Corpus of Electronic Texts Edition

The Metrical Dindshenchas (Author: Unknown)

poem/story 11

ÁTH LÍAC FIND I

1. Áth Lïac Find, cid diatá,
   cid nách sluinni nach sencha?
   císsi díchumne roddall,
   dia fárgab Find ailig ann?
2. Dia torchair, ba mór in cath,
   coíca la trichait nónbar
   im thrí maccu Cirb co m-búaid
   lotar la sruth anairthúaid.
3. Dia torchratar issind áth
   cethri Conaill, dá Cholmán,
   cethri Suibni, dá mac Bricc,
   cethri Dubthaig, dá Diarmait.
4. Dasuí Flathgus, gilla Find,
   a gnúis ri gáir n-écomlaind,
   docersat laiss, airm ir-ran,
   cethri cethrair, dá nónbar.
5. Da torpart dond áth atuaíth
   Fland mac Finde abrat-ruaíd:
   marbais coíca, comul ngle,
   tri conchend na h-ergaile.
6. Dia n-éccid, foichne a scél,
   foceirt in sluag i trom-nél
   díth maic Connath di Maig Lir
   robí Find in maten sin.
7. Dia n-erbairt Setna iarsin
   a brethir co rath taith
   co m-briste fir fer co ngail
   for mac Umaill di Laignib.

---

p.38

8. Dia tánic Sinand iarsin,
   ingen Mongáin as-sídib,
   dobert líc co slabraid óir
   do Fhind mac Umaill alt-móir.
9. Rigis Find a láim iarsin
   don liicc thrén tréochair
   co tuc a cend buí for muin
   Guairi guill fothroelagair,
10. Ná melta riss, ruathor gargg,
    acht gaí nó chlaidib nó chalg:
    ba óen a gessa iar tain
    comrac a thoíb ri talmain.
11. Danarlaic iarsin sin n-áth,
    tan donnánic a lond-bág,
    Senach, Senchán acus Bran,
    conid de darochratar.
14. Iarsin iarum rogab foss
    issind lind lán lethan-glass,
    conatorchratar for tráig
    dia domnaig im thignáir.
15. Fagaib ingen maten de,
    dianid comainm Bé Thuinne;
    foceird a cois-sliasait cóir,
    arind erdrolam dergg-óir.
16. Ré secht m-blíadna iarsuidiu
    co bruinniu lathi brátha:
    ní fríth buith immerthas:
    issed senchas ind átha.

---

p.40