Corpus of Electronic Texts Edition
The Metrical Dindshenchas (Author: Unknown)
poem/story 9
LIA NOTHAIN
- Atá sund fo choirthe chrúaid
ben co n-doirche is co n-dimbúaid
cen gairm a sochair 'masech,
diarb ainm Nothain nert-buillech.
- Ingen Chonmaír cen gním nguil,
inna gorm-daíl gobul-duib:
furthain cét a cuit prainde,
i n-dubthair dét deg-caille.
- Cechaing Conmáer, céim co cend,
a Crích Bérre na m-bémmenn
d'fhis na mná, ba h-úathmar blad,
co Crích Crúachan na curad.
- Tuc mór cémenn co ngairbe
ar fut Hérenn imaidble,
rocaith blíadain fo bine
oc íarair a ingine.
- Co fuair in mnaí mothlaig móir
hi fidbaid chochlaig chleth-chóir:
dond fhir diarb áil a décsin
ba lór gráin is garb-déstin.
- Ed na h-aidche dóib cen gaí,
dond fhir foirbthe, don deg-mnaí,
robátar a n-dís 'malle
ar scís oca scél-baile.
p.28
- Is é cét-ní roráid de
in ben cen báig m-búan-bréithre:
indat bí, fri saíre son,
for n-daíne ocus for n-derb-chrod?
- Mo mumme, mo máthair múad,
mo shiur, mo bráthair bith-rúad,
óg mo charat ac Druim Chaín,
in marat lat, a Chonmaír?
- Ina facca thíar 'cot tig,
ar Conmáer cíar, 'dot chairdib,
ní mair díb i tresse treb
acht messe, a móir-ingen!
- Andsin atbert in ben búan
a h-athesc mer co mílúad:
Trúag in fhochain, doría de
ná bía Nothain dia n-ésse!
- Trí coícait blíadan, báigid,
ní h-iarmar, ní h-imáirim,
atú fo dín cach daire:
ní facca mín mór-maige.
- Tíag-sa imbárach latt immach
im-mag n-Árach n-ilchrothach,
ní fil m'áige ní bas sía,
co rosáide mo láech-lía.
p.30
- Rosfuc bás, nír bét co m-blaid,
don sceól adfét a h-athair:
in ben co n-doirche, nár dúail,
atá fo choirthe chomchrúaid.
- Is í sin fochain dia fil
Lia Nothain cen imbresain:
a h-ainm inar m-bailib de
mairid, cid marb atá-se. Atá.
- Nomshaer ar imned, ar olc,
a Rí fhind-gel fhír-étrocht!
nírbam trúag 'sin dáil tall trá
iar lúad cháich atá sunda. Atá.