Corpus of Electronic Texts Edition
The Metrical Dindshenchas (Author: Unknown)

poem/story 120

LECHT HÉILE

  1. Is eol dam-sa in dluig diatá
    Lecht Heile cen immargá:
    fuair bás braiti brí na m-breg
    do sceol Raitte co romer,
  2. Diar' cechaing fri fiansa fecht
    Fergal, flaith feidil find-chert,
    co h-Ailill co Cruachain crúaid
    co rig Connacht claideb-rúaid.
  3. Da shiair occu dib linaib,
    Héile is Medb co mór-gnimaib,
    grinn-gela im garg-bríg rosgell,
    ingena d' ard-rig h-Erenn.
  4. Dolluid atuaid a tír Breg
    Herc mac Echach na n-inber
    dar eis Fergail na foga,
    cen ergail áig imgona.
  5. Ni thormailt bíad no bronnud
    no caemna no comlongud
    ic fir thiri no thalman
    icon díni dam-adbal.
  6. Nogairthi a shiur 'na dochum,
    ni d' ág no d' h-ulc no d' fhochua
    cor' thoimled fiadach feda:
    ba miannach a aiscena.
  7. Bith i fothrib co ferda
    dognítis co comfhedma,
    longud fiadaig a fedaib
    co diamair os dairedaib.
  8. Cartais Raitte, reim co docht,
    fis co Fergal fír-etrocht,
    fail Heile inn óir is na n-ech
    ic céile chóir chomaithech.

  9. p.328

  10. ‘Teine tulcha taircther di,’
    ar Fergal cen fhirinni,
    ‘ar-rochur ind dia h-arggain’
    ‘corop tind in timmargain.’
  11. Doringned amlaid uile
    ic damraid na n-duluige:
    truag in garg-dil rogníd and
    for ingin ard-rig h-Erend.
  12. De sin dorochair Fergal
    dia cumaid, linib ler-gal,
    dia tudchaid aniar ane
    co Caillin fial Fergaile.
  13. Doel ainm am-mathar moalle
    ruc d' Eochaid Herc is Eile:
    in bás rosfuc as cach eól
    fail sund dune dan dag-eol. Is.