Corpus of Electronic Texts Edition
The Metrical Dindshenchas (Author: Unknown)

poem/story 39

INBER CÍCHMAINE

  1. Inber Cíchmaine, cid cress,
    gáet co líth-baile láech-bress
    Maine ergna, úais ella,
    mac Medba ocus Ailella.
  2. Rongáet Fergna fo gaíne,
    fíal-mac fedba Findchaíme,
    co fil a lecht ara lár,
    airm romert in mór-maccán.

  3. p.178

  4. Adbal in gním cen gaíne
    dorigne mac Findchaíme,
    bás Maine Andoí na n-ech
    ós cach glan-roí glas-lindech.
  5. Immon curach, comol nglé,
    ba mudach, ba mór-scele,
    díth Maine múaid, nárbo mer,
    ó fúair a ainm int inber. In.
  6. Ba h-and rogáet, garb in scél,
    mac Ailill find frithir-chél,
    Cíchmaine, cing crúaid ar chel,
    dia roling thúaid i n-inber. In.
  7. Nó issí a aided féin iar fír
    in fhir do chéin cen chaín-gním,
    marbad fir na mall-shúl mer
    oc tarrúd éisc na n-inber. In.