Corpus of Electronic Texts Edition
The Metrical Dindshenchas (Author: Unknown)

poem/story 23

AILECH II

FLAND MANISTBECH cecinit
  1. Cía triallaid nech aisneis senchais Ailig eltaig
    d'éis Echdach áin, is gait claidib al-láim Ercail.
  2. Ermór neich roiarfaig uli úa Maelcholuim
    Eochaid iar cund rosluind ria sund do druing Dobuill.
  3. Derb mar roiarfaig cía sóer doróni Ailech,
    ní cheil Eochaid arm-shlán airech: Garbán graigech.
  4. Cía robuí ar cáe 'ca dénam? Imchell fin-fher,
    is Garbán sóer úa Gairb ó gáel fáel nofiged.
  5. Fég cía lasa n-dernad iarum in gním glanda?
    in fer las' tucad a damna i n-deil Dagda.
  6. Dia n-iarfaigther cíasu fochond ar a n-dernad?
    a maic im lecht cundail rofhecht in fert feb-glan.
  7. Fégthar cid dia n-apar Ailech airdairc etir?
    dond ail túargaib Corrgend cicuil torgenn gletin.
  8. Geguin Corrgend mac Flathemain ó Chruaich, cluinid,
    Áed ard amra ropo mac don Dagda duilig,

    9. p.102

  9. Dia n-dechaid Áed co mnaí Corrgind ina lepaid,
    ba h-olc opair, úair nách fer cotaig rochetaig.
  10. Cechaing Corrgend iarna chrád for lár a thige;
    co romarb Áed iar n-óeth aire, ba bóeth bine.
  11. Bátar óic Érenn 'ca iarair, amra in lucht-sin,
    co ná fúaratar dond fhecht-sin iarsind ulc-sin.
  12. ‘Oirrgther,’ or cách, ‘na h-anagar dáig na n-derna.’
    ‘Nítha a díth,’ ol in Dagda, ‘fo bíth Temra;’
  13. ‘Acht tócbaid in marb romudaig fora muin-seom,’
    ‘is ferr dún trá trell dia thoil-seom andá a guin-seom.’
  14. ‘Co raib fo méla fon marb-sin, cen nach cáemna,’
    ‘co fagba lícc bas bert búada for lecht n-Áeda.’
  15. Arigis líc ós loch Fhebail, ba feidm fénned,
    co tórgab súas co crúas chórad, úais int én-fher.
  16. Ed asbert oc breith ind eire dar sreith slige,
    ‘Ach ach do ail! is deshin domaid mo chride.’
  17. ‘Coir cid Ailech doraga ris,’ ol in Dagda;
    corop ed a ainm in dindgna, airm i tarla.
  18. Techtad Néit mac Induí Ailech, bráthair athar,
    ocus Nemain a ben brethach na cned cathach,

    19. p.104

  19. Corop Ailech Néit asberthar ó cech duine
    gibis glaine, ór is leis ind inis uile.
  20. Iarfais nech and cía díne rogab in insi,
    tan dorigned in gním gland-sa ósind lind-si?
  21. Lán-memor lim, it Túatha Dé Danann drongaig
    cona ngáib cona scíathaib cona congaib.
  22. Cía rí buí for Érinn uile glé-binn glaine,
    acht in Dagda druine? ni chluine nach n-amra n-aile.
  23. A n-amm i n-dernad in dindgna, demne dolaid,
    toimsech trebaid, in tres amser toirsech domain.
  24. Dorócht mór n-díne do Ailiuch i m-bíd Imchell,
    ailig airmenn co tánic in fairmenn Frigrenn.
  25. Frigriu mac Rudi rúaid roglaig co n-úaill ergnaid
    tuc la h-ór a h-Albain armaig óg a ernaig.
  26. Ergnaid in cerdd diarbo h-ainder Ailech imgel,
    cíarbo do Fhubthaire fhond-gel ropo h-ingen.
  27. I n-athiud dosfuc dar muir mac Rudi rathaig
    iar cnis chlochair, rop fhochaid cen fhis dia h-athair.
  28. Atracht Fubthaire dia iarair, cíarbo h-indsa,
    glicc in band-sa, co toracht conici in dind-sa.

    29. p.106

  29. Deshin bretha isin daingen co nglúair graigech;
    úair ba debech rucad úaid Ailech i n-Ailech.
  30. And ba h-úamon ri Fubthaire Frigriu Fothart;
    Fiacha Sroptine rodnanacht noco toracht.
  31. Tech dorigned and 'ma mnaí la Frigrinn foglaid,
    ropo ergnaid os roí rebraid ar a roblaid.
  32. Rogníth do derg-ibur druimnech iarna dlugu,
    co ngarg-brut glór de arggut de ór de umu.
  33. Rohecrad do gemmaib glainib, gním ronglen-ón;
    ba samail trá adaig ocus lá 'na medón.
  34. Madngiúil dishein Ailech Frigrenn, fégaid find-chill,
    Ailech Néit ní tréic tre thairthim Ailech Imchill.
  35. Ní fil i crí rofessed cach ní acht Día,
    ríagail réa rofitir ó chíanaib cía. C.