Corpus of Electronic Texts Edition
The Metrical Dindshenchas (Author: Unknown)

poem/story 114

DÚN MÁSC

  1. Iarfaigid dím, comul ngle,
    mad áil dúib eolas d' aichne:
    ni triamain intí notairg
    eter Liamain is laech-Mairg.
  2. Cethri meic ic Sétnu sheng,
    ba díb Nuadu Necht nar-thend,
    Mess Delmond, Oengus Ochach,
    Ugen urgnaid il-chrothach.
  3. Se meicc ic Ugen cen ail,
    ba rún-mer im cach rogail,
    tumsat
    [gap: extent: one or two words]
    cen tacha trá,
    cumsat ratha is rodindgna.
  4. Ladru, NoŽ, Finteng fert,
    Luad cúar, is Alb na n-airbert;
    fuair fasc cecha fini in fer,
    Másc, ba sini is ba sessed.
  5. Tindabrais Ladru na land
    i-nArd lind-amnais Ladrand:
    Finteng os mur Muadall na m-bress
    crichi Cualand contuiless.
  6. Noe i n-iarthur Rechet cen fhell
    fuair cach ndechelt ndag-fheraind:
    Másc cen mannur, ba mó gá,
    ina dangon dithogla.
  7. Atchuala treib is' tír thair
    ic Nóe mac Ugein aurgnaid:
    olc fath dia m-bái, borb in col,
    Rath Núi i crichaib Garrchon.
  8. Dibaid a chland aichri alt,
    gnímaig os aichthi ecrat:
    rosmucha in rí rechta thor,
    acht mád Ucha, oen-chethror.

  9. p.316

  10. Luad oc Dún Chuair, cumnig lat,
    co rubnib is co rigdacht:
    fuair Alb, cen min-dergnas de,
    dindshenchas forAlbine.
  11. Clanna Ugein láth ngaile
    batar rúinig rath-maige:
    ni síl deoraid ar daigid
    am eolach na n-iarfaigid. Iarfaigid.