Corpus of Electronic Texts Edition
The Metrical Dindshenchas (Author: Unknown)

poem 80

Mag Tibra

  1. Mag Tibra, treab co caime,
    in fedadar forb-daine
    sciam nach coillter ar a chrad:
    cia o sloindter in sen-mag?
  2. 5] Tibir, robo bean co mblad;
    is uaithi sin rosealbad:
    ingen Chais clothaich na cland,
    bean do Thuathaib De Danann.
  3. Hirial mac Eremoin uill
    10] dogob co laechda Liathdruim:
    dobo ri can easbaid ech:
    dobi in bean sin a buimech.
  4. Teit Irial a fecht rigi
    timchell Erend ard-chaime,
    15] co riacht Dun Tibra truime,
    d' agallaim a ard-buime.
  5. Andsin dogob galar gerr
    aird-ri aireda Erend,
    co fuair bas nachar foill de,
    20] cerbo thasc broin da buime.
  6. Tecaid fir Erend uile
    fa thasc Ireil folt-buide,
    da breith co Cruachain na clann,
    reilec Tuaithe De Danann.

  7. p.434

  8. 25] Tocbaid leo corp in rig rain,
    des le Herind, cle re traig:
    nir soinmech a feis co froig:
    fagbaid crich Breis co Borraich.
  9. Tromaigis arna fearaib
    30] ma chorp in rig rorebaig,
    cor' claisead fert in rig rain
    im chorp in rig a Hespain.
  10. Dochuaid Tibir isa muir
    do chumaid Irel uasail,
    35] cor' chuir in tonn tiug da treoir
    ben Palaip maic Eremoin.
  11. Tucad i tir Tibir thruag,
    nocor' cuir i socht in sluag:
    ni uair dimiad re ndula:
    40] tais Irial foen-duma. M.
  12. Dun na nGairthi ainm in chnuic,
    o gairthib lochta in long-phuirt:
    dobadar secht laithi and
    a cur graifne na thimchell.
  13. 45] Mag nGlas ainm in moigi bain
    ota Borraich co riacht traig:
    o dachuaid in rigan de
    ainm don min-mag Mag Tibra. M. T.

  14. p.436