Corpus of Electronic Texts Edition
The Metrical Dindshenchas (Author: Unknown)

poem/story 126

DRUIM N-ASSAIL

  1. Druim n-Assail, iarfaigther dam
    cid diatá in tilach thond-glan?
    dund fir rothreb fora fhoír
    diatá Assal mac Umóir.
  2. Acus meic Umoir uile,
    cade a slonnud ar suide?
    cade a craeb choibniusa immach,
    acht mad fine Fomorach?
  3. Fer díb-side, Assal ard,
    dessid uasin druim dron-ard
    im-medón Muman, miad ngle,
    uas Chliu Máil meic Úgaine.
  4. Adaig luid Fergus mac Róig
    do thig Assail meic Umóir:
    ferais Assal failte fris,
    ‘Muchen duit, dia caemsimmis.’

    5. p.348

  5. ‘Cid’, ar Fergus, ‘cid diatái?’
    ‘du menma cid araclóe?’
    ‘Innocht,’ ar Assal,‘mu brath,’
    ‘itá i tucthin mo marbath.’
  6. ‘Ni rag-sa’, ar Fergus, ‘istech:’
    ‘ní maith aíge anairech:’
    ‘rout, a gillai, dar druim sair,’
    ‘scuir in carpat iar sodain.’
  7. Áth Carpait Fergusa itá
    aness do tháib na tulcha:
    dessid and ed bec ón rót:
    bai fer ocon fhorcomeót.
  8. Im-medón aidchi tic dám
    assin tír dianid ainm Espán:
    suil dressed súas, fír raclos,
    bái tricha gae i Fergos.
  9. Atnaig Fergus na ferga
    imna rennaib roderga,
    marbais tricha díb didu,
    rofacaib 'na chró-ligu.
  10. Tiagait ass na slóig iar sain,
    gabait tall im thech n-Assail,
    co rucsat cend Assail áin
    ó h-Érind co h-Espáin.
  11. Othrais Fergus ilair ngal
    i tig Conchind meic Dedad:
    tanic Cú Rúi d' fhis scél
    otá tír Franc cu fortrén.
  12. Accaínis a imned fris
    Fergus fri mál Maige Mis,
    co n-deochatar dib línaib
    ir-rocheín dia rodigail.

    13. p.350

  13. Cathir in ríg ruc in cend
    tanic dias trén 'na thimchell,
    muchsat marbsat immon ríg
    in slóg direcra dírim.
  14. Co tucsat leo na da cend
    ó h-Espáin co tír nh-Erend,
    cend in ríg ronert innair,
    cend n-Assail co Druim n-Assail. D.