gessi la lín martrae
    1344] Mael Odrán mór mochtae.
  3. A. iii. nonas. Decembris.
    1345] Martrae ard Herácli
    1346] cona chléir ind fhír-druin,
    1347] Macc Óige co n-úagbail,
    1348] luam Liss Móir mírbuil.
  4. B. Pridie nonas Decembris.
    1349] Merobus, Claudicus
    1350] co n-aidbli a srethe:
    1351] ba h-óen ar sóer sruithe
    1352] in fíal Fer Dá Lethe.
  5. C. Nonis Decembris.
    1353] Foraithmet Iustini
    1354] ind epscoip co n-áni,
    1355] Amanti, Crispini,
    1356] Umbáni, Filádi.

    6. p.250

  6. D. viii. idus Decembris.
    1357] Féil Gobbáin, gáir míle,
    1358] co cléir martrae máre,
    1359] múr ainglech, abb h-óige,
    1360] maccu laindrech Láne.
  7. E. vii. idus Decembris.
    1361] La paiss Policarpi
    1362] cona chléir shóir shrúamaig:
    1363] ó Mainistir máinig
    1364] féil bán Buiti búadaig.
  8. F. vi. idus Decembris.
    1365] Buaid n-Ichtbrichtáin umail
    1366] da-rrala tar ro-muir.
    1367] do Chríst cachain figil
    1368] h-i curchán cen choduil.
  9. G. v. idus Decembris.
    1369] It cadlai dí ingein
    1370] Ailella nád chlithi:
    1371] is caín slúag a l-laithi,
    1372] dí gréin Airthir Liffi.
  10. A. iv. idus Decembris.
    1373] La dá chóicat ógdae
    1374] cert-trichae co l-láni,
    1375] líth Capitolini,
    1376] féil Mo Dímóc dáni.

    11. p.251

  11. B. iii. idus Decembris.
    1377] Damasus la M' Shenóc
    1378] Mugnai tuaith, mag lethan,
    1379] féil M' Elteóc cáid cath-fhir,
    1380] co slóg thrén tar trethan.
  12. C. Pridie idus Decembris.
    1381] Tor óir úas cech ler-maig,
    1382] gébaid coir frim anmain,
    1383] Findén find, frém inmain,
    1384] Clúana Iraird adbail.
  13. D. Idibus Decembris.
    1385] Ar laithe n-dil n-dálach
    1386] tairset co méit míle,
    1387] Báethán Clúana credlach,
    1388] Colomb trednach Tíre.
  14. E. xix. cal. Ianuarii.
    1389] Don-rogra dond ríg-fhlaith
    1390] ríg ro ucc ar siúr,
    1391] sab cáid clóithe coïr
    1392] Drusus cona thriúr.
  15. F. xviii. cal. Ianuarii.
    1393] Togairm Fausti fechtnaig
    1394] co cléir chain a thempuil,
    1395] la féil Flaind féil impir,
    1396] comarbai búain Bennchuir.

    16. p.252

  16. G. xvii. cal. Ianuarii.
    1397] Búaid find Ualentini
    1398] co cléir cháin at-róiriss,
    1399] féil Mo Beóóc dígrais
    1400] ó Ard chaindlech Cháinroiss.
  17. A. xvi. cal. Ianuarii.
    1401] Ron-snáda slúag Uictoir
    1402] iar m-búaid gníma gaile,
    1403] co r-risam, án sube,
    1404] Íssu már macc Maire.
  18. B. xv. cal. Ianuarii.
    1405] Már-grían inna cland-sa,
    1406] Magniu, maith a m-mind-sa,
    1407] Diucaill, dían a n-amm-sa,
    1408] ropat fháilti frimm-sa.
  19. C. xiv. cal. Ianuarii.
    1409] Frimm anmain rop fáilid
    1410] co n-aidbli a slógaid,
    1411] caín glan-mann Dé dúilig,
    1412] Samthann Clúana Brónaig!

    20. p.253

  20. D. xiii. cal. Ianuarii.
    1413] Ba brígach iar léri
    1414] slúag már imme-rádi,
    1415] rerthe úainn for céti
    1416] i cóimthecht Ignáti.
  21. E. xii. cal. Ianuarii.
    1417] Itge ind nóib Thomáis,
    1418] atnecham ria m-bandaib,
    1419] a bás ba scél n-ingir
    1420] i n-India iar rannaib.
  22. F. xi. cal. Ianuarii.
    1421] Ronn-ain itge Tuae,
    1422] Itharnaisc, nád labrae,
    1423] la h-Éméne n-geldae
    1424] de brú Berbae balbae.
  23. G. x. cal. Ianuarii.
    1425] Paiss ocht cét cáin martrae,
    1426] co sescait sóer slechtae,
    1427] la m-M' Themnióc dind rígraid,
    1428] Clúana fír-maith Fertae.

    24. p.254

  24. A. ix. cal. Ianuarii.
    1429] Frestal Luciáni
    1430] la m-M' Chua caín cocrait,
    1431] macc Lonáin donn-ecmaic
    1432] in n-adaig ré notlaic.
  25. B. viii. cal. Ianuarii.
    1433] In notlaic mór mírbuil
    1434] Críst ó Mairi bán-glain
    1435] génair la díth n-dorchae,
    1436] rí sorchae síl Ádaim.
  26. C. vii. cal Ianuarii.
    1437] Atnecham diar n-dígdi
    1438] Mo Chommóc co n-áni,
    1439] cáin-grian guires míli,
    1440] ainm sorchae Stepháni.
  27. D. vi. cal. Ianuarii.
    1441] Slán-chotlud Iohannis
    1442] i n-Efis, án bordgal,
    1443] a bráthair as ardam
    1444] la h-Iacoib ordan.

    28. p.255

  28. E. v. cal. Ianuarii.
    1445] Airdirc an núall suthain
    1446] sech cach cóemdai methil,
    1447] cantae túas dia n-athair,
    1448] in maccáin ó Bethil.
  29. F. iv. cal. Ianuarii.
    1449] Bid émid a cobair,
    1450] in cech úair donn-ecri,
    1451] Uictor co slóg sochlae
    1452] la h-Airerán n-ecnai.
  30. G. iii. cal. Ianuarii.
    1453] Écen charcra crochais
    1454] slúag már Mansuéti,
    1455] la h-Ailbe co n-ógi,
    1456] ar-ricfam a fhéli.
  31. A. Pridie cal. Ianuarii.
    1457] Lochán ocus Éndae
    1458] Siluester, sóer talland,
    1459] dia féil—ní léim n-imfann—
    1460] ascnam céim for caland.

p.264

EPILOGUE

  1. 1] Ón chalaind co araili
    2] ro fersam ar n-íarair:
    3] á Íssu co fírbail
    4] fort-selbai do blíadain!
  2. 5] Buidencech óin-laithi
    6] dos-ruimdemar remáin,
    7] con-ecmaingsem eráin,
    8] ar cenn fri cenn Enáir.
  3. 9] Ba h-énirt ar cumang
    10] h-i corpán as ísliu,
    11] acht ron-sert as úaisliu,
    12] serc ard arbair Issu.
  4. 13] h-Úasal-athraig, fáithi,
    14] do Chríst cíaptar céli,
    15] la dóini i l-láini
    16] ní fessa a féli.
  5. 17] Acht ro fess nád ránic
    18] ard-riched in ríg-sa,
    19] anim din bith búan-sa
    20] acht i n-óen na líth-sa.

    6. p.265

  6. 21] Luchtlach lán cech laithi
    22] i l-líg-fhlatha lestur,
    23] iar m-búaid ocus coscur,
    24] do-digset diar frestul!
  7. 25] For nem a con-rúalae
    26] cech laithe dind íre,
    27] ní gó cé ro báige
    28] as mó mílib míle.
  8. 29] De mílib a m-mór-sin
    30] a m-muir m-brígach m-búan-sin,
    31] ní tucsam dind lín-sin
    32] acht ríga na slúag-sin.
  9. 33] Slúaged caín cech laithi
    34] ata n-aidble bríga,
    35] de cach leith dar túatha
    36] domm-ísat la ríga.
  10. 37] Á rí nóib not-guidiu
    38] is íar scís fom-ruirmius
    39] ro bith-beó it pardus
    40] lasin slóg do-ruirmius!
  11. 41] In rígrad do-ruirmius,
    42] ol is loimm de ro-muir.
    43] cechae co cléir chredail
    44] robet ocomm chobuir!

    12. p.266

  12. 45] Cotom-rócbat uili
    46] comm ríg rímter flaithi,
    47] rom-shnáidet mo shruithi
    48] cách co lucht a laithi.
  13. 49] Lucht fris fáilti feraim
    50] cosin cách no charim,
    51] rom-snáidet com fhairinn,
    52] cund, céill, curp com anim.
  14. 53] Nach anim ro ánic
    54] riched, réim as díxu,
    55] ro-icfa as úaisliu
    56] ron-bé bendacht Íssu.
  15. 57] A sobarthan uile
    58] lasin slóg cos' tíagat,
    59] ron-nóebat, ron-mórat
    60] in n-ard-ríg ad-gíallat.
  16. 61] Lán-bendacht ind ríg-sa
    62] cona shlógaib cáinib,
    63] rob-bé úas bar n-dálaib
    64] for Máel Rúain ria n-dáinib!

    17. p.267

  17. 65] Dom-rairbera m' aite,
    66] co Críst cóem tar dili,
    67] dia bendacht co n-glaini,
    68] la dúthracht a chridi.
  18. 69] A Chríst, cotam-róither
    70] tís túas ar cech mélacht,
    71] frim dúbairt la dillacht
    72] ar écnairc do gérat!
  19. 73] In grafand ro fersam
    74] flatha Críst is colbu,
    75] ar ro thúirsem libru,
    76] con-gaib mór di thorbu.
  20. 77] Is torbe do oscraib
    78] dia m-ba lúrech lére,
    79] ar-peti cech díne
    80] do thoscélad féle.
  21. 81] Cit suïd nod-légat
    82] ata lethna lindi,
    83] fil and mór n-ard n-aille
    84] fris-melat a rindi.

    22. p.268

  22. 85] Rí nime co n-ainglib,
    86] asa chlú nád célam,
    87] cach martir ad-rímem
    88] táncatar dia dénam.
  23. 89] Ní soas do-rigni
    90] in lebrán léir laindrech,
    91] acht fortacht ríg ainglech,
    92] Issucán cáin caindlech.
  24. 93] Cáin-shenad domm-ánic
    94] i m-mid-chuairt mo thige
    95] dia chocertad fíaduib
    96] fo ríaguil ríg nime.
  25. 97] Ní h-ane fod-ruair,
    98] is col dúin dia foirglem,
    99] cech nóeb án co n-idnai
    100] do-rigni a choiptel.
  26. 101] In t-ord inna caiptel
    102] ma beth nech fod-fhúasna,
    103] at-biur fíad in lín-sa
    104] is díthár don t-shlúag-sa.

    27. p.269

  27. 105] In slúag conidn-aicert
    106] in lebrán co l-léri,
    107] fria n-estecht co n-óigi
    108] ro cinnset a féli.
  28. 109] Félire ro scrútus
    110] i céin ocus acus,
    111] la dúthracht do-rignius,
    112] do nóebaib do-ratus.
  29. 113] Do-ratsat a m-bendacht
    114] for cach n-óen nod-géba,
    115] do-ragat dia fhrestul
    116] i n-aimsir at-béla.
  30. 117] La bethaid a anmae
    118] h-i flaith gréne gile,
    119] iarna breith sech ingru
    120] for dindgnu secht nime.
  31. 121] Ní dermat na díchell
    122] in cháich nád ro thuirmed,
    123] acht cuimbrigud indsce,
    124] fo shoas do chuibded.

    32. p.270

  32. 125] Cé betis secht tengtha
    126] im gin sóee suilgind,
    127] co bráth, mó cech delmaimm,
    128] issed ma do-ruirminn.
  33. 129] Ní roach ná rudrad
    130] in lebrán co l-léri,
    131] acht taithmet nóeb n-óige
    132] la soas fo rédi.
  34. 133] Césu réid ar lebrán
    134] co lúthigi altae,
    135] ní suirge na sotlae
    136] ro chruidi mór partae.
  35. 137] Pairt adbul Ambrósi,
    138] séis Elair co l-léri,
    139] andgraib Hironími,
    140] martarlaic Eusébi.
  36. 141] Slóged lebar n-Érenn,
    142] asa trebar tóiden,
    143] ro túrsem a n-dírman,
    144] félire fer n-Góidel.

    37. p.271

  37. 145] Fort-gillim cen rudiud
    146] cé roïs a l-lechtu,
    147] ní foigbe la luchtu
    148] félire bas certu.
  38. 149] Is cathir do chomét
    150] a chétul cen merbai,
    151] is múr trén cen dolmai
    152] fri dóini, fri demnai.
  39. 153] Fri Dia is dúbart,
    154] fri Demon is dínert,
    155] is salm sloindes mór-nert,
    156] is félire fír-chert.
  40. 157] Cach óen dia m-ba esnad
    158] a sóer-chetul m-búan-sa,
    159] i m-bith-fhlaith ind ríg-sa
    160] noda-snáidfea in slúag-sa.
  41. 161] Slúag ro-maith ind ríg-sa
    162] lasa tá mo bág-sa,
    163] bes comland an núall-sa
    164] tar a cenn am ráth-sa.

    42. p.272

  42. 165] Am ráth-sa dia ráith-sium
    166] nod-géba cech día,
    167] fort-gillim cen gúa
    168] i m-bith-fhlaith ro m-bía.
  43. 169] La bethaid a anmae
    170] la Críst cóemdae nert-fhlaith,
    171] dia m-ba gnáth co r-ro-chneit
    172] a both slán ní decmaic.
  44. 173] Mad étal nod-gaba
    174] fo déraib co n-glaini,
    175] fertae amrai ili
    176] do-génatar airi.
  45. 177] Is arrae secht n-oiffrend
    178] mad nóeb arid-léga,
    179] is arrae trí cóecat
    180] don dilmain nod-géba.
  46. 181] {L C LB P F§} Is arrae án aurtaig
    182] na féli-si uile,
    183] is nóebad a anmae,
    184] is tróethad a thuile.    §

    47. p.273

  47. 185] Is fír-thabart coibsen,
    186] is arrae trí tredan,
    187] do chách phurt í canar
    188] ernaigthe céit chredal.
  48. 189] Is cretar, is communn,
    190] is cantaic for salmaib,
    191] is dídnad do chredlaib,
    192] is écnairc do marbaib.
  49. 193] Is todiuscud etlae
    194] cid dúrdae a chride,
    195] do-formaig a anae,
    196] berthi h-i flaith nime.
  50. 197] Is lúrech im chrabud
    198] fri aslaige demnae,
    199] is diórad figle,
    200] is íccid cech thedmae.
  51. 201] Is écnairc i m-bethu
    202] fri h-omun cech báeguil,
    203] is nóebad do gnímaib,
    204] is tinbúanad sáeguil.
  52. 205] Is foillsiugud fertae,
    206] do-formaig cech m-bordgal,
    207] do-beir grád as ardam,
    208] is cumgabáil ordan.

    53. p.274

  53. 209] Is auromun Fíadat,
    210] is serc deodae daingen,
    211] is indarbae demnae,
    212] is tochuiriud aingel.
  54. 213] It adamrai uili
    214] na fertae ad-fíadam,
    215] bendacht for cech n-duine
    216] ar-da-légfa íaram.
  55. 217] Co m-bad h-ed no gessed
    218] don Chommdid co m-maissi,
    219] míl úre ní promfat,
    220] ní lobfat a thaissi.
  56. 221] A anim cen chosnam
    222] i r-riched co n-gili,
    223] dia éis íarna ríchtain
    224] íccfaid drucht a ligi.
  57. 225] La taithmet a féle
    226] ronn-ain gréss a n-guidi:
    227] nicon saethar madae,
    228] da-ruirmisem uili.
  58. 229] Ind rígrad do-ruirmius,
    230] is ocus ar cundu,
    231] iar tuirim a féle
    232] do-rímiub a n-drungu.

    59. p.275

  59. 233] Drong árchaingel nime,
    234] im Michél sóer sobail,
    235] la nói n-grád ríg rathmair
    236] cathrach in Ríg romair.
  60. 237] Drong rerach im Nóë
    238] tar sál-muire sretha,
    239] céli ind Ríg flaith-gil,
    240] ba h-ed aithgin m-betha.
  61. 241] Drong fáithe imm Esaiae
    242] proféta cáin canmae,
    243] uasal-athraig guidme,
    244] la h-Abraham n-amrae.
  62. 245] Drong apstal imm Phetar
    246] co n-desciplaib Íssu,
    247] Pól prímdae cen eclai,
    248] cenn ecnai as díxu.
  63. 249] Drong martir im Stefan,
    250] doss órdae co n-glaini,
    251] ancharait imm Shen-Phól,
    252] drong nóeb-úag im Mairi.
  64. 253] Drong nóeb-epscop Romae
    254] imm Phetar án bordgal:
    255] epscoip Ierusalem,
    256] la h-Iacob n-ordan.

    65. p.276

  65. 257] Drong epscop i n-Antuaig,
    258] la Petar breo prímdae,
    259] epscoip Alaxandriae,
    260] la Marc rúad-gorm rígdae.
  66. 261] Drong nóeb Honoráti,
    262] cath-míl sochlae slúagach,
    263] drong ecnai ro rígad,
    264] la Benidecht m-búadach,
  67. 265] Drong airdirc Giurgí,
    266] ní dedbul fri fethim,
    267] nach macc do-chuaid martrai
    268] la Hirúath i m-Bethil.
  68. 269] Drong sacart ad-ropart
    270] corp Chríst césta cruiche
    271] dom chobair cech laithe
    272] la h-Árón sab sruithe.
  69. 273] Drong manach imm Antón,
    274] ata rúndai retha,
    275] la Mártain míl catha,
    276] drong ard-nóeb in betha.

    70. p.277

  70. 277] Drong úasal-nóeb n-Érenn
    278] la Pátric as ardam,
    279] Columb Cille con-gaib
    280] co n-drongaib nóeb n-Alban.
  71. 281] Drong dédenach dermar,
    282] for-chenna cáin gébenn,
    283] sanct Brigit íar m-búadaib
    284] co n-úagaib na h-Érenn.
  72. 285] Inna druing-sea uili
    286] co n-ard-rígaib sóeraib,
    287] dom chobair, cléir gelbán,
    288] slóg dermár do nóebaib.
  73. 289] Cech nóeb bói, fil, bías
    290] co bráth, brígach fo-dail,
    291] i coimthecht Críst credail,
    292] ro bet ocom chobair.
  74. 293] Ro bet ocom chobair
    294] for nim ocus talmain,
    295] co tísat i m-buidnib
    296] do chungnam frimm anmain.
  75. 297] M' anim, mo chorp cnedach,
    298] céin bete fri sóithar,
    299] ro bet ocom dídnad
    300] ind rígrad ad-róithach.

    76. p.278

  76. 301] Ad-róithach in rígraid
    302] forsa raba íarar:
    303] á Íssu co fírbail
    304] ata-teoch-sa íaram.
  77. 305] Iar tuirim na n-drong-sa,
    306] á ard-rí nád chlithi,
    307] á Chríst dianda chéle,
    308] miserére michi.
  78. 309] Miserére michi,
    310] á ríg-fhlaith for tuiliu
    311] á Íssu not-caru,
    312] á Dé móir not-guidiu.
  79. 313] A Dé móir not-guidiu,
    314] cluinte mo chneit trúaig-se,
    315] ro-beó iarsin báig-se
    316] i m-bith-gnáis int shlúaig-se!
  80. 317] In slúag mór do-rímu
    318] at-bath in cech béscnu,
    319] frit, á Chríst as úaisliu,
    320] ad-sluindiu a chéstu.
  81. 321] Ad-sluindiu a fuili
    322] fír-ennca for róenu,
    323] ad-sluindiu a n-áltu,
    324] a l-laignea tria tóebu.

    82. p.279

  82. 325] Ad-sluindiu a cneta,
    326] a n-osnada fégi,
    327] frit, á Chríst, com thrúaigi,
    328] ad-sluindiu a féli.
  83. 329] Fri tudrach in domuin,
    330] ol is mór a dínert,
    331] immut-sa co m-bán-tlacht
    332] ad-sluindiu a sírecht.
  84. 333] Ad-sluindiu a spirtu
    334] it ríg-fhlaith co m-maissi,
    335] duit-siu, ol it fissi,
    336] ad-sluindiu a taissi.
  85. 337] Nach itge no guidiu
    338] duit-siu arnách n-éra;
    339] tara n-gnúissi bána
    340] ad-sluindiu a n-déra.
  86. 341] Ad-sluindiu do riched,
    342] a n-deramrae n-daingen,
    343] ó medón co h-imbel
    344] co nóeb-airbrib aingel.
  87. 345] Ad-sluindiu cech n-audpairt
    346] ad-roipred fo bróenaib
    347] do chorpán ís nélaib
    348] for altórib nóebaib.

    88. p.280

  88. 349] Ad-sluindiu núall m-búada
    350] cías cach macc lére,
    351] bróenán fola h-úare
    352] tria thóebán fodéne.
  89. 353] Do dóenacht, do déacht,
    354] lat nóeb-Spirut n-delbdae,
    355] ad-sluindiu do thuidme
    356] lassin n-Athair nemdae.
  90. 357] Ad-sluindiu lat nóebu
    358] frit a n-óg no ráidiu,
    359] condom-roib it rígu
    360] na ní ara m-báigiu.
  91. 361] Nach bág forsa torchair
    362] mo menmae múad medrach,
    363] la béim dim churp cuimnech
    364] ro gé duit do theglach.
  92. 365] Cluinte lat, á Íssu,
    366] do deórudán lobur,
    367] ferr lium indás anad
    368] scarad frisin n-domun.
  93. 369] Co r' ícthar mo barae
    370] la logud mo guide,
    371] ní diultach mo charae,
    372] ad-sluindiu frit uile.

    94. p.281

  94. 373] Aille, á chliar nime,
    374] nech úaib ardom-thúassi,
    375] cen buith i bar n-gnáissi
    376] is mór fodom-glúassi.
  95. 377] Fom-glúaissi mór n-dubai
    378] sund ís ríched rind-mas,
    379] ol is maith for comgnas
    380] is tromm form for n-ingnas.
  96. 381] Con-icid mo chobair,
    382] ol is mór for n-gaire,
    383] slánaigid mo chride
    384] ar écnairc Maicc Maire!
  97. 385] Mór cumce i táu-sa
    386] i corpán chóel chodail,
    387] it móra mo chinaid,
    388] con-icid mo chobair.
  98. 389] Manod-techtaid dé-sheirc
    390] cona tuirim téchti,
    391] bói sund dúib i n-ísli
    392] bochtán fris-mbad dénti.

    99. p.282

  99. 393] Ma choníssid coicsed
    394] ba mithig far tíchtu,
    395] atá sund as h-uatiu
    396] dedblén de thúaith Íssu.
  100. 397] Cé ní eslind lib-si
    398] ar gnúis ind ríg nél-sa,
    399] ol am dedblén trúag-sa
    400] cen chobair mo dér-sa.
  101. 401] Á drong nóeb secht nime,
    402] ol is mór for n-gaire,
    403] slánaigid mo chride
    404] ar écnairc Maicc Maire.
  102. 405] Ar écnairc ind ríg-sa
    406] frisn-agar an núall-sa,
    407] fa-rith asint shním-sa,
    408] in pauperán trúag-sa.
  103. 409] Cid trúag lasna bráithrea
    410] na guidi-se uili,
    411] duit, á Chríst, in tráth-sa
    412] ro gád-sa mo guidi.
  104. 413] Guidiu itge n-aile
    414] tar cenn fer in betha,
    415] á Choimmdiu na flatha,
    416] á rí beres bretha!

    105. p.283

  105. 417] Bés níp aill do dáinib
    418] in dúbart-sa uile,
    419] diar n-éis arnáp barae,
    420] cóemchloither in guide
  106. 421] In guide ron-gád-sa
    422] ní ar ulc fri dóini,
    423] ferr lium indás anad
    424] scarad frisin clóini.
  107. 425] Cluinte lat, á Íssu,
    426] á Chríst dianda chéle,
    427] ro ere-siu uile
    428] guide cech maicc lére.
  108. 429] Guide cech maicc lére,
    430] á Choimmdiu, ní h-espae,
    431] ro ere-siu doaib
    432] mad coair a n-gestae.
  109. 433] Mad coair a n-gestae,
    434] á rí con-ic talmain,
    435] a curpu ro sóerae,
    436] ro nóebae a n-anmain.
  110. 437] Anim cech maicc bethad
    438] is triut ro nóebad,
    439] síl n-Ádaim as díxu,
    440] la h-Íssu ro sóerad.

    111. p.284

    On metrical grounds Rudolf Thurneysen (in Le mètre irlandais rinnard, Revue Celtique 7 (1886) 87-90: 89) considers that lines 441-556 are interpolated by a later poet.

  111. 441] Rom-shóerae, á Íssu,
    442] mo chorp ocus m' anmain
    443] ar cech ulc do-chuissin,
    444] fris-oirg forsin talmain.
  112. 445] Rom-shóerae, á Íssu,
    446] á Choimmdiu cáin comul,
    447] amail sóersai h-Éli
    448] la h-Enóc don domun.
  113. 449] Rom-shóerae, á Íssu,
    450] ar cech ulc for íre,
    451] amail sóersai Nóë
    452] macc Lamech din díle.
  114. 453] Rom-shóerae, á Íssu,
    454] á rí glésse glandae,
    455] amail sóersai Abram
    456] de lámaib na Caldae.
  115. 457] Rom-shóerae, á Íssu,
    458] á rí rúndai rathmar,
    459] amail sóersai Loth
    460] de pheccad na cathrach.
  116. 461] Rom-shóerae, á Íssu,
    462] á rí úasail amri
    463] amail sóersai Iónas
    464] de brú céti magni.

    117. p.285

  117. 465] Rom-shóerae, á Íssu,
    466] it ríched i rathach,
    467] amail soersai Ísac
    468] de lámaib a athar.
  118. 469] Rom-shóerae, á Íssu,
    470] lat nóebu tan tíastae,
    471] amail sóersai Teclam
    472] de ginól na bíastae.
  119. 473] Rom-shóerae, á Íssu,
    474] ro éra do máthre,
    475] amail sóersai Iacób
    476] de lámaib a bráthre.
  120. 477] Rom-shóerae á Íssu,
    478] ar cech n-olc nád rachrad,
    479] amail sóersai Ióain
    480] de neim inna nathrach.
  121. 481] Rom-shóerae, á Íssu,
    482] ar iffern co trógi,
    483] amail sóersai Dauíd
    484] de gail claidib Góli.
  122. 485] Rom-shóerae, á Íssu,
    486] ro sóerais na h-uili,
    487] Susannam co n-ordun
    488] iarsind fhorgul fuirri.

    123. p.286

  123. 489] Rom-shóerae, á Íssu,
    490] ar écnairc do báge,
    491] amail sóersai Ninuén
    492] i n-aimsir na pláge.
  124. 493] Rom-shóerae, á Íssu,
    494] glé lim atom-didmae,
    495] amail sóersai popul
    496] Israël de Gilbae.
  125. 497] Rom-shóerae, á Íssu,
    498] a Choimmdiu as deodam,
    499] amail sóersai Daniél
    500] assin chuithi leoman.
  126. 501] Rom-shóerae, á Íssu,
    502] a rí sochlai sóbis,
    503] amal sóersai Moysén
    504] de manu Farónis.
  127. 505] Rom-shóerae, á Íssu,
    506] mór-fhertae do-rignis,
    507] amail sóersai maccu
    508] de camíno ignis.
  128. 509] Rom-shóerae, á Íssu,
    510] a rí cecha clainde,
    511] amail soersai Tóbe
    512] de thróge na daille.
  129. 513] Rom-shóerae, á Íssu,
    514] ar écnairc do martrae,
    515] Pól Petar fíad rígaib,
    516] de dígail na carcrae.

    130. p.287

  130. 517] Rom-shóerae, á Íssu,
    518] ar accais cech thedmae,
    519] amal sóersai Iób
    520] de fhochidib demnae.
  131. 521] Rom-shóerae á Íssu,
    522] á Chríst, ní rop áilsed,
    523] amail sóersai Dauíd
    524] ar Shauul dia tháinsem.
  132. 525] Rom-shóerae, á Íssu,
    526] ar écnairc do máthre,
    527] amal sóersai Ióséph
    528] de lámaib a bráthre.
  133. 529] Rom-shóerae, á Íssu,
    530] á rí benedicte,
    531] Israél co nóibi
    532] de dóiri Égipte.
  134. 533] Rom-shóerae, á Íssu,
    534] ol is frit mo chairde,
    535] amail soersai Petar
    536] de thonnaib na fairge.
  135. 537] Rom-shóerae, á Íssu,
    538] ar iffern n-gér n-genech,
    539] amail sóersai Ióain
    540] assin dabaig thened.
  136. 541] Rom-shóerae, á Íssu,
    542] á rí úas na flathib,
    543] amail sóersai Samsón
    544] térnae assin chathir.

    137. p.288

  137. 545] Rom-shóerae, á Issu,
    546] m' anmain ar cech n-dígail,
    547] amail sóersai Mártain
    548] ar shacart ind ídail.
  138. 549] Rom-shóerae, á Íssu,
    550] ar écnairc do theglaig,
    551] amal sóersai Pátric
    552] de thonnud h-i Temraig.
  139. 553] Rom-shóerae, á Íssu,
    554] ol is duit am céle,
    555] amal sóersai Cóemgein
    556] de chutaim in t-shlébe.
  140. 557] Rom-shóerae, á Íssu,
    558] it bith-búana t' fherta,
    559] á Chommdiu non-áiliu,
    560] fris-áiliur do thechta.
  141. 561] Tan domm-í techt irguis,
    562] cid i caisc nó chorgus,
    563] rom-shnádat i pardus
    564] ind rígrad im-rordus.
  142. 565] Im-rordus in rígraid
    566] immon ríg úas nélaib,

    &c. FINIT. amen