Corpus of Electronic Texts Edition
The Metrical Dindshenchas (Author: Unknown)

poem/story 124

SLÍAB CÚA

  1. Tanic tam, truag ind airle,
    do buar Banba barr-aidble,
    rosmarb cen timme na teist,
    acht tarb Glinni 's a samaisc.
  2. Ser-mac Rudraigi rigda
    Bresal bladach bo-dibda
    ba flaith os chuan cach curaich
    fobái slúag in bo-chumaid.
  3. Aice robui duanach drui
    diarb ainm Buadach mac Birchlúi:
    is do nogairthe cen fhell
    in sen-Bodb Bairchi bél-cherr.
  4. Do Budb tuc Bresal na m-breth
    a boin is a tharb maeth-mer
    ar rath féile in rig cor-rath
    do chosc aithgeire a druäd.
  5. Fuacrais in drúi dia daltaib
    comét in buair bec-lachtaig,
    fer díb cech lái fri seirc sét
    dia ngeilt is dia lan-chomét.
  6. Rosaich co Cua cendmar cain
    comét bend-glan in buair sain
    ar fhogail sluaig co seirge,
    ar chonaib, ar chuan-meirle.

  7. p.340

  8. Luid lasin seilb co saine
    in fer meirb cen min-gaire
    conostuc i m-brothlaig buair
    forsin tshleib chochlaig cith-ruaid.
  9. Desin atá in caem-sliab Cua,
    nocon é in saeb-niam sar-nua:
    fair fogní fulucht n-ambal
    diarbhí in muducht mor-adbal.
  10. Rodelbus gleri cen gua
    do shenchus Sleibe sen-Chua,
    drong rand raglan im gnim nglicc:
    oll in t-adbar trias' tanic. T.