Corpus of Electronic Texts Edition

The Metrical Dindshenchas (Author: Unknown)

poem/story 68

BILE TORTAN

Ultan

1. Bile Tortan dorochair,
   doruart mór sín dia eochair:
   cian comdatar minnain fris,
   ba amne noscarfaitis.

Mochuma

2. Bile Tortan tarcai tres
   lúadaid fri gáetha graifnes:
   atá sunn ón úair ba glass
   cosin lathe bas n-aithmess.

Mochúa Clúana Dolcan

3. Brónaig fir Thortan uile
   ac caíned in óen-bile:
   annsa dóib aní n-adchíat
   do ní uili nádunbíat.

Cróin Galma

4. Fir Thortan dia fertais dál
   'mon crann n-deligthe n-dermár,
   nícostaidled siled sín
   cosin lathe bad erchrín.

p.242

Colum Cille

5. Cía rocrínad nírbo rom,
   cían úad ótá ar domun:
   in Rí dorósat a chrí
   rofuirim afrithisi.

Ultan Tige Túa

6. Coíca ed remet in chrainn
   dercad tar feda fír-druing,
   ocus trí cét, comul nglé,
   hi lán-airde a fhidbaide.

Mochuma

7. Trí dindgna Erenn, doscí,
   roscarsat fri trebairi:
   Eó Rossa, Eó Mugna múad
   ocus Eó Tortan táeb-rúad.

Mochúa

8. Bile Tortan, trom a fhúaim
   fri h-ainciss síne rorúaid:
   rolá sunn mór saithe de
   osnad gáeithe gem-aidche.

Ultán úa Conchobair

9. Rogab foss ós Tortain truimm
   ó ré mac Míled mór-uill
   co torchair, tan rosaí a gné,
   hi ré mac n-Áeda Sláine.

Cróin Galma

10. Gáeth dorascair in bile,
    ní fulaing nach dían cride,
    co foraim trí coícta troch
    do Chonaillib 'na n óenoch.

Sinche ó Chillín Íchtair Thíre

11. Cía nodbena-su, a chaillech,
    brosna dia ind fort tellach,
    is mór do maccaib cóemaib
    conatail foa glan-chróebaib.

p.244

Ultán Tige Túa

12. In ben roscaíl a moing find
    roscaíl mór cuarán cóem-grind:
    is cass conatbi a gen
    iar fuirmed Bili Tortan. Bile Tortan.

Cróin Galma

13. Dotuit uile frismbí súil:
    confersat gletin rodúir:
    ní thall in gáeth láma de
    co foraim bága in bile. B.

Mochúa

14. Atá erchra ar gach rét
    cid fir domuin, tíagait éc:
    is úr derg, is crín a chré,
    cach lucht robuí 'mon m-bile. B.

Ultán

15. Mag Tortan, is mag cen chend
    ó doroscar fria chóem-chrand:
    dá trían a shochair luid de
    ó dorochair in bile. B.

Torannán Tulcha

16. Immarmus Adáim anall
    romelt maccu na sáer-chlann:
    is ed díl rontá-ne de
    iar crínad a sár-bile. B.

Colum Cille

17. Fás Ochann is Tlachtga án
    d' éis Ailella na trom-dám,
    mac Nathí, réided Mide,
    ní frithirt is óen-bile. B.

Mochúa

18. Is mé Mochúa, adbiur fri Cróin
    ná dénad toirsi n-dímóir:
    a frémaib in chrainn col-lí
    noásfaitis il-bili. B.

p.246

Colum Cille

19. Bá-sa laithe i n-óen na sam
    ocond fhidbaid na n-dlochtan,
    dorignius ní bad toisc dam,
    romdín barr Bili Tortan. B.

Mochuma

20. Nímtha díl cía feraid gen
    gáeithe fri feda fortan:
    indíu óen-banscál conben
    brosna do Bile Tortan. B.

Ultán

21. Cía roben gáeth cluiche friss,
    hi céin ba h-óc ní rombriss:
    do thalmain tairind cach sen:
    tathum do Bile Tortan. Bile Tortan.⁵