Corpus of Electronic Texts Edition
The Metrical Dindshenchas (Author: Unknown)

poem/story 17

ÁTH NGRENCHA

  1. Áth nGrencha, coímchlóifid ainm
    do gním Chon, rúanaid rogairb:
    fail sund gabuil cethri m-benn
    do cheist for feraib Érenn.
  2. Fail for dá m-beinn, mana n-áig,
    cenn Fraích ocus cenn Fochnáim:
    fail araile for dá m-beinn
    cenn Eirr ocus cenn Innill.
  3. Cethrur arad, érimm nglé,
    maic Auraird maic Ainchinne,
    aslúi a fuil fo lerga,
    at ruamnaidi roderga.
  4. Ogam fail sin gabuil glúair,
    findat na druíde co h-úain:
    is cía dorat innti in tshain,
    cía lín roscland h-i talmain.
  5. ‘In gabul gúr co lín gus’
    ‘adchíu sunda’, ar Fergus,
    ‘rothesc oen-fher, as mo chin,’
    ‘do buille chrithir chlaidib.’
  6. ‘Rosfuach is rosfuc ria aiss,’
    ‘cid ed, nírb engnam imthaiss,’
    ‘is dosfarlaic sís iarsin’
    ‘dia gait d' fhir úaib a talmain.’

    7. p.80

  7. Aurard, romert isin maig
    i carput Chruain is Chnámraid:
    i Fán Chrúain forsin tshlige
    fofúair bás is bith-bine.
  8. Araid Orlaim, arduscíu,
    i combuch i cróligiu
    (mo chin rosmerta), míad ngann.
    eter lechta is láem-anmann.
  9. Aurard sund, cid mór a mag,
    rolúaid brón in gabul glan,
    forsa m-batar cind a macc:
    robo thind int athchomarc.
  10. Áth nGrencha a ainm, mad cose,
    méraid la cách a chuimne:
    bid Áth nGabla a ainm co bráth
    ón gabuil adchí 'sin áth. A.